សមាគមរោងចក្រកាត់ដេរនៅកម្ពុជា បានឱ្យដឹងថា កម្ពុជានឹងទទួលបានការអនុគ្រោះពន្ធពាណិជ្ជកម្មតាមរយៈប្រព័ន្ធអនុគ្រោះពន្ធទូទៅ (GSP) របស់ប្រទេសអង់គ្លេស នៅដើមឆ្នាំ២០២១ខាងមុខនេះ។
ក្នុងលិខិតរបស់សមាគមរោងចក្រកាត់ដេរនៅកម្ពុជា បានឱ្យដឹងនៅថ្ងៃនេះថា ប្រទេសអង់គ្លេសបានចាកចេញពីសហភាពអឺរ៉ុប ហើយរយៈពេលអន្តរកាលនៃការចាកចេញរបស់ប្រទេសអង់គ្លេស (Brexit) នឹងត្រូវបញ្ចប់នៅចុងឆ្នាំ២០២០នេះ។
លិខិតដដែល បញ្ជាក់ថា ចាប់ពីថ្ងៃទី១ ខែមករា ឆ្នាំ២០២១ ប្រទេសដែលមានលក្ខណៈសម្បត្តិ ជាប្រទេសដែលកំពុងអភិវឌ្ឍន៍ នឹងអាចទទួលបានការអនុគ្រោះពាណិជ្ជកម្មទៅប្រទេសនានា តាមរយៈប្រព័ន្ធ GSP របស់អង់គ្លេស ដូចការអនុគ្រោះ GSP របស់សហភាពអឺរ៉ុបដែរ។
លិខិតដដែល បន្តថា ប្រព័ន្ធ GSP របស់អង់គ្លេស មានក្របខណ្ឌចំនួន៣ រួមមាន ក្របខណ្ឌប្រទេសអភិវឌ្ឍន៍តិចតួចបំផុត ក្របខណ្ឌទូទៅ និងក្របខណ្ឌប្រសើរឡើង។
ករណីនេះ សមាគមរោងចក្រកាត់ដេរនៅកម្ពុជា អះអាងថា កម្ពុជាជាប្រទេសដែលអង្គការសហប្រជាជាតិចាត់ថ្នាក់ជាប្រទេសដែលអភិវឌ្ឍន៍តិចតួចបំផុត ដែលករណីនេះ កម្ពុជានឹងទទួលបានការនាំចេញដោយមិនជាប់ពន្ធនិងមិនជាប់កម្រិតកូតាទៅកាន់ប្រទេសអង់គ្លេសសម្រាប់ទំនិញទាំងអស់ លើកលែងតែអាវុធនិងគ្រឿងផ្ទុះ។
បន្ថែមពីនេះ សមាគមរោងចក្រកាត់ដេរនៅកម្ពុជាថា កំពុងធ្វើការងារជាមួយក្រសួងពាណិជ្ជកម្មកម្ពុជានិងសមភាគីអង់គ្លេស ដើម្បីសុំការបំភ្លឺអំពីការផ្លាស់ប្តូរមួយចំនួននៅក្នុងនីតិវិធីរដ្ឋបាល (ប្រសិនបើមាន)ទៀតផង។
សហភាពអឺរ៉ុបបានចាប់ផ្តើមដកភាពអនុគ្រោះពន្ធពាណិជ្ជកម្មសម្រាប់កម្ពុជាចំនួន២០ភាគរយជាបណ្តោះអាសន្នចាប់ពីថ្ងៃទី១២ ខែសីហាមក បន្ទាប់ពីខ្លួនបានដំណើរការពិនិត្យរយៈពេល១៨ខែ រាប់ចាប់ពីថ្ងៃប្រកាសនៅខែកុម្ភៈ ឆ្នាំ២០១៩ ក្រោយខ្លួនរកឃើញមានការរំលោភសិទ្ធិមនុស្សជាប្រព័ន្ធនិងមានលក្ខណៈធ្ងន់ធ្ងរនៅកម្ពុជា៕