មជ្ឈមណ្ឌលសិទ្ធិមនុស្សកម្ពុជា (CCHR) ជំរុញដល់រដ្ឋាភិបាលពង្រឹងនីតិរដ្ឋ ដើម្បីបញ្ចប់អំពើហិង្សាលើស្ត្រី ខណៈអង្គការនេះសង្កេតឃើញស្តី្រនៅតែរងអំពើហិង្សាច្រើនរូបភាពពីបុរស។
ការជំរុញនេះ បានធ្វើឡើងស្របពេលដែលអង្គការសង្គមស៊ីវិលដែលធ្វើការផ្នែកស្រ្តីធ្វើយុទ្ធនាការ ស្តីពី «សកម្មភាព១៦ថ្ងៃ ដើម្បីបញ្ចប់អំពើហិង្សាទាក់ទងនឹងយេនឌ័រ» ដែលយុទ្ធនាការនេះចាប់ផ្តើមពីថ្ងៃពុធនេះ ដល់ទិវាសិទ្ធិមនុស្សថ្ងៃទី១០ ខែធ្នូ ឆ្នាំ២០២០។
អង្គការមួយនេះ បាននិយាយក្នុងសេចក្តីប្រកាសព័ត៌មាន នៅថ្ងៃទី២៤ ខែវិច្ឆិកា ឆ្នាំ២០២០ ថា យុទ្ធនាការ១៦ថ្ងៃនេះ ធ្វើឡើងដើម្បីលើកកម្ពស់ការយល់ដឹងអំពីស្ត្រី និងផលប៉ះពាល់នៃអំពើហិង្សាទាក់ទងនឹងយេនឌ័រនៅក្នុងសហគមន៍ និងអំពាវនាវដល់រដ្ឋាភិបាល ចាត់វិធានការឱ្យបានច្បាស់លាស់ និងទាន់ពេលវេលា ដើម្បីបញ្ចប់អំពើហិង្សាទាក់ទងនឹងយេនឌ័រ។
មជ្ឈមណ្ឌលសិទ្ធិមនុស្សកម្ពុជា បានលើកឡើងថា៖ «សូមជំរុញឱ្យរដ្ឋាភិបាល បំពេញកាពត្វកិច្ចរបស់ខ្លួន ក្នុងការលើកកម្ពស់ ការពារ និងគោរពសិទ្ធិមនុស្សនៅទូទាំងប្រទេស ជាពិសេស ចាត់វិធានការដើម្បីការពារសិទ្ធិស្ត្រី និងលើកកម្ពស់សមភាពយេនឌ័រ»។
បើតាមប្រតិទិននៃទិវាសិទ្ធិមនុស្ស នៅថ្ងៃទី២៨ ខែវិច្ឆិកា ជាទិវាអន្តរជាតិនៃអ្នកការពារសិទ្ធិមនុស្សជាស្ត្រី ថ្ងៃទី៩វិច្ឆិកា ទិវាអ្នកការពារសិទ្ធិមនុស្សអន្តរជាតិ និងថ្ងៃទី១០ធ្នូ ជាទិវាសិទ្ធិមនុស្សអន្តរជាតិ។
នាយិកាប្រតិបត្តិនៃមជ្ឈមណ្ឌលសិទ្ធិមនុស្សកម្ពុជា អ្នកស្រី ចក់ សុភាព មានប្រសាសន៍បន្ថែមថា បច្ចុប្បស្ត្រីនៅតែបន្តរងគ្រោះ ដោយអំពើហិង្សាច្រើនរូបភាព ដែលរដ្ឋាភិបាលត្រូវពង្រឹងការអនុវត្តច្បាប់ ចាប់ជនប្រព្រឹត្តមកផ្តន្ទាទោសតាមច្បាប់ ដើម្បីបញ្ចប់អំពើហិង្សាទាក់ទងនឹងយេនឌ័រ។
លោកស្រីថា៖ «ការប្រើប្រាស់[ហិង្សា]លើរាង្គកាយ លើផ្លូវចិត្ត និងផ្លូវភេទផងដែរ ហើយបើតាមការប៉ានស្មានដែលសិក្សាដោយក្រសួងកិច្ចការនារីផ្ទាល់ហ្នឹង គឺបានរកឃើញថា ស្តី្រខ្មែរយើងម្នាក់ក្នុងចំណោម៥នាក់ ធ្លាប់បានទទួលរងអំពើហិង្សាពីដៃគូរបស់គាត់»។
រដ្ឋមន្ត្រីក្រសួងកិច្ចការនារី លោកស្រី អ៊ឹង កន្ថាផាវី មិនអាចទាក់ទង ដើម្បីសុំបញ្ជាក់ពីការជំរុញរបស់ក្រុមអង្គការសង្គមស៊ីវិលនេះទេ។
ប៉ុន្តែរដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍គណៈកម្មាធិការជាតិប្រយុទ្ធប្រឆាំងការជួញដូរមនុស្សកម្ពុជា លោកស្រី ជូ ប៊ុនអេង មានប្រសាសន៍ថា រដ្ឋាភិបាលបានបង្កើតច្បាប់មួយចំនួន ដើម្បីទប់ស្កាត់បញ្ហានេះ និងផ្តន្ទាទោសជនល្មើស។
កត្តាចម្បងនៃអំពើហិង្សា លោកស្រីថា កើតចេញពីការអប់រំ និងសីលធម៌របស់មនុស្ស។
លោកស្រីបន្តថា ការលុបបំបាត់បញ្ហានេះបាន ទាល់តែរួមគ្នាទាំងសង្គមស៊ីវិល ទាំងអ្នកសារព័ត៌មាន និងភាគីពាក់ព័ន្ធ ដើម្បីពន្យល់ឱ្យពលរដ្ឋគ្រប់រូប យល់ថា អំពើហិង្សា និងការបៀតបៀនលើស្ត្រីជាទង្វើខុសច្បាប់ បង្កកាខាតបង់ដល់ក្រុមគ្រួសារ និងសហគមន៍ដែលខ្លួនរស់នៅ។
លោកស្រីគូសបញ្ជាក់ថា៖ «នៅពេលដែលមានអំពើហិង្សាមួយកើតឡើង ឬក៏មានបទល្មើសមួយកើតឡើង យើងខាតមនុស្សពីរនាក់បាត់ទៅហើយគឺអ្នកប្រព្រឹត្ត និងអ្នករងគ្រោះ គឺគាត់មានបញ្ហាទាំងពីរនាក់ ហើយក្រុមគ្រួសារក៏អត់មានសេចក្តីសុខ ហើយសហគមន៍ ក៏មានកង្វល់ដោយសារអំពើនេះទាំងអស់ហ្នឹង»។
អ្នកស្រី សេង ចាន់ថន ដែលធ្លាប់ត្រូវបានអាជ្ញាធររុញដួលបោកថ្នល់កៅស៊ូ ខណៈអ្នកស្រីនិងស្រី្តផ្សេងទៀតចេញតវ៉ាទាមទារឱ្យដោះលែងស្វាមីនោះ សាទរចំពោះការយុទ្ធនាការ១៦ថ្ងៃដើម្បីបញ្ចប់អំពើហិង្សាលើស្ត្រី។ អ្នកស្រីបន្តថា រដ្ឋាភិបាលហ៊ាក់មិនសូវយកចិត្តទុកដាក់ចំពោះស្ត្រីដូចការលើកឡើងនោះទេ ព្រោះបច្ចុប្បន្នស្ត្រីនៅតែទទួលរងអំពើហិង្សា និងការបៀតបៀនពីបុរស ជាពិសេសស្ត្រីដែលចេញតស៊ូមតិ។
លោកថា៖ «ខ្ញុំយល់ឃើញថាល្អ មិនត្រឹមតែស្ត្រីពួកខ្ញុំទេ គឺស្រ្តីទូទៅដែលនៅក្នុងប្រទេសកម្ពុជា ព្រោះអីពួកខ្ញុំទៅតវ៉ា ទាមទាររឿងអយុត្តិធម៌អ៊ីចឹង ត្រូវបានបុរសៗ ធ្វើបាបមកលើពួកខ្ញុំ រុញច្រាន វាយ ទាត់ធាក់សព្វបែបយ៉ាង ហើយបុរសដែលធ្វើបាបពួកខ្ញុំមិនបានត្រូវតុលាការ ឬអាជ្ញាធរយកពួកគាត់ទៅដាក់ទោសតាមច្បាប់ទេ»។
របាយការណ៍របស់អង្គការលីកាដូសម្រាប់១៤ខេត្ត-រាជធានី ដែលអង្គការនេះបានឃ្លាំមើលបង្ហាញថា នៅឆ្នាំ២០១៩ ករណីអំពើហិង្សាក្នុងគ្រួសារលើស្រ្តី មានចំនួន៦៣ករណី ហើយករណីរំលោភសេពសន្ថវៈលើស្រ្តី និងកុមារី មានចំនួនជាង ១០០ករណី និងមានរំលោភបូក ៣ករណី។ របាយការណ៍ បន្តថា ករណីរំលោភសេពសន្ថវៈ និងអំពើហិង្សាលើស្ត្រី និងកុមារី បានបណ្តាលឱ្យជនរងគ្រោះស្លាប់ ១២នាក់ ក្នុងនោះមានស្រ្តី ៧នាក់ និងកុមារី ៥នាក់៕
