ក្រសួងអប់រំ យុវជន និងកីឡា សម្រេចអនុញ្ញាតឱ្យដំណើរការគ្រឹះស្ថានសិក្សាសាធារណៈនិងឯកជននៅរាជធានីភ្នំពេញនិងទីរួមខេត្តកណ្តាល ព្រមទាំងការហាត់ប្រាណនិងលេងកីឡានៅក្នុងបរិវេណពហុកីឡដ្ឋានជាតិអូឡាំពិកឡើងវិញ។
សេចក្តីជូនដំណឹងរបស់ក្រសួងអប់រំ ចុះថ្ងៃទី១៩ ខែវិច្ឆិកា ឆ្នាំ២០២០ បានឱ្យដឹងថា ក្រោយពីព្រឹត្តិការណ៍៣វិច្ឆិកា ត្រូវបិទបញ្ចប់ ក្រសួងសម្រេចអនុញ្ញាតឱ្យគ្រឹះស្ថានសិក្សាសាធារណៈនិងឯកជននៅរាជធានីភ្នំពេញនិងទីរួមខេត្តកណ្តាល ដំណើរការឡើងវិញ ចាប់ពីថ្ងៃទី២៣ ខែវិច្ឆិកា ឆ្នាំ២០២០។
សេចក្តីជូនព័ត៌មាន បន្តថា ក្រសួងនៅតែរក្សាសម័យប្រឡងសញ្ញាបត្រមធ្យមសិក្សាបឋមភូមិ (ឌីប្លូម) នៅថ្ងៃទី៣០ ខែវិច្ឆិកា ឆ្នាំ២០២០ និងការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) នៅថ្ងៃទី២១ ខែធ្នូ ឆ្នាំ២០២០។
សេចក្តីជូនដំណឹងបន្ថែមថា គ្រឹះស្ថានសិក្សាសាធារណៈនិងឯកជនទាំងអស់ ត្រូវបន្តអនុវត្តគោលការណ៍ប្រតិបត្តិស្តង់ដារ (SOP) សម្រាប់ដំណើរការសាលារៀនឡើងវិញ ក្នុងបរិបទកូវីដ១៩ និងរក្សាគម្លាតសុវត្ថិភាពសង្គមនិងបុគ្គល ហើយក្នុងករណីចាំបាច់ ត្រូវពាក់ម៉ាស់ការពារ នៅក្នុងបរិវេណគ្រឹះស្ថានសិក្សា។
ជាមួយគ្នានេះ ក្រសួងអប់រំក៏បានអនុញ្ញាតឱ្យមានការហាត់ប្រាណ លេងកីឡា និងការចេញចូល បរិវេណពហុកីឡដ្ឋានជាតិអូឡាំពិក ចាប់ពីថ្ងៃទី១៩ ខែវិច្ឆិកានេះតទៅដែរ ដោយបន្តអនុវត្តនូវវិធានការសុវត្ថិភាព សុខភាព និងរក្សាគម្លាតសុវត្ថិភាពសង្គម។
កាលពីថ្ងៃទី០៨ ខែវិច្ឆិកា ឆ្នាំ២០២០ ក្រសួងអប់រំបានប្រកាសផ្អាកដំណើរការសាលារៀននៅរាជធានីភ្នំពេញនិងខេត្តកណ្តាល ដើម្បីទប់ស្កាត់ការឆ្លងរាលដាលនៃជំងឺកូវីដ១៩ ក្រោយមានអ្នកឆ្លងជំងឺកូវីដ១៩ ក្នុងព្រឹត្តិការណ៍៣វិច្ឆិកា ចំនួន៤នាក់ និងមានអ្នកប៉ះពាល់ផ្ទាល់និងប្រយោលជាង១ ៤០០នាក់៕
