លោកនាយករដ្ឋមន្ត្រី ហ៊ុន សែន សម្រេចកាត់ផ្ទៃដីជាង៤៤ហិកតា ស្ថិតក្នុងដែនគម្របព្រៃឈើ ២០០២ នៅខេត្តព្រះសីហនុ ឱ្យកូនស្រីរបស់លោកចំនួន២នាក់និងមន្ត្រីមួយចំនួនទៀត ដើម្បីកាន់កាប់ជាកម្មសិទ្ធិ ប៉ុន្តែមន្ត្រីរដ្ឋាភិបាលថា ដីនោះសាច់ញាតិនាយករដ្ឋមន្ត្រីកាន់កាប់យូរឆ្នាំមកហើយ។
យោងតាមអនុក្រឹត្យ ចុះថ្ងៃទី១៧ ខែកក្កដា ឆ្នាំ២០២០ លោកនាយករដ្ឋមន្ត្រី ហ៊ុន សែន បានសម្រេចកាត់ដីទំហំ៤៤ហិកតា ៣៩អា និង៩១សង់ទីអា ស្ថិតក្នុងដែនគម្របព្រៃឈើ ២០០២ នៅភូមិចំណោតរាម ឃុំបិតត្រាំង ស្រុកព្រៃនប់ ខេត្តព្រះសីហនុ ប្រគល់ឱ្យទៅប្រធាននាយកដ្ឋាននគរបាលការពារនៃអគ្គស្នងការដ្ឋាននគរបាលជាតិ លោក ជុំ សាវុឌ្ឍ និងលោកស្រី ញឹម យន់ស្រ៊ីម ជាភរិយា, លោកស្រី ម៉ុក ប៉ូប៉ុនរិទ្ធ ជាភរិយាលោក ពេជ សោភ័ន រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ, លោកស្រី ហ៊ុន ម៉ាណា និងលោកស្រី ហ៊ុន ម៉ាលី កូនស្រីរបស់លោកនាយករដ្ឋមន្ត្រី ហ៊ុន សែន។
ប្រធានអង្គភាពអ្នកនាំពាក្យរាជរដ្ឋាភិបាល លោក ផៃ ស៊ីផាន មានប្រសាសន៍នៅថ្ងៃចន្ទនេះថា ការកាត់ឆ្វៀលដីនេះ ដោយសារពួកគាត់បានកាន់កាប់និងអាស្រ័យផលនៅទីតាំងដីនោះជាយូរឆ្នាំហើយ។
លោកបានថ្លែងថា៖ «អាហ្នឹងជាកម្មសិទ្ធិឯកជន មិនថាអ្នកហ្នឹងជាអ្នកណា ជាប់ត្រកូលណា ជាប់សែស្រឡាយណាទេ អ្វីដែលជាការឆ្វៀលហ្នឹង ឆ្លើយតបនឹងការកាន់កាប់ជាក់ស្ដែងអាស្រ័យផលនៅកន្លែងជាគោលការណ៍ ពីព្រោះអត់បាននិន្នាការដីហ្នឹង ត្រូវតែបានទៅអ្នកមានឬបានទៅអ្នកក្រ មិនមែនអ៊ីចឹងទេ នេះជាគោលការណ៍ គឺឈរទៅលើមូលដ្ឋានគ្រឹះនៃការកាន់កាប់ជាក់ស្ដែងនៅកន្លែងនោះ»។
រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន សុំមិនធ្វើអត្ថាធិប្បាយដោយលោកបង្វែរសំណួរនេះឱ្យទៅសួរក្រសួងដែនដីវិញ។
លោកបានថ្លែងថា៖ «គួរតែសួរទៅក្រសួងរៀបចំដែន នគរូបនីយកម្ម និងសំណង់ ព្រោះគាត់ជាអ្នករៀបចំអនុក្រឹត្យស្នើសុំទៅសម្ដេចផ្ទាល់»។
រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា បដិសេធអត្ថាធិប្បាយចំពោះករណីនេះ។
ចំណែកលោក មាជ ចាន់ មេឃុំបិតត្រាំង នៃស្រុកព្រៃនប់ មានប្រសាសន៍ថា ដីដែលលោកនាយករដ្ឋមន្ត្រី ហ៊ុន សែន កាត់ឱ្យកូនស្រីរបស់លោកនិងមន្ត្រីមួយចំនួនទៀតនោះ ដោយសារ ពួកគាត់បានកាន់កាប់ដីនោះជាយូរឆ្នាំហើយ។
នាយកប្រតិបត្តិអង្គការតម្លាភាពកម្ពុជា លោក ប៉ិច ពិសី មានប្រសាសន៍ថា រដ្ឋាភិបាលគួរតែធ្វើការបង្ហាញនិងផ្ដល់ព័ត៌មានដល់ប្រជាពលរដ្ឋឱ្យបានដឹង មុននឹងកាត់ឆ្វៀលដីប្រគល់ទៅឱ្យក្រុមហ៊ុនឯកជននិងបុគ្គលិកណាម្នាក់ធ្វើជាកម្មសិទ្ធិ។ ក្រៅពីជូនដំណឹង លោកថា រដ្ឋាភិបាលក៏គួរបញ្ជាក់ឱ្យច្បាស់ថា ដីដែលកាត់នោះមានដោះដូរពីកន្លែងផ្សេងឬអត់។
លោកថា៖ «ពលរដ្ឋគាត់អាចមានចម្ងល់ហើយមានចំណោទសួរពីភាពមិនប្រក្រតីផ្សេងៗ ពាក់ព័ន្ធនឹងការផ្ដល់កម្មសិទ្ធិហ្នឹង អ៊ីចឹងទាមទារឱ្យមានការផ្សព្វផ្សាយឱ្យបានទូលំទូលាយអំពីការផ្ដល់សិទ្ធិដែលជាសម្បត្តិសាធារណៈទៅជាសម្បត្តិឯកជនហ្នឹង គឺឱ្យមានការបើកទូលាយព័ត៌មាន ជាពិសេសឱ្យពលរដ្ឋគាត់នៅតំបន់នោះបានដឹង។ កាលណាយើងផ្ដល់កម្មសិទ្ធិពីដីឬតំបន់សាធារណៈទៅឯកជន បើយើងមិនផ្សព្វផ្សាយ មិនឱ្យពលរដ្ឋដឹង មិនឱ្យពលរដ្ឋចូលរួមគាត់នឹងធ្វើការប៉ាន់ស្មានដោយការយល់ឃើញរបស់គាត់ ហើយអាចមានមន្ទិលសង្ស័យពីការផ្ដល់សិទ្ធិហ្នឹង»។
កាលពីថ្ងៃទី៩ ខែមិថុនា ឆ្នាំ២០២០ រដ្ឋាភិបាលក៏បានចេញអនុក្រឹត្យសម្រេចកាត់ដីទំហំ៦០០ហិកតា ពីដែនព្រៃលិចទឹក និងគម្របព្រៃឈើឆ្នាំ២០០២ ស្ថិតក្នុងឃុំរាម និងឃុំបិតត្រាំង ស្រុកព្រៃនប់ ខេត្តព្រះសីហនុ មកធ្វើអនុប្រយោគជាដីឯកជនរបស់រដ្ឋទៅឱ្យឧកញ៉ាពីររូប ដើម្បីធ្វើការអភិវឌ្ឍផងដែរ៕
