មេបញ្ជាការកងរាជអាវុធហត្ថខេត្តកំពង់ធំ លោក ហង្ស ថុល បានឱ្យដឹងថា សំណុំរឿងប្រឆាំងនឹងនាយកទីចាត់ការអន្តរវិស័យរបស់ខេត្តកំពង់ធំ ត្រូវបានផ្ទេរឱ្យស្ថិតក្រោមនីតិវិធីរបស់តុលាការខេត្តសៀមរាបវិញ បន្ទាប់ពីមន្ត្រីរូបនេះត្រូវបានចាប់ខ្លួនពាក់ព័ន្ធនឹងការចោទថា បានប៉ុនប៉ងធ្វើឃាតព្រះរាជអាជ្ញាមួយរូបនៅខេត្តកំពង់ធំ។
មេបញ្ជាការកងរាជអាវុធហត្ថរូបនេះ បានឱ្យដឹងថា នាយកទីចាត់ការអន្តរវិស័យខេត្តកំពង់ធំ លោក ម៉ៅ ប៊ុនធូ ត្រូវបានសមត្ថកិច្ចឃាត់ខ្លួនកាលពីយប់ថ្ងៃទី១៦ ខែវិច្ឆិកា ក្រោមបណ្ដឹងចោទថា បានប៉ុនប៉ងធ្វើឃាតលោក សាយ វាសនា ព្រះរាជអាជ្ញារងនៃអយ្យការអមសាលាដំបូងខេត្តកំពង់ធំ។
នៅពេលសួរថា ហេតុអ្វីបានជាសំណុំរឿងនេះត្រូវបានផ្ទេរទៅតុលាការខេត្តសៀមរាបនោះ មេប៉េអឹមខេត្តកំពង់ធំរូបនេះបានប្រាប់ថា លោកមិនដឹងនោះឡើយ ហើយប្រាប់ឱ្យសួរទៅតុលាការខេត្តកំពង់ធំវិញ។
លោក ហង្ស ថុល ប្រាប់ថា៖ «អូ! ឥលូវគេបញ្ជូនគាត់ទៅសៀមរាប ចង់និយាយថា គេផ្ទេរដែនសមត្ថកិច្ច។ [ហេតុអ្វីបានគេផ្ទេរទៅខេត្តសៀមរាប?] ខ្ញុំអត់ដឹងទេ ទាល់តែប្អូនសួរទៅខាងតុលាការ ព្រោះតុលាការគេចាត់ចែងរឿងហ្នឹង ព្រោះផុតដៃខ្ញុំហើយ។ គេបញ្ជូនទៅម្សិលមិញ មានសេចក្ដីសម្រេចពីក្រសួងយុត្តិធម៌»។
ព្រះរាជអាជ្ញាខេត្តសៀមរាប លោក កើត វណ្ណារ៉េត ប្រាប់វីអូឌីនៅថ្ងៃនេះថា សំណុំរឿងនោះ តំណាងអយ្យការនៃសាលាដំបូងខេត្តសៀមរាប មិនទាន់សម្រេចចោទប្រកាន់ពីបទល្មើសអ្វីនៅឡើយទេ ដោយថា ទុកពេលធ្វើការស៊ើបអង្កេតសិន។
លោក កើត វណ្ណារ៉េត ប្រាប់ថា៖ «នៅដំណាក់កាលអយ្យការ ខ្ញុំមិនទាន់និយាយបាន កំពុងនៅសាកសួរគាត់នៅឡើយ មិនអាចនិយាយថាយ៉ាងម៉េចចំណាត់ការនោះ»។
ព្រះរាជអាជ្ញារងនៅខេត្តកំពង់ធំ លោក សាយ វាសនា អះអាងថា លោកគឺជាជនរងគ្រោះក្នុងហេតុការណ៍នោះ។ លោករៀបរាប់ថា កាលពីម៉ោងជាង៩យប់ ថ្ងៃទី១៦ ខែវិច្ឆិកា លោកបានចូលទៅហូបអាហារសាមគ្គីនៅក្នុងភោជនីយដ្ឋាន ជ្រោះពេជចិន្តា ក្នុងបន្ទប់«កែប» ជាមួយលោក ហង្ស ថុល មេបញ្ជាការកងរាជអាវុធហត្ថខេត្តកំពង់ធំ លោក ឃុន ប៊ុនហូ មេបញ្ជាការរងកងរាជអាវុធហត្ថខេត្តកំពង់ធំ លោក ព្រហ្ម វាសនា អនុប្រធានមន្ទីរស្រាវជ្រាវព័ត៌មានសន្តិសុខកងរាជអាវុហត្ថខេត្តកំពង់ធំ និងមនុស្ស២នាក់ផ្សេងទៀត។
លោកបន្តថា អំឡុងពេលហូបអាហារសាមគ្គីនោះ លោក ម៉ៅ ប៊ុនធូ ដែលញ៉ាំអាហារនៅបន្ទប់ក្បែរគ្នា បានរុញទ្វារចូលក្នុងបន្ទប់«កែប» យកដៃឆ្វេងចាប់ដៃគាត់ និងដៃស្តាំកាន់កាំបិតភ្ជង់កគាត់បម្រុងនឹងធ្វើឃាត ប៉ុន្តែត្រូវបានអ្នកនៅជិតនោះនិងសមត្ថកិច្ចផ្សេងទៀត ចេញមកជួយគាត់ឱ្យរួចផុតពីរឿងនេះ។
លោកព្រះរាជអាជ្ញារូបនោះបញ្ជាក់ថា សំណុំរឿងនេះកើតចេញពីគំនុំនិងទំនាស់ផលប្រយោជន៍កន្លងមកច្រើនដងមកហើយ។
លោក សាយ វាសនា ប្រាប់ថា៖ «កាលពីមុនមក ខ្ញុំចុះចាប់បទល្មើសធនធានធម្មជាតិមួយចំនួន មានបុគ្គល [ម៉ៅ ប៊ុនធូ] ហ្នឹងពាក់ព័ន្ធឬក៏កាង។ កន្លែងហ្នឹង គេ [ម៉ៅ ប៊ុនធូ] មិនខឹងយើង! ហើយប៉ុន្មានខែមុន គាត់មិនធ្លាប់មានរឿងដែរ! គាត់ទៅចាប់មនុស្សដែលគេមិនខុសអី ទៅដកគ្រឿងចក្រគេ ហើយខ្ញុំអនុវត្តនីតិវិធី ចេះតែមានអារម្មណ៍មិនល្អជាមួយខ្ញុំ»។
លោក សាយ វាសនា ស្នើទៅតុលាការខេត្តសៀមរាបចាត់វិធានការលើឈ្មោះ ម៉ៅ ប៊ុនធូ តាមនីតិវិធីច្បាប់ ដោយកំណត់ទោសត្រឹមកម្រិតអតិបរិមា លោកមិនទាមទារសំណងជំងឺចិត្តនោះទេ។ ប៉ុន្តែលោកថា បើមិនផ្តន្ទាទោសតាមការស្នើសុំទេ លោកស្នើសុំសំណងជំងឺចិត្ត១លានដុល្លារអាមេរិក។
អភិបាលខេត្តកំពង់ធំ លោក សុខ លូ បានឱ្យដឹងថា លោកបានទៅដល់កន្លែងកើតហេតុ ក្រោយពីសមត្ថកិច្ចឃាត់ខ្លួនលោក ម៉ៅ ប៊ុនធូ ហើយ។ នៅពេលត្រូវបានសាកសួរបន្ថែមទៀត អភិបាលខេត្តរូបនេះប្រាប់ថា លោកមិនអាចបកស្រាយបន្ថែមបាននោះឡើយ។
បើតាមព្រះរាជអាជ្ញាខេត្តសៀមរាប លោក កើត វណ្ណារ៉េត បញ្ជាក់ថា បច្ចុប្បន្ននេះ សមត្ថកិច្ចខេត្តសៀមរាបបានបញ្ជូនជនល្មើសឃុំខ្លួន និងទុកឱ្យតំណាងអយ្យការធ្វើការស៊ើបអង្កេតបន្ថែមទៀតជុំវិញការប៉ុនប៉ងធ្វើឃាតលោក សាយ វាសនា រួចនឹងបញ្ជូនទៅចៅក្រមស៊ើបសួរបន្តតាមនីតិវិធីច្បាប់៕
