ក្រសួងអប់រំ យុវជន និងកីឡា បានឱ្យដឹងថា រដ្ឋាភិបាលសម្រេចផ្ដល់ក្របខណ្ឌ៣ ៦០០កន្លែង ដល់ក្រសួង ដើម្បីប្រឡងជ្រើសរើសនិងបណ្តុះបណ្តាលគ្រូបង្រៀនសម្រាប់ឆ្នាំ២០២១។
ក្នុងលិខិតរបស់ក្រសួងអប់រំ ចុះថ្ងៃទី១៨ ខែវិច្ឆិកា ឆ្នាំ២០២០ បានលើកឡើងថា ដើម្បីបំពេញតម្រូវការគ្រូបង្រៀនគ្រប់ប្រភេទ ក្នុងក្របខណ្ឌនៅតាមអង្គភាពគ្រឹះស្ថានសិក្សាចំណេះទូទៅ គ្រឹះស្ថានអប់រំបច្ចេកទេស និងគ្រឹះស្ថានឧត្តមសិក្សាសាធារណៈ រដ្ឋាភិបាលសម្រេចផ្ដល់ក្របខណ្ឌ៣ ៦០០កន្លែង ដល់ក្រសួងអប់រំ ដើម្បីប្រឡងជ្រើសរើសនិងបណ្តុះបណ្តាលគ្រូបង្រៀន សម្រាប់ឆ្នាំ២០២១ខាងមុខនេះ។
ក្រសួងបន្តថា ក្របខណ្ឌទាំងនោះ រួមមាន ក្របខណ្ឌគ្រូបង្រៀនមត្តេយ្យសិក្សាចំនួន២០០កន្លែង, ក្របខណ្ឌគ្រូបង្រៀនកម្រិតបឋមសិក្សា ចំនួន១ ៥៥០កន្លែង, បណ្តុះបណ្តាលតាមរូបមន្ត (១២+២ ) ចំនួន១ ២៥០កន្លែង និងតាមរូបមន្ត (១២+៤) ចំនួន៣០០កន្លែង។
រីឯក្របខណ្ឌគ្រូបង្រៀនកម្រិតមូលដ្ឋាន ក្រសួងថា មានចំនួន៥០០កន្លែង រួមមាន ផ្នែកចំណេះទូទៅ បណ្តុះបណ្តាលតាមរូបមន្ត (១២+២) ចំនួន២៨០កន្លែង និងតាមរូបមន្ត (១២+៤) ចំនួន២០០កន្លែង, ផ្នែកអប់រំបំណិនជីវិត បណ្តុះបណ្តាលតាមរូបមន្ត (១២+២) ចំនួន២០កន្លែង។
ចំណែកឯក្របខណ្ឌគ្រូបង្រៀនកម្រិតមូលដ្ឋានអប់រំកាយនិងកីឡា ចំនួន១៥០កន្លែង, ក្របខណ្ឌគ្រូបង្រៀនកម្រិតឧត្តម (បង្រៀននៅវិទ្យាល័យ) ឯណោះវិញ មានចំនួន១ ១០០កន្លែង រួមទាំងវិទ្យាស្ថានជាតិអប់រំពិសេស ចំនួន១៥កន្លែង (ក្របខណ្ឌមន្ត្រីគ្រប់គ្រងរដ្ឋបាល មន្ត្រីក្រមការ និងលេខាធិការ)៕