រដ្ឋបាលខេត្តសៀមរាប កំពុងស្រាវជ្រាវស្វែងរកជនឆបោកដែលដើរប្រាប់ប្រជាពលរដ្ឋឱ្យបង់កម្រៃជើងសាសរុបចំនួន៦០០ដុល្លារ ជាថ្នូរនឹងការដាក់ពាក្យចូលបម្រើការងារនៅស្ថានកុងស៊ុលជប៉ុនប្រចាំខេត្តសៀមរាប។
សេចក្តីជូនដំណឹងរបស់រដ្ឋបាលខេត្តសៀមរាប នៅថ្ងៃទី១១ ខែវិច្ឆិកា ឆ្នាំ២០២០ បានលើកឡើងថា ថ្មីៗនេះ រដ្ឋបាលខេត្តបានទទួលព័ត៌មានថា មានបុគ្គលម្នាក់ដែលអះអាងថាជាតំណាងក្រុមហ៊ុនមួយ បានប្រាប់បុរសម្នាក់ថា ដើម្បីបានបម្រើការងារនៅស្ថានកុងស៊ុលជប៉ុនប្រចាំខេត្តសៀមរាប ត្រូវទៅដាក់ពាក្យចូលបម្រើការងារនៅស្ថានកុងស៊ុលនោះ ដោយបង់កម្រៃជើងសាចំនួន៥០០ដុល្លារសម្រាប់ក្រុមហ៊ុន និង១០០ដុល្លារសម្រាប់ស្ថានកុងស៊ុលជប៉ុន។
ករណីនេះ រដ្ឋបាលខេត្តបានអំពាវនាវដល់ប្រជាពលរដ្ឋមានការប្រុងប្រយ័ត្នអំពីការឆបោកពីសំណាក់បុគ្គលទុច្ចរិតនោះ និងអំពាវនាវដល់ជនរងគ្រោះក្នុងអំពើល្មើសនេះសហការជាមួយរដ្ឋបាលខេត្ត ដើម្បីឈានទៅរកការស្រាវជ្រាវ ទប់ស្កាត់ បង្ការ និងចាត់វិធានការចំពោះបុគ្គលទុច្ចរិតនេះតាមផ្លូវច្បាប់ និងធានាបាននូវផលប្រយោជន៍សាធារណជន។
រដ្ឋបាលខេត្តបញ្ជាក់ថា៖ «រាល់ព័ត៌មានទាំងនេះ សូមសាម៉ីជនដែលទទួលរងគ្រោះដោយអំពើល្មើសនេះ និងសាធារណជនដែលធ្លាប់បានទទួលព័ត៌មាន ឬដឹងពីអត្តសញ្ញាណក្រុមហ៊ុន ឬជនដែលបានប្រព្រឹត្តអំពើល្មើសនេះ សូមទំនាក់ទំនងមករដ្ឋបាលខេត្តសៀមរាប ឬលេខទូរសព្ទ ០១២ ៩០២ ២៩៩/ ០១២ ៥៩៨ ៦៧២»។
ពាក់ព័ន្ធនឹងករណីនេះ កាលពីថ្ងៃទី១០ ខែវិច្ឆិកា ឆ្នាំ២០២០ ស្ថានឯកអគ្គរាជទូតជប៉ុនប្រចាំព្រះរាជាណាចក្រកម្ពុជា បានផ្សព្វផ្សាយតាមគណនីហ្វេកប៊ុករបស់ខ្លួន ដោយបញ្ជាក់ថា ស្ថានឯកអគ្គរាជទូតជប៉ុនប្រចាំព្រះរាជាណាចក្រកម្ពុជា និងស្ថានកុងស៊ុលប្រចាំខេត្តសៀមរាប ពុំមានផែនការជ្រើសរើសបុគ្គលិកតាមរយៈក្រុមហ៊ុនឬទីភ្នាក់ងារស្វែងរកការងារណាមួយនោះឡើយ៕
