រដ្ឋាភិបាលបានចេញសេក្តីសម្រេចតែងតាំងសមាសភាពគណៈកម្មាធិការជាតិដោះស្រាយបញ្ហាជនអនាថា ខណៈក្រសួងថា ជនអនាថាមួយចំនួននៅតែមិនទទួលយកសេវាផ្គត់ផ្គង់របស់រដ្ឋ។
សេចក្តីសម្រេចរបស់នាយករដ្ឋមន្ត្រី ហ៊ុន សែន ចុះថ្ងៃទី១៧ ខែវិច្ឆិកា សមាជិកគណៈកម្មាធិការនេះមាន១៧រូប ក្នុងនោះ រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ជាប្រធាន។
អ្នកនាំពាក្យក្រសួងសង្គមកិច្ច លោក តូច ចាន់នី មានប្រសាសន៍ថា គណៈកម្មាធិការនេះបានបង្កើតយូរឆ្នាំហើយសម្រាប់ដោះស្រាយបញ្ហាជនអនាថា ប៉ុន្តែសេចក្តីសម្រេចថ្មីរបស់រដ្ឋាភិបាល ជាការផ្លាស់ប្តូរសមាសភាពសមាជិកមួយចំនួនប៉ុណ្ណោះ។
លោកនិយាយទៀតថា ការគ្រប់គ្រងនិងដោះស្រាយបញ្ហាជនអនាថាបច្ចុប្បន្ននៅតែប្រឈម ដោយលោកថា ជនអនាថាទាំងនោះមិនទទួលយកសេវាឧបត្ថម្ភរបស់រដ្ឋទេ ពិសេសអ្នកសុំទាន បើទោះបីជាមានការអះអាងថា ចំនួននេះមានការធ្លាក់ចុះបន្តិចក៏ដោយ។
លោក តូច ចាន់នី ប្រាប់ថា៖ «តាមការស្រាវជ្រាវរបស់ខ្ញុំ គឺថា ក្នុង១ថ្ងៃ គាត់រកលុយបានពី៥ម៉ឺន ទៅ៧ម៉ឺនរៀល។ អ៊ីចឹង បើយើងយកដាក់ក្នុងមណ្ឌល គាត់បានតែរបបហូបចុក ការថែទាំងសុខភាព ការគ្រប់គ្រងអីល្អអ៊ីចឹង គាត់អត់ចង់ទេ។ គាត់ចង់មករកក្រៅ មករកលុយ។ អ្នកខ្លះគាត់រកលុយចិញ្ចឹមគ្រួសារគាត់ យកអាហ្នឹងជាមុខរបរ»។
មន្ត្រីរូបនេះនិយាយទៀតថា ការជួញដូរកុមារជាផលលំបាកដែរ ដោយថា ជនទុច្ចរិតមួយចំនួននៅតែប្រើប្រាស់កុមារឱ្យលក់ដូរតាមហាង ដើម្បីជាផលចំណេញរបស់ខ្លួន និងខ្លះទៀតបណ្តុះបណ្តាលមុខរបរខ្នាតតូច ចំណាយលុយទិញធុងទឹកអំពៅឱ្យលក់ ដូចបានតែ១ខែឬពីរខែ លក់ទាំងសម្ភារ ឈប់នៅក្នុងមណ្ឌលទៀត។
នាយករងអង្គការឃ្លាំមើលសិទ្ធិមនុស្សលីកាដូ លោក អំ សំអាត មានប្រសាសន៍ថា តាមការអង្កេត ជនអនាថាសុំទាននៅតាមដងផ្លូវ ហាក់មិនថយចុះទេ ដែលថា រដ្ឋាភិបាលគួរពង្រឹងប្រសិទ្ធភាពដោះស្រាយបញ្ហានេះ បើទោះបីលោកថា បញ្ហានេះនៅជួបការលំបាកក៏ដោយ។
លោក អំ សំអាត ប្រាប់ថា៖ «បើសិនជាគាត់គ្មានដី គ្មានកន្លែងរស់នៅទេ គួរគិតពីដីសម្បទានសង្គមកិច្ចសម្រាប់ពួកគាត់។ សំខាន់ឱ្យមានមុខរបរ អាហ្នឹងបានអាចធានា។ បើមិនអ៊ីចឹងទេ ខ្ញុំគិតថា ដូចជាការវែកចកអ៊ីចឹង»។
មន្ត្រីឃ្លាំមើលសិទ្ធិមនុស្សរូបនេះនិយាយថា មណ្ឌលដែលរដ្ឋាភិបាលប្រមូលជនអនាថាទៅដាក់ គួរធានាពីអាហារហូបចុកសមរម្យ ការស្នាក់នៅមានអនាម័យ ការថែទាំសុខភាព បណ្តុះបណ្តាលជំនាញ មិនត្រូវបង្ខាំងមនុស្សទាំងបង្ខំ ជាដើម។
តាមអ្នកនាំពាក្យក្រសួងសង្គមកិច្ច គិតត្រឹមដើមឆ្នាំ២០២០ មានជនអនាថា ៣ ៧៨៤នាក់ ប៉ុន្តែលោកថា ចាប់ពីខែមិថុនា ចំនួនជនអនាថាបានថយចុះ ខណៈរដ្ឋាភិបាលផ្តល់សាច់ប្រាក់ឱ្យជនក្រីក្រនៅទូទាំងប្រទេស និងបិទពិធីបុណ្យជាតិធំៗដូចជាពិធីបុណ្យអុំទូក ជាដើម៕