ក្រសួងពាណិជ្ជកម្ម ព្រមានចាត់វិធានការផ្លូវច្បាប់ចំពោះដេប៉ូសាំងទាំងឡាយណាដែលរកឃើញថា លក់មិនគ្រប់លីត្រនិងមិនអនុលោមទៅតាមស្តង់ដារគុណភាព។
ការព្រមានរបស់ក្រសួងពាណិជ្ជកម្មនេះ ធ្វើឡើងក្រោយមន្ត្រីជំនាញនៃក្រសួងនេះបានរកឃើញជាបន្តបន្ទាប់នៅដេប៉ូលក់សាំងមួយចំនួនថា បានលក់សាំងទៅឱ្យអតិថិជនមិនគ្រប់លីត្រនិងមិនមានគុណភាព។
កាលពីថ្ងៃទី១៨ ខែវិច្ឆិកា ឆ្នាំ២០២០ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) នៃក្រសួងពាណិជ្ជកម្ម បានចុះត្រួតពិនិត្យតាមបណ្តាស្ថានីយនិងដេប៉ូចែកចាយប្រេងឥន្ធនៈចំនួន៣៥កន្លែង ស្ថិតតាមបណ្តោយផ្លូវលេខ២១ ក្នុងស្រុកស្អាង ខេត្តកណ្តាល។
ក្រសួងពាណិជ្ជកម្មឱ្យដឹងថា ក្រោយការត្រួតពិនិត្យរួច មន្ត្រីជំនាញបានរកឃើញស្ថានីយឬដេប៉ូចែកចាយប្រេងឥន្ធនៈចំនួន៥ទីតាំង មិនបានអនុលោមភាពទាំងផ្នែកគុណភាពនិងបរិមាណ និងស្ថានីយឬដេប៉ូចំនួន៣ទីតាំង មិនបានអនុលោមភាពផ្នែកបរិមាណ ខណៈមួយទីតាំងទៀតមិនអនុលោមភាពផ្នែកគុណភាព។
ក្រសួងពាណិជ្ជកម្ម បន្ថែមថា ក្រោយរកឃើញភាពមិនប្រក្រតីបែបនេះ មន្ត្រីជំនាញបានឱ្យម្ចាស់ស្ថានីយឬដេប៉ូទាំងនោះធ្វើកិច្ចសន្យាកែតម្រូវវិញ និងព្រមានថា ប្រសិនបើរកឃើញមានកំហុសលើកទី២ មន្ត្រីជំនាញនឹងកសាងសំណុំរឿងបញ្ជូនទៅតុលាការ។
អគ្គនាយក នៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ លោក ផាន អូន ប្រាប់វីអូឌី នៅថ្ងៃសុក្រនេះថា កន្លងមក មន្ត្រីជំនាញ ក.ប.ប បានរកឃើញច្រើនដែរ តែលោកមិនចាំតួលេខនូវស្ថានីយនិងដេប៉ូចែកចាយប្រេងឥន្ធនៈតាមបណ្តារាជធានី-ខេត្តមួយចំនួនដែលមានភាពមិនប្រក្រតីនេះទេ។
លោក ផាន អូន អះអាងថា កន្លងមក ក.ប.ប ធ្លាប់បានប្តឹងម្ចាស់ស្ថានីយនិងដេប៉ូចែកចាយប្រេងឥន្ធនៈមួយចំនួនទៅតុលាការផងដែរ ដូចជានៅខេត្តកណ្តាល តាកែវ និងបណ្តាខេត្តមួយចំនួនទៀត ដោយសារពួកគេមិនគោរពតាមកិច្ចសន្យានិងការណែនាំរបស់មន្ត្រីជំនាញ។
លោកបន្ថែមថា៖ «ហើយយើងក៏បានភ្ជាប់និងផ្សព្វផ្សាយម្ចាស់ Brand ធំៗ ឱ្យគាត់ផ្សព្វផ្សាយទៅដល់ដេប៉ូឬស្ថានីយទូទាំងប្រទេសអំពីការអនុវត្តច្បាប់។ ឥលូវនេះ យើងមិនទាន់អនុវត្តវិធានការតឹងរ៉ឹង ដោយសារយើងកំពុងចុះផ្សព្វផ្សាយតាមបណ្តារាជធានី-ខេត្តហ្នឹង វាបានប្រហែលជិត១០រាជធានី-ខេត្តហើយ ហើយគោលដៅយើងគឺខែ១២ ត្រូវផ្សព្វផ្សាយឱ្យអស់ រួចហើយយើងចាប់ផ្តើមអនុវត្តច្បាប់ស្តីពីកិច្ចការពារនិងប្រើប្រាស់ ដែលអាចនឹងមានការពិន័យអន្តរកាលនិងមាននីតិវិធីឡើងទៅតុលាការជាដើម»។
ពលរដ្ឋអ្នកធ្វើដំណើរដោយម៉ូតូម្នាក់ លោក អ៊ូច សុជា ហាក់មិនមានជំនឿលើវិធានការរបស់ក្រសួងពាណិជ្ជកម្ម ចំពោះស្ថានីយឬដេប៉ូចែកចាយប្រេងឥន្ទនៈដែលគ្មានគុណភាពនិងមិនគ្រប់ចំនួននេះទេ។
លោកលើកឡើងថា កន្លងមក លោកសង្កេតឃើញមន្ត្រីជំនាញនៃក្រសួងពាណិជ្ជកម្ម បានចុះពិនិត្យកន្លែងចែកចាយប្រេងឥន្ធនៈ ដោយរកឃើញភាពមិនប្រក្រតីជាច្រើន និងបានព្រមានចាត់វិធានការជាច្រើនដងផងដែរ ប៉ុន្តែបញ្ហានេះនៅតែកើតមានដដែល។
លោកបន្ថែមថា៖ «ថ្ងៃមុន ដូចជាមានការផាកពិន័យលើស្ថានីយមួយចំនួនអស់ប៉ុន្មានលានៗរៀលអីចឹង ហើយស្ថានីយខ្លះបានផាករហូតទៅដល់២ទៅ៣ដងទៀត អ៊ីចឹងដូចជានៅដដែលៗ។ ហើយលើកក្រោយ ឃើញបាត់លីត្រដដែលទៀត។ អ៊ីចឹងខ្ញុំអត់ដឹងថា តើប្រសិទ្ធភាពនៃការព្រមានឬចាត់វិធានការរបស់ក្រសួងពាណិជ្ជកម្មបានកម្រិតណាទេ ព្រោះឃើញតែប្រកាសចាត់វិធានការ ប៉ុន្តែប្រសិទ្ធភាពហាក់បីដូចជាមិនមានអីប្រែប្រួល»។
ពលរដ្ឋអ្នកធ្វើដំណើរដោយរថយន្ត អ្នកស្រី លឹម ធីតា និយាយថា ការដែលម្ចាស់ស្ថានីយឬដេប៉ូ លក់ប្រេងសាំងមិនគ្រប់ចំនួននិងគ្មានគុណភាព នឹងធ្វើឱ្យប្រជាពលរដ្ឋខាតបង់ថវិកានិងប៉ះពាល់ដល់គ្រឿងម៉ាស៊ីនយានយន្តរបស់ពួកគាត់។
អ្នកស្រីបន្តថា ពលរដ្ឋមិនអាចមើលដឹងថា សាំងដែលម្ចាស់ស្ថានីយឬដេប៉ូនីមួយៗលក់នោះ គ្រប់ចំនួនឬក៏អត់ទេ ដោយសារពុំមានអ្វីវាស់ជាក់លាក់។ អ្នកស្រីថា កន្លងមក អ្នកស្រីធ្លាប់ទទួលបានសាំងមិនគ្រប់ ខណៈដែលអ្នកស្រីបានយកឡានទៅចាក់សាំងចំនួន២០ដុល្លារនៅស្ថានីយមួយកន្លែងក្នុងរាជធានីភ្នំពេញ។
អ្នកស្រីបន្ថែមថា៖ «បើគ្រាន់តែបំបាត់ចំនួន វាគ្រាន់តែយើងខាតលុយខាតកាក់ទេ ប៉ុន្តែដល់ពេលយកសារធាតុផ្សេងៗទៅលាយក្នុងប្រេងឥន្ធនៈអ៊ីចឹង វាធ្វើឱ្យខូចខាតម៉ាស៊ីនរថយន្តរបស់យើងថែមទៀត អាហ្នឹងវាខូចធំតែម្តង អ៊ីចឹងសំណូមពរថា ធ្វើយ៉ាងម៉េចក៏ដោយ ឱ្យវាមានការរឹតបន្ដឹងបញ្ហាហ្នឹង ឱ្យមានគោលការណ៍ច្បាស់លាស់ ថាតើប្រជាពលរដ្ឋគាត់ធ្វើម៉េចដឹងថា សាំងហ្នឹងគ្រប់ឬមិនគ្រប់ មានអីយកទៅវាស់ ហើយធ្វើម៉េចធានាថា ស្ថានីយឬដេប៉ូហ្នឹង គាត់លក់សាំងសុទ្ធត្រឹមត្រូវ»។
មន្ត្រីកម្មវិធីនៅមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្ដិភាព លោក ហេង គីមហុង មានប្រសាសន៍ថា ក្រសួងពាណិជ្ជកម្ម គួរតែចាត់វិធានការច្បាប់តែម្តងចំពោះម្ចាស់ស្ថានីយឬដេប៉ូទាំងឡាយណាដែលបានចែកចាយប្រេងឥន្ធនៈមិនគ្រប់លីត្រនិងគ្មានគុណភាពនេះ ដើម្បីកុំឱ្យប្រជាពលរដ្ឋបន្តខាតបង់ផលប្រយោជន៍។
កន្លងមក លោកធ្លាប់ឃើញមន្ត្រីជំនាញរបស់ក្រសួង បានផ្សព្វផ្សាយនិងព្រមានច្រើនដងហើយពាក់ព័ន្ធបញ្ហានេះ ប៉ុន្តែម្ចាស់ស្ថានីយឬដេប៉ូមួយចំនួននៅតែមិនអនុវត្ត ដែលលោកបានដាក់ការសង្ស័យថា អាចជាប់ពាក់ព័ន្ធអំពើពុករលួយណាមួយរវាងមន្ត្រីចុះត្រួតពិនិត្យនិងម្ចាស់ស្ថានីយឬដេប៉ូនោះ។
លោកបន្ថែមថា៖ «ការព្រមាននេះឬការផ្តល់ព័ត៌មាននេះ គឺបានធ្វើយូរណាស់មកហើយបើតាមខ្ញុំដឹង អ៊ីចឹងមកដល់ដំណាក់កាលនេះ រដ្ឋាភិបាល ជាពិសេសក្រសួងពាណិជ្ជកម្ម គួរតែចាប់ផ្តើមអនុវត្តច្បាប់ ទើបធ្វើឱ្យឈ្មួញទុច្ចរិតទាំងអស់ហ្នឹង គាត់អាចប្តូរឥរិយាបថពីការកេងប្រវ័ញ្ចនៃការលក់ផលិតផលគ្មានគុណភាពហ្នឹងបាន»៕
