មន្ត្រីជាន់ខ្ពស់ក្រសួងអប់រំ ឱ្យដឹងថា ការបើកដំណើរការគ្រឹះស្ថានសិក្សានៅរាជធានីភ្នំពេញនិងទីរួមខេត្តកណ្តាលឡើងវិញ នៅថ្ងៃនេះ បានប្រព្រឹត្តទៅដោយរលូននិងមានការអនុវត្តវិធានការសុវត្ថិភាពសុខភាពបានយ៉ាងខ្ជាប់ខ្ជួន។
អ្នកនាំពាក្យក្រសួងអបរំ យុវជន និងកីឡា លោក រស់ សុវាចា មានប្រសាសន៍នៅថ្ងៃទី២៣ ខែវិច្ឆិកា ឆ្នាំ២០២០នេះថា ការបើកដំណើរការគ្រឹះស្ថានសិក្សានៅរាជធានីភ្នំពេញនិងទីរួមខេត្តកណ្តាល ក្រោយការបិទបញ្ចប់ព្រឹត្តិការណ៍៣វិច្ឆិកា បានប្រព្រឹត្តទៅដោយមានភាពរលូនតាមការគ្រោងទុក ប្រកបដោយការអនុវត្តយ៉ាងខ្ជាប់ខ្ជួននូវវិធានការសុវត្ថិភាពសុខភាព តាមគោលការណ៍ប្រតិបត្តិស្តង់ដាររបស់ក្រសួងអប់រំដែលបានដាក់ចេញកន្លងមក។
លោកបន្តថា៖ «ក្រសួងអប់រំសូមអំពាវនាវដល់បុគ្គលិកអប់រំ គណៈគ្រប់គ្រងគ្រឹះស្ថានសិក្សាសាធារណៈនិងឯកជន លោកគ្រូ អ្នកគ្រូ សិស្សានុសិស្ស និងគ្រប់ភាគីពាក់ព័ន្ធ សូមបន្តអនុវត្តគោលការណ៍ប្រតិបត្តិស្ដង់ដាររបស់ក្រសួងអប់រំ យុវជន និងកីឡា ចុះថ្ងៃទី០៤ ខែសីហា ឆ្នាំ២០២០ និងតាមការណែនាំរបស់ក្រសួងសុខាភិបាលឱ្យមានប្រសិទ្ធភាពខ្ពស់បំផុត»។
លោកក៏បានអំពាវនាវដល់សិស្សានុសិស្សនិងបេក្ខជនប្រឡង បន្តរៀនសូត្រតាមបែបចម្រុះ រួមមាន រៀនក្នុងថ្នាក់ផង រៀនតាមអនឡាញផង អមដោយក្រដាសកិច្ចការជំនួយនិងសៀវភៅសិក្សាគោល ជាពិសេសបន្តអនុវត្តនូវវិធានការសុវត្ថិភាពសុខភាពសិក្សា។
កាលពីថ្ងៃទី០៨ ខែវិច្ឆិកា រាជរដ្ឋាភិបាលបានសម្រេចផ្អាកដំណើរការគ្រឹះស្ថានសិក្សាសាធារណៈនិងឯកជន នៅរាជធានីភ្នំពេញនិងទីរួមខេត្តកណ្តាល ជាបណ្តោះអាសន្នរយៈពេល២សប្តាហ៍ ក្រោយពីមានករណីឆ្លងជំងឺកូវីដ១៩ លើមនុស្ស៤នាក់ដែលប៉ះពាល់រដ្ឋមន្ត្រីក្រសួងការបរទេសហុងគ្រី នៅពេលដែលលោកបំពេញទស្សនកិច្ចនៅកម្ពុជាជាផ្លូវការ កាលពីថ្ងៃទី៣ ខែវិច្ឆិកា។
ទោះយ៉ាងណា រាជរដ្ឋាភិបាលបានប្រកាសបិទបញ្ចប់ព្រឹត្តិការណ៍៣វិច្ឆិកា កាលថ្ងៃទី១៩ ខែវិច្ឆិកា និងសម្រេចបើកដំណើរការសាលារៀននៅរាជធានីភ្នំពេញនិងទីរួមខេត្តកណ្តាលវិញនៅថ្ងៃនេះ ក្រោយពីកម្ពុជាបានទប់ស្កាត់ការឆ្លងរាលដាលជំងឺកូវីដ១៩ ក្នុងព្រឹត្តការណ៍៣វិច្ឆិកានេះដោយជោគជ័យ៕