រដ្ឋាភិបាលបានអនុញ្ញាតឱ្យបើកដំណើរការសាលារៀន សារមន្ទីរ រោងភាពយន្ត និងការរៀបចំពិធីផ្សេងៗឡើងវិញ ក្រោយពីការធ្វើតេស្តលើកទី៤ លើអ្នកប៉ះពាល់ក្នុងព្រឹត្តិការណ៍៣វិច្ឆិកា ជាង១៤០០នាក់ ទទួលបានលទ្ធផលអវិជ្ជមានវីរុសកូវីដ១៩។
ការអនុញ្ញាតនេះបានធ្វើឡើងក្រោយពីរដ្ឋាភិបាលបានប្រកាសថា ព្រឹត្តិការណ៍៣វិច្ឆិកា នឹងត្រូវបិទបញ្ចប់ការធ្វើចត្តាឡីស័កនៅថ្ងៃទី១៩ ខែវិច្ឆិកានេះ នៅរាជធានីភ្នំពេញ ខេត្តកណ្តាល ពោធិ៍សាត់ ព្រៃវែង និងកំពង់ធំ ខណៈខេត្តកំពង់ឆ្នាំងនឹងបិទបញ្ចប់នៅថ្ងៃទី២១ ខែវិច្ឆិកា។ ក្រៅពីនោះ ខេត្តកែប ព្រះសីហនុ កំពង់ចាម នឹងបញ្ចប់នៅថ្ងៃទី២៣ ខែវិច្ឆិកា និងខេត្តព្រះវិហារ ខេត្តរតនគិរី នៅថ្ងៃទី២៥ ខែវិច្ឆិកា។
លោកនាយករដ្ឋមន្ត្រី ហ៊ុន សែន បានថ្លែងសារជាសំឡេងកាលពីយប់ថ្ងៃពុធម្សិលមិញ ដោយសម្រេចអនុញ្ញាតឱ្យបើកដំណើរការសាលារៀនឡើងវិញនៅថ្ងៃទី២៣ ខែវិច្ឆិកា ខាងមុខ។
ចំពោះការរៀបចំពិធីអាពាហ៍ពិពាហ៍ ដែលប្រជាពលរដ្ឋសម្រេចផ្អាកដោយខ្លួនឯងនាពេលកន្លងមក ដើម្បីបង្ការការចម្លងវីរុសកូវីដ១៩នោះ លោកនាយករដ្ឋមន្ត្រីក៏បានអនុញ្ញាតឱ្យរៀបចំបានផងដែរ ប៉ុន្តែត្រូវប្រកាន់ខ្ជាប់នូវវិធានការការពារខ្លួនតាមការណែនាំរបស់ក្រសួងសុខាភិបាល។
លោកបានណែនាំទៅអាជ្ញាធរដែរថា៖ «សូមសម្រួលឱ្យមានការរៀបអាពាហ៍ពិពាហ៍ គ្រាន់តែឱ្យយកចិត្តទុកដាក់ទៅលើបញ្ហាទាក់ទងនឹងការអនាម័យ ទាក់ទងនឹងអ្វីជាតម្រូវការការណែនាំរបស់ក្រសួងសុខាភិបាលតែប៉ុណ្ណោះ»។
លោកបន្ថែមថា៖ «ប្រយ័ត្ននៅតែប្រយ័ត្ន ក៏ប៉ុន្តែយើងមិនត្រូវបិទដង្ហើមសេដ្ឋកិច្ចនិងចលនាសេដ្ឋកិច្ចសង្គមផ្សេងទៀតដែរទេ។ ត្រូវយកចិត្តទុកដាក់ដោះស្រាយបញ្ហាហ្នឹង ពិនិត្យមើលគ្រាន់តែជួយសម្រួល ដើម្បីរំឭកឱ្យបងប្អូនជានិច្ចកាលឱ្យមានការប្រុងប្រយ័ត្ន ដូចជាការវាស់កម្តៅ ការលាងដៃ គម្លាតសុវត្ថិភាព ជាដើម»។
ស្របពេលគ្នានេះដែរ ក្រសួងសុខាភិបាលក៏បានផ្ញើលិខិតទៅក្រសួងវប្បធម៌ និងវិចិត្រសិល្បៈ និងអភិបាលរាជធានី-ខេត្ត អនុញ្ញាតឱ្យបើកដំណើរការឡើងវិញនូវរោងភាពយន្តនិងសារមន្ទីរនានានៅទូទាំងប្រទេស ក្រោយមានការណែនាំពីនាយករដ្ឋមន្ត្រី។
គួរបញ្ជាក់ថា រដ្ឋាភិបាលបានសម្រេចផ្អាកដំណើរការសាលារៀន រោងភាពយន្ត សារមន្ទីរ និងការជួបជុំដែលមានមនុស្សច្រើន ក្រោយពីរដ្ឋមន្ត្រីការបរទេសហុងគ្រីបានមកបំពេញទស្សនកិច្ចនៅកម្ពុជា កាលពីថ្ងៃទី៣ ខែវិច្ឆិកា និងត្រូវបានរកឃើញថា មានផ្ទុកវីរុសកូវីដ១៩។
ក្រសួងសុខាភិបាលបញ្ជាក់ថា ក្នុងព្រឹត្តិការណ៍៣វិច្ឆិកា ក្រសួងបានរកឃើញអ្នកប៉ះពាល់ផ្ទាល់និងប្រយោល សរុបចំនួន១ ៤២២នាក់ ក្នុងនោះមានអ្នកឆ្លងជំងឺកូវីដ១៩ ចំនួន៤នាក់ ប៉ុន្តែបានព្យាបាលជាសះស្បើយម្នាក់៕