ជនជាតិដើមភាគតិចពូនង នៅក្រុងសែនមនោរម្យ ក្នុងខេត្តមណ្ឌលគិរី ស្នើទៅរដ្ឋាភិបាលនិងស្ថាប័នពាក់ព័ន្ធ ចាត់វិធានការទប់ស្កាត់ករណីអាជ្ញាធរឃុបឃិតគ្នាលក់ដីភ្នំចំនួន២នៅក្នុងខេត្តនេះ។
តំណាងជនជាតិដើមភាគតិចពូនង លោក ចែន វណ្ណា ដែលរស់នៅក្នុងភូមិពូលុង ក្នុងសង្កាត់រមនា ប្រាប់វីអូឌីនៅថ្ងៃនេះថា លោកបានដាក់លិខិតមួយទៅអាជ្ញាធរភូមិ-ឃុំកាលពីថ្ងៃទី២២ ខែកញ្ញា ដោយបានស្នើឱ្យជួយទប់ស្កាត់កុំឱ្យមានការលក់ដីភ្នំទ្រីង ដែលមានផ្ទៃដីទំហំ១១ហិកតា និងភ្នំពូពែ ដែលមានផ្ទៃដីទំហំ៧ហិកតា។
តំណាងពលរដ្ឋជនជាតិដើមភាគតិចរូបនេះ ប្រាប់ថា អាជ្ញាធរបែរជាឃុបឃិតជាមួយគ្នាចុះហត្ថលេខាផ្ទេរសិទ្ធិលក់ដីភ្នំនោះទៅវិញ កាលពីថ្ងៃទី៧ ខែតុលាកន្លងមក។
លោក ចែន វណ្ណា ប្រាប់ថា៖ «សល់តែពីរហ្នឹង លក់ទៀត។ ពួកខ្ញុំមិនចង់លក់ ទុកថែរក្សាអភិរក្សវប្បធម៌ឱ្យជនជាតិដើមភាគតិច ហើយទុកជាស្នាដៃឱ្យកូនចៅជំនាន់ក្រោយ ហើយថា ពួកខ្ញុំមិនឱ្យលក់ ថាពួកខ្ញុំប្រមូលផលអញ្ចេះប្រមូលផលអញ្ចុះ។ ខ្ញុំធ្វើការទប់ស្កាត់ហើយពីមេភូមិនិងមេឃុំ ហើយមេភូមិនិងឃុំនៅតែចុះហត្ថលេខាឱ្យគេ។ អ៊ីចឹងមានតែខឹងមេភូមិនិងមេឃុំហ្នឹង»។
ជនជាតិដើមភាគតិចពូនងម្នាក់ទៀត អ្នកស្រី ប្លិ អេន និយាយថា អ្នកភូមិជិត២០០គ្រួសារ នឹងលើកគ្នាឡើងទៅតវ៉ាដល់ផ្ទះលោកនាយកដ្ឋមន្ត្រី ហ៊ុន សែន ប្រសិនបើអាជ្ញាធរនិងស្ថាប័នពាក់ព័ន្ធនៅមិនដោះស្រាយ ហើយនៅតែលក់ភ្នំទាំងពីរនេះទៀត។ អ្នកស្រីអះអាងថា បើតាមលិខិតទិញលក់ដីភ្នំនោះ គឺមានឈ្មោះលោក ស ថេត ស្នងការនគរបាលរាជធានីភ្នំពេញ ជាអ្នកទិញដីនោះ។
អ្នកស្រី អេន បន្តថា ការដែលពួកគាត់ចង់ឱ្យរក្សាភ្នំទាំងពីរនេះ គឺដើម្បីទុកអភិរក្សជាតំបន់ទេសចរណ៍វប្បធម៌ជនជាតិភាគតិច។
អ្នកស្រី ប្លិ អេន ប្រាប់ថា៖ «គេឱ្យឯកសារហ្នឹង ស្រាប់តែឃើញមេភូមិ មេឃុំខ្លួនឯងចុះហត្ថលេខាដាក់តែម្ដង។ ពួកខ្ញុំចង់រក្សាទុកជាតំបន់ទេសចរណ៍ ធ្វើជាវប្បធម៌ជនជាតិដើមភាគតិច»។
មេភូមិពូលុង លោក ឡុង តុក ទទួលស្គាល់ថា បានចុះហត្ថលេខាលើលិខិតទិញលក់មែន ដោយលោកថា ព្រោះអ្នកទិញគឺជាអ្នកធំ។
លោក ឡុង តុក ប្រាប់ថា៖ «ខ្ញុំប្រាប់ដែរ គាត់ជឿ គាត់ថាអត់អីទេ រឿងហ្នឹងរឿងអ្នកលក់អ្នកទិញទេ មិនពាក់ព័ន្ធជាមួយអាជ្ញាធរ អ្នកទិញមកពីភ្នំពេញដែរ។ គាត់មកដល់ផ្ទះខ្ញុំ ជំទាវអីហ្នឹង ខ្ញុំអត់ដឹងដែរ។ ជំទាវគាត់កាន់ឯកសារហ្នឹង ខ្ញុំថា ខ្ញុំអត់ទាន់ចុះហត្ថលេខាទេ ព្រោះដីហ្នឹងនៅមានរឿងរ៉ាវ។ គាត់ថាអត់អីទេ រឿងហ្នឹងខ្ញុំដឹងអស់ហើយ។ ហ្នឹងហើយ បើគេពីថ្នាក់លើថា អត់អីទេ ជួយចុះហត្ថលេខាឱ្យគាត់ទៅ។ តុលាការអី គេដឹងអស់ហើយ ខ្ញុំនិយាយត្រង់ អត់ចេះលាក់ទេ»។
ស្នងការនគរបាលរាជធានីភ្នំពេញ លោក ស ថេត បានបដិសេធ ដោយថា លោកមិនពាក់ព័ន្ធនឹងការទិញលក់ដីទេ។
លោក ស ថេត ប្រាប់ថា៖ «អត់ទេ! ចាំមើលខ្ញុំស្រាវជ្រាវសិន។ ខ្ញុំមិនបានទិញណា ក្រែងពីណាយកឈ្មោះទៅដាក់ទេអី បានហើយ អ៊ីចឹងចាំខ្ញុំស្រាវជ្រាវមើល»។
អភិបាលខេត្តមណ្ឌលគិរី លោក ស្វាយ សំអ៊ាង មានប្រសាសន៍ថា លោកមិនទាន់ទទួលបានបណ្ដឹងរបស់ប្រជាពលរដ្ឋនៅឡើយទេ ពាក់ព័ន្ធនឹងការលក់ដីភ្នំនេះ។
លោក ស្វាយ សំអ៊ាង ប្រាប់ថា៖ «ពាក់ព័ន្ធនឹងដីធ្លីនេះ ទាល់តែពិនិត្យសិន ព្រោះឥលូវពាក់ព័ន្ធនឹងការទិញលក់វាច្រើន។ កន្លែងខ្លះក៏ត្រឹមត្រូវ កន្លែងខ្លះក៏មិនត្រឹមត្រូវ។ កន្លែងត្រឹមត្រូវ អាជ្ញាធរគាំទ្រ។ អាណាមិនត្រឹមត្រូវ គឺចាត់វិធានការ។ ឥលូវនេះ យើងមិនទាន់ដឹងទេព័ត៌មាននេះ»។
អ្នកសម្របសម្រួលសមាគមការពារសិទ្ធិមនុស្សអាដហុក (ADHOC) ប្រចាំខេត្តមណ្ឌលគិរី លោក អ៊ាង ម៉េងលី ជំរុញឱ្យអាជ្ញាធរខេត្តដកហូតដីនោះមកទុកជាសម្បត្តិរដ្ឋវិញ បើទោះបីជាអ្នកទិញដីភ្នំនោះជាបុគ្គលមានអំណាចក៏ដោយ។
លោក អ៊ាង ម៉េងលី ប្រាប់ថា៖ «អាជ្ញាធរថ្នាក់ខេត្តហ្នឹងហើយគាត់មានសិទ្ធិក្នុងការស្វែងរកភស្តុតាងឬចំណុចណាមួយដែលគាត់គិតថា បើសិនដីហ្នឹងជាដីរដ្ឋពិតប្រាកដមែន អាជ្ញាធរខេត្តគួរតែដកហូតទុកជាសម្បត្តិរដ្ឋ។ យើងដឹងហើយ ដីរបស់រដ្ឋ ទោះបីជាមានឯកសារលិខិតស្នាមអីក៏ដោយ គឺអ្នកដែលធ្វើឯកសារហ្នឹងហើយជាអ្នកទទួលខុសត្រូវ»។
កាលពីថ្ងៃទី៧ ខែកក្កដាកន្លងមកនេះ រដ្ឋមន្ត្រីក្រសួងមហាផ្ទៃ លោក ស ខេង បានប្រកាសជាសាធារណៈថា អ្នកធំៗបាននាំគ្នាសម្រុកទៅចាប់ដី ហើយមានអ្នកធំមួយចំនួនទៀតក៏បានយកឈ្មោះលោកទៅប្រើប្រាស់ ដើម្បីទទួលបានដីនៅខេត្តមណ្ឌលគិរីផងដែរ។
ក្រោយពីប្រកាសនោះ លោក ស ខេង បានបង្កើតក្រុមការងារអន្តរក្រសួង ក្នុងនោះមានក្រសួងកសិកម្ម ក្រសួងរៀបចំដែនដី និងក្រសួងបរិស្ថាន ដើម្បីចុះសិក្សាស្រាវជ្រាវលើករណីការកាប់រានទន្ទ្រានកាន់កាប់ដីព្រៃខុសច្បាប់ ក្នុងតំបន់ការពារធម្មជាតិក្នុងខេត្តភាគឦសានមួយនេះ៕
