មន្ត្រីជាន់ខ្ពស់ក្រសួងអភិវឌ្ឍន៍ជនបទ ឱ្យដឹងថា ក្រសួងត្រូវការថវិកាប្រមាណ៩១លានដុល្លារ ដើម្បីប្រើប្រាស់សម្រាប់ជួសជុលហេដ្ឋារចនាសម្ព័ន្ធផ្លូវថ្នល់ជនបទឡើងវិញ បន្ទាប់ពីកម្ពុជារងគ្រោះដោយសារជំនន់ទឹកភ្លៀង។
ការលើកឡើងរបស់មន្ត្រីរដ្ឋាភិបាលរូបនេះ ធ្វើឡើងក្នុងសន្និសីទសារព័ត៌មាននៅទីស្តីការគណៈរដ្ឋមន្ត្រី នៅថ្ងៃនេះ ក្រោមប្រធានបទ «យុទ្ធសាស្រ្តកែលម្អការខូចខាតដែលរងផលប៉ះពាល់ដោយសារគ្រោះទឹកជំនន់ ក្នុងវិស័យអភិវឌ្ឍន៍ជនបទ»។
រដ្ឋលេខាធិការ និងជាអ្នកនំាពាក្យក្រសួងអភិវឌ្ឍន៍ជនបទ លោក ចាន់ ដារ៉ុង មានប្រសាសន៍ថា តាមការវាយតម្លៃពីផលប៉ះពាល់ដោយទឹកជំនន់ ត្រឹមថ្ងៃទី១៧ ខែវិច្ឆិកានេះ ផ្លូវជនបទចំនួន៦៥៩ខែ្ស ស្មើនឹងជាង៥ ៣២៩គីឡូម៉ែត្រ បានរងផលប៉ះពាល់ដោយជំនន់ទឹកភ្លៀង ក្នុងនោះ ផ្លូវប្រវែងជាង៣ពាន់គីឡូម៉ែត្រ បានរងនូវការខូចខាតក្រោយទឹកស្រក។
លោកបញ្ជាក់ថា៖ «ទំហំនៃការខូចខាតទាំងអស់ហ្នឹង ទាំង ៣ ១៥៤,៤២ គីឡូម៉ែតហ្នឹង យើងត្រូវការថវិកាប៉ុន្មាន ជាបឋមការប៉ាន់ស្មាន គឺយើងត្រូវការថវិកាប្រមាណជា៩១លានដុល្លារសហរដ្ឋអាមេរិក»។
មន្ត្រីរដ្ឋាភិបាលរូបនេះ បន្តទៀតថា ក្រសួងក៏នឹងសិក្សាពីលទ្ធភាពបន្ថែម ដោយការរៀបចំដាក់ប្រព័ន្ធលូបន្ថែម លើកផ្លូវឱ្យខ្ពស់ជាងមុន ក្រាលកៅស៊ូពីរជាន់ និងដាំដើមឈើជាដើម ដើម្បីធានាថា ផ្លូវទាំងនោះនឹងមិនត្រូវបានទឹកហូរច្រោះនាំឱ្យខូចខាតទៀត ពេលមានគ្រោះទឹកជំនន់នៅពេលក្រោយ។
លោកថា៖ «អ៊ីចឹងយើងត្រូវគិតមើលថា តើយើងអាចដាំដើមឈើប្រភេទណាដែលអាចកាត់បន្ថយផលប៉ះពាល់ដោយសារទឹកជំនន់ ឬក៏យើងដាំស្មៅប្រភេទណាមួយនៅតាមជើងទេរ ដើម្បីទប់ស្កាត់ការហូរច្រោះ»។
បើតាមលោក ចាន់ ដារ៉ុង ក្នុងចំណោម២៥រាជធានី-ខេត្ត ក្រសួងរកឃើញថា មានខេត្តចំនួន៩ ដែលរងផលប៉ះពាល់ធ្ងន់ជាងគេ ក្នុងនោះ រួមមាន ខេត្តបន្ទាយមានជ័យ ពោធិ៍សាត់ បាត់ដំបង កំពង់ស្ពឺ សៀមរាប ប៉ៃលិន កណ្ដាល កំពង់ឆ្នាំង និងឧត្តរមានជ័យ។ ប៉ុន្ដែលោកថា ក្នុងចំណោមខេត្តទាំង៩នោះ មានខេត្តចំនួន៣ គឺខេត្តបន្ទាយមានជ័យ ពោធិ៍សាត់ និងបាត់ដំបង ដែលត្រូវផ្តល់អាទិភាពមុនគេសម្រាប់ការជួសជុលឡើងវិញ។
កសិករនៅឃុំអូរតាគី ស្រុកថ្មគោល ខេត្តបាត់ដំបង លោក ភាគ ភ័ណ្ឌ និយាយថា ផ្លូវជាច្រើនខ្សែនៅក្នុងតំបន់ដែលលោករស់នៅ បានរងការខូចខាតដោយជំនន់ទឹកភ្លៀង និងមិនទាន់មានការជួសជុលឡើងវិញ ដែលធ្វើឱ្យប្រជាកសិករជួបការលំបាកក្នុងការប្រមូលផលស្រូវនិងដឹកជញ្ជូន ខណៈក្រុមឈ្មួញបានឆ្លៀតឱកាសដំឡើងថ្លៃដឹកជញ្ជូននិងតម្លៃស្រូវ។
លោកថា៖ «ផ្លូវយើងវាលិចទឹក ដល់លិចអ៊ីចឹងទៅ ប្រជាពលរដ្ឋយើងបានភោគផលបន្តិចបន្តួច គេមកដឹកទៅ លំបាក គេតម្លៃថ្លៃ សំណូមពរឱ្យរដ្ឋាភិបាលជួលធ្វើផ្លូវឱ្យបានលឿន ដើម្បីឱ្យប្រជាពលរដ្ឋដឹកភោគផលឱ្យបានស្រួល»។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ មានប្រសាសន៍ថា ដើម្បីឱ្យផ្លូវមានគុណភាពនិងមិនចំណាយលុយជាតិខ្ជះខ្ជាយ រដ្ឋាភិបាលត្រូវពិនិត្យឡើងវិញ ពីនីតិវិធីដេញថ្លៃសម្រាប់ការសាងសង់ និងត្រូវបើកចំហឱ្យមានការចូលរួមតាមដានជាសាធារណៈពីប្រជាពលរដ្ឋនិងអង្គការសង្គមស៊ីវិល ដើម្បីតម្លាភាព។
លោកថា៖ «ផ្លូវទាំងឡាយហ្នឹង មុននឹងធ្វើ គេត្រូវបង្ហាញពីតម្លៃរបស់ផ្លូវ ឱ្យសាធារណជនបានដឹង ចូលរួមតាមដាន ហើយនឹងរៀបចំវិធីបង្ការ»។
អង្គការតម្លាភាពអន្តរជាតិ កាលពីឆ្នាំ២០១៩ បានចាត់ថ្នាក់កម្ពុជាក្នុងស្ថានភាពអាក្រក់ជាងមុននៃអំពើពុករលួយ ហើយបើប្រៀបធៀបជាមួយប្រទេសទាំង១០នៅក្នុងតំបន់អាស៊ាន កម្ពុជាពុករលួយខ្លាំងជាងគេ។
គណៈកម្មាធិការជាតិគ្រប់គ្រងគ្រោះមហន្តរាយ ឱ្យដឹងនាពេលថ្មីៗនេះថា ជំនន់ទឹកភ្លៀងសម្រាប់ឆ្នាំ២០២០ ចាប់ពីថ្ងៃទី១ ខែកញ្ញា ដល់ថ្ងៃទី២៧ ខែតុលា បានប៉ះពាល់ដល់២០រាជធានី-ខេត្ត ក្នុងនោះ ប៉ះពាល់ដល់ប្រជាពលរដ្ឋចំនួន១៤៩ ៨៥៧គ្រួសារ បណ្តាលឱ្យមនុស្សស្លាប់៤៥នាក់ ប៉ះពាល់ផ្ទះជាង១សែនខ្នង រួមនិងហេដ្ឋារចនាសម្ព័ន្ធជាច្រើនទៀត៕
