ប្រជាពលរដ្ឋមួយចំនួននៅរាជធានីភ្នំពេញ ត្អូញត្អែរថា បន្លែ ត្រីសាច់ បានឡើងថ្លៃចន្លោះ២ ០០០រៀលទៅ៥ ០០០រៀលក្នុងមួយគីឡូ ក្រោយពីជំនន់ទឹកភ្លៀង និងអំឡុងពេលមានករណីឆ្លងជំងឺកូវីដ១៩ បើធៀបនឹងថ្ងៃធម្មតា។
ដើរចេញពីកន្លែងទិញម្ហូបនៅម្តុំផ្សារដើមគរ អ្នកស្រី កេង ស្រីណៃ រៀបរាប់ថា កាលពី២ទៅ៣ខែមុន បន្លែ ដូចជា ស្ពៃតឿ ស្ពៃចង្កឹះ ស្ពៃខ្មៅ ខាត់ណា ស្ពៃក្រញាញ់ ជាដើម មួយគីឡូតម្លៃប្រហែល២ ៥០០រៀលទៅ៣ ០០០រៀលតែប៉ុណ្ណោះ ខណៈសាច់មាន់ សាច់គោ សាច់ជ្រូក ជាដើម មួយគីឡូតម្លៃចន្លោះពី១៧ ០០០រៀលទៅ៣៨ ០០០រៀល។
ប៉ុន្តែអ្នកស្រីថា ក្រោយពីជំនន់ទឹកភ្លៀង និងអំឡុងពេលឆ្លងជំងឺកូវីដ១៩ ប្រហែលជាជិត១ខែកន្លងទៅនេះ បន្លែ ត្រី សាច់ បានឡើងថ្លៃចន្លោះពី២ ០០០រៀលទៅ៥ ០០០រៀលក្នុងមួយគីឡូក្រាម។ ករណីនេះ ធ្វើឱ្យគាត់ជួបបញ្ហាប្រឈមច្រើនដោយសារការឡើងថ្លៃនេះ។
អ្នកស្រីនិយាយថា៖ «បើអ្នកពិបាករកលុយ វាពិបាកដែរ គ្រាន់ថា អ្នកធ្វើការធម្មតា វាប៉ះពាល់ច្រើន យើងមិនសូវហ៊ានចំណាយ យើងរកលុយមិនបាន ហើយបន្លែវាឡើងថ្លៃ គ្រាន់តែការចាយវាយ ទិញម្ហូប បន្លែ យើងកាត់បន្ថយ និយាយទៅប៉ះពាល់ជីវភាពប្រជាជនទាំងអស់»។
ដៃកាន់ថង់ដាក់បន្លែ ត្រី សាច់ ហៀបនឹងឡើងជិះម៉ូតូ លោក សុភ័គ តារា និយាយថា គាត់តែងតែមកទិញបន្លែ ត្រី សាច់ នៅផ្សារដើមគរ ស្ទើរជារៀងរាល់ថ្ងៃ។ ប៉ុន្តែលោកសង្កេតឃើញថា រយៈពេលជិត១ខែកន្លងទៅនេះ បន្លែ ត្រី សាច់ បានឡើងថ្លៃខុសពីថ្ងៃធម្មតា។ លោកស្នើទៅរដ្ឋាភិបាលជួយអន្តរាគមន៍ ឱ្យតម្លៃម្ហូបអាហារទាំងនោះចុះនៅត្រឹមតម្លៃសមរម្យ ដើម្បីកុំឱ្យប៉ះពាល់ដល់ជីវភាពអ្នកដែលមិនសូវមានជីវភាពធូរធារ។
លោកនិយាយថា៖ «ទទួលរងច្រើនដែរ តាំងពីកូវីដ ហើយនិងទឹកជំនន់ថ្មីៗហ្នឹងទៀត ហើយឥលូវកូវីដក៏វាមកមួយរលកទៀត គួរតែទប់ស្កាត់ការឡើងថ្លៃបន្តទៀត ប៉ុន្តែបច្ចុប្បន្ន វាអត់ទាន់អីទេ។ [រដ្ឋាភិបាល] ជួយដូចថា យើងបានទិញមកតម្លៃវា [សមរម្យ] ជីវភាពយើងអាចនៅថេរ វាអត់អាចដុនដាបជាងហ្នឹង»។
ចំណែកនៅផ្សារទួលទំពូង និងផ្សារបឹងត្របែក រួមទាំងផ្សារអូឡាំពិក ឯណោះវិញ ប្រជាពលរដ្ឋដែលទៅទិញបន្លែ ត្រី សាច់ នៅទីនោះ បានរៀបរាប់ប្រហាក់ប្រហែលគ្នាថា បន្លែ ត្រី សាច់ ឡើងថ្លៃដូចផ្សារដើមគរដែរ។
ដើរចេញពីផ្សារទួលទំពូង អ្នកស្រី វួច ឡាង ជាពលរដ្ឋម្នាក់ទៀត បាននិយាយថា គាត់ទៅទិញបន្លែនៅផ្សារនោះ ដោយសារតែនៅជិតផ្ទះនិងគ្មានជម្រើសនោះទេ ពីព្រោះអ្នកលក់ថា នាំចូលមកឡើងថ្លៃដែរ។
រីឯផ្សារម៉ាក្រូ ស្ថិតនៅក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ អ្នកស្រី កែវ សម្ពស្ស និយាយថា គាត់មកទិញបន្លែ ត្រី សាច់ នៅផ្សារទំនើបនេះក្នុង១សប្តាហ៍ម្តង។ ប៉ុន្តែអ្នកស្រីថា មូលហេតុដែលនាំឱ្យគាត់ទៅទិញនៅផ្សារទំនើប ដោយសារនៅទីនោះមានសុវត្ថិភាពខ្ពស់ក្នុងការទប់ស្កាត់ការឆ្លងជំងឺកូវីដ១៩ ជាងទិញនៅផ្សារធម្មតា។
អ្នកស្រីនិយាយថា៖ «មកផ្សារនេះ វាសុវត្ថិភាព មកគេស្ទង់កម្ដៅកន្លែងថ្ងាសយើង ហើយគេបាញ់អាល់កុលលាងដៃយើង បានគេឱ្យយើងចូល ដើម្បីការពារជំងឺកូវីដ ប៉ុន្តែបើយើងទៅទិញនៅផ្សារធម្មតា គេមិនមានអាល់កុលនិងប្រដាប់ស្ទង់កម្ដៅអ៊ីចឹងទេ»។
អាជីវករលក់បន្លែ សាច់ នៅផ្សារដើមគរ ផ្សារទួលទំពូង ផ្សារបឹងត្របែក និងផ្សារអូឡាំពិក បាននិយាយប្រហាក់ប្រហែលគ្នាថា ដើមចមដែលនាំឱ្យទំនិញទាំងនោះឡើងថ្លៃរយៈពេលជិត១ខែនេះ ដោយសារតែបញ្ហាជំនន់ទឹកភ្លៀងនិងការឆ្លងរាលដាលជំងឺកូវីដ១៩ថ្មី។
អាជីវករម្នាក់ក្នុងចំណោមអាជីវករផ្សេងទៀត សុំមិនបញ្ចេញឈ្មោះ និយាយថា ពួកគាត់មិនចង់ដំឡើងថ្លៃនោះទេ ប៉ុន្តែមកពីគាត់យកពីឈ្មួញមកមានតម្លៃថ្លៃ ទើបលក់ចេញវិញក៏ឡើងថ្លៃដែរ។
អាជីវកររូបនោះ និយាយថា៖ «ធម្មតាយកមកពីគេឡើង ចេះតែលក់ឡើងតាមហ្នឹងដែរ សម្រាប់អ្នកទិញគេចង់បានតែថោក[ហើយ]របស់ល្អតែអ៊ីចឹង ធម្មតាទីផ្សារ អ្នកណាក៏ដឹងដែរ និយាយទៅអ្នកណាក៏គេនិយាយគ្រប់តែមាត់ឥលូវ ដូចថា អីវ៉ាន់ឥលូវវាថ្លៃ»។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន មានប្រសាសន៍ថា តម្លៃកសិកម្ម បន្លែ ត្រី សាច់ ដែលនាំយកមកលក់នៅលើទីផ្សារ មិនបានឡើងថ្លៃដូចឈ្មួញយកទៅលក់បន្តនោះទេ។ ប៉ុន្តែលោកថា អ្នកដែលលក់ថ្លៃនោះ គ្រាន់តែជាក្រុមជ្រុលនិយម ចង់កេងចំណេញនៅអំឡុងពេលឆ្លងជំងឺកូវីដ១៩តែប៉ុណ្ណោះ។
លោកមានប្រសាសន៍ថា៖ «រឿងរ៉ាវទាំងអស់កើតឡើងដោយសារតែពួកមួយក្រុម ចេះតែបំផុស ប៉ុន្តែសភាពនៅកម្ពុជាហាក់បីដូចជាមិនមានរឿងរ៉ាវអ៊ីចឹងទេ ការដាំដុះបន្លែ យើងផ្គត់ផ្គង់ធម្មតា បញ្ហាទីផ្សារ បើយើងអន្តរាគមន៍ គ្រាន់តែយើងជួយឱ្យអ្នកទីផ្សារអាណិតអ្នកហូប [លក់តម្លៃសមរម្យ]»។
នាយិកាមជ្ឈមណ្ឌលសិក្សា និងអភិវឌ្ឍន៍កសិកម្ម កម្ពុជា (អង្គការ CEDAC) លោកស្រី តុង ចាន់ធាង ដែលតាមដានករណីនេះ មានប្រសាសន៍ថា បន្លែ ត្រី សាច់ បានឡើងថ្លៃជាបន្តបន្ទាប់ ចាប់តាំងពីកម្ពុជាបិទច្រកព្រំដែន ដើម្បីទប់ស្កាត់ការឆ្លងរាលដាលជំងឺកូវីដ១៩។
លោកស្រីផ្តល់ជាអនុសាសន៍ថា ដើម្បីទប់ស្កាត់កុំឱ្យបន្លែ ត្រី សាច់ ឡើងថ្លៃ ក្រសួងកសិកម្ម ត្រូវជួយផ្នែកបច្ចេកទេស បណ្តុះបណ្តាលប្រជាកសិករឱ្យចេះដាំបន្លែ ចិញ្ចឹមសត្វ និងរកទីផ្សារជូនពួកគេ ទើបទទួលបានផលវិជ្ជមាន ទាំងអ្នកដាំនិងអ្នកទិញយកទៅបរិភោគ។
លោកស្រីផ្តល់ជាអនុសាសន៍ថា៖ «យើងផ្គត់ផ្គង់ក្នុងស្រុកបានច្រើន តម្លៃវាអាចធូរថ្លៃដែរ ព្រោះយើងអត់មានការដឹកជញ្ជូនមកពីក្រៅទេ កាលណាយើងផលិតបានច្រើន ហើយយើងមានទីផ្សារសមរម្យ ហើយយើងកាត់បន្ថយឈ្មួញកណ្តាលដែលជាចង្វាក់ទិញតគ្នាច្រើន លក់ផ្ទាល់ទៅឱ្យអ្នកចែកចាយ ឬក៏អ្នកលក់រាយ ធ្វើឱ្យតម្លៃមិនសូវឡើងថ្លៃប៉ុន្មានទេ វាអាចតម្លៃសមរម្យសម្រាប់អ្នកដែលមិនសូវមានចំណូលច្រើន»។
របាយការណ៍ក្រសួងកសិកម្ម រុក្ខាប្រមាញ់ និងនេសាទ បង្ហាញថា កម្ពុជាបានចំណាយថវិកាខ្ទង់២០០លានដុល្លារអាមេរិកក្នុង១ឆ្នាំៗ ទៅលើការនាំចូលបន្លែពីបរទេស ដើម្បីផ្គត់ផ្គង់តម្រូវការក្នុងស្រុក។ ក្រសួងថា បន្លែនាំចូលទាំងនោះ ភាគច្រើននាំចូលពីប្រទេសវៀតណាមនិងប្រទេសចិន។
បើតាមរបាយការណ៍ក្រសួងដដែលនេះ កម្ពុជាត្រូវការបន្លែប្រមាណពី៥០០ទៅ៦០០តោនក្នុងមួយថ្ងៃៗ ក្នុងនោះនៅដើមឆ្នាំនេះ កម្ពុជានាំចូលប្រមាណ៣០ភាគរយ បន្ទាប់ពីបរិមាណនៃការនាំចូលបន្លែពីបរទេសចូលមកកម្ពុជា បានកើនឡើងដល់ទៅ៥០ភាគរយ កាលពីពាក់កណ្ដាលឆ្នាំមុន៕
