លោក សាន ផុន អាយុ៤២ឆ្នាំ បញ្ឈរជើងរ៉ឺម៉កកង់បី មុខសំណង់ខុនដូ ស៊ីណូផ្លាហ្សា ជាង៤ឆ្នាំមកហើយ។ លោករៀបរាប់ថា ការរកស៊ីរបស់គាត់ធ្លាប់កាក់កបគួរសមកាលពីការដ្ឋានសំណង់នៅដំណើរការ។ ប៉ុន្តែពេលដែលការដ្ឋានផ្អាក ម៉ូយក៏ខ្សត់ទៅតាមនោះដែរ។ លោកបន្តថា អគារខុនដូនេះផ្អាកសាងសង់ក្នុងអំឡុងឆ្នាំ២០១៨។
អគារខុនដូធំមួយឈ្មោះ ស៊ីណូផ្លាហ្សា សង់នៅតាមបណ្ដោយលូទឹកស្អុយ បណ្ដែតខ្លួនកណ្ដាលអាកាសក្នុងសង្កាត់បឹងត្របែក ខណ្ឌចំការមន រាជធានីភ្នំពេញ។ ខុនដូស៊ីណូផ្លាហ្សា មានអគារចំនួន៤ សង់កម្ពស់៤៥ជាន់ស្មើៗគ្នា។ ប៉ុន្តែសំណង់ខុនដូទាំងនោះមិនទាន់សង់រួចរាល់ទេ។ ខុនដូនេះសង់បានត្រឹមបង្គុំសំណង់ បូកបាយអ ប៉ុណ្ណោះ។
លោក សុផុន ប្រាប់ថា៖ «ពីមុន ខ្ញុំបានម៉ូយ [អតិថិជន]ច្រើន ពួកគាត់ជាកម្មករនិងបុគ្គលិកធ្វើក្នុងការដ្ឋាននេះ។ មេការចិនខ្មែរ ធ្លាប់ជិះតុកតុកខ្ញុំញឹកណាស់។ ពួកគាត់ប្រាប់ថា ខុនដូនេះផ្អាកមួយរយៈ ដើម២០២០ គេធ្វើវិញ។ ដល់២០២០ អាកូវីដមក ក៏គាំងតែម្ដងទៅ»។
សព្វថ្ងៃ មានកម្មករនិងមេការសំណង់ជនជាតិចិនជាច្រើននាក់កំពុងស្នាក់នៅផ្នែកខាងក្រោមអគារខុនដូនេះ។ ផ្អែកខ្លះនៃអគារចាប់ផ្ដើមដុះស្នឹម កន្លែងខ្លះទៀតដែលត្រូវភ្លៀងដក់ទឹកចាប់ផ្ដើមកាន់ស្លែពណ៌ខៀវ ឯដែកក៏ត្រូវច្រែះស៊ីដោយអន្លើៗ។ ពេលយប់ អ្នកស្នាក់នៅក្នុងអគារ បានបើកភ្លើងអំពូលម៉ែត្រផ្លុងៗនៅជាន់ផ្ទាល់ដីប៉ុណ្ណោះ ខណៈដែលមួយផ្នែកធំនៃអគារងងឹតឈឹង មិនខុសពីអគារខ្មោចក្នុងភាពយន្តប៉ុន្មានឡើយ។
បុរសជនជាតិចិនម្នាក់វ័យប្រមាណជាង៤០ឆ្នាំ ដែលកំពុងរស់នៅក្នុងអគារ ស៊ីណូ ផ្លាហ្សា និយាយប្រាប់វីអូឌីថា លោកដឹងថា អគារនេះផ្អាកមួយរយៈប៉ុណ្ណោះ នឹងសង់បន្ត ប៉ុន្តែមិនដឹងថាពេលណាឡើយ។ លោកបដិសេធឆ្លើយសំណួរផ្សេងទៀត កាលពីថ្ងៃទី១៥ ខែវិច្ឆិកា។
ឯកសារផ្សព្វផ្សាយលក់របស់ខុនដូ ស៊ីណូ ផ្លាហ្សា ដែលចេញផ្សាយកាលពីខែកក្កដា ឆ្នាំ២០១៦ បង្ហាញថា អគារ ស៊ីណូ ផ្លាហ្សា សង់លើផ្ទៃដីសម្រាប់សាងសង់ មានទំហំ១,៣ហិកតា ដែលត្រូវចំណាយប្រាក់សាងសង់ជាង២០០លានដុល្លារ។ អគារខុនដូមានទំហំ២៣ម៉ឺនម៉ែត្រការ៉េ ដែលមាន៤អគារ និងមានកម្ពស់៤៥ជាន់ដូចគ្នា ជាប្រភេទខុនដូ អាផាតមិន បែបអន្តរជាតិ អគារ ផ្ទះសម្រាប់ប្រជាជនដែលមានចំណូលមធ្យម សណ្ឋាគារ និងការិយាល័យ។
គម្រោងខុនដូ ស៊ីណូ ផ្លាហ្សា នេះ ត្រូវបានវិនិយោគឡើងដោយក្រុមហ៊ុនអភិវឌ្ឍន៍ Cambodia Natural lucky Real Estate Co.,Ltd និងសាងសង់ដោយក្រុមហ៊ុនសាជីវកម្មវិស្វកម្មសំណង់រដ្ឋចិន (CEC) និងអ្នកទទួលសិទ្ធិលក់ផ្តាច់មុខដោយក្រុមហ៊ុន Hutton CPL ដែលរួមបញ្ចូលគ្នារវាងក្រុមហ៊ុនសិង្ហបុរី និងកម្ពុជា។
អ្នកនាំពាក្យសាលារាជធានីភ្នំពេញ លោក ម៉េត មាសភក្ដី មានប្រសាសន៍ថា ការដា្ឋនខុនដូ ស៊ីណូ ផ្លាហ្សា នេះ បានផ្អាកដោយសារតែម្ចាស់គម្រោងនេះជួបបញ្ហាហិរញ្ញវត្ថុ។ ទោះយ៉ាងណា លោកអះអាងថា ការផ្អាកសំណង់ខ្នាតធំនេះមិនប៉ះពាល់ដល់សោភ័ណភាពរាជធានីភ្នំពេញនោះឡើយ។
លោក ម៉េត មាសភក្ដី ប្រាប់ថា៖ «គម្រោងមួយចំនួនតូចនៅភ្នំពេញ ត្រូវបានផ្អាក ដោយសារម្ចាស់គម្រោងមានបញ្ហាហិរញ្ញវត្ថុ វាជារឿងធម្មតាប៉ុណ្ណោះ។ យើងមិនអាចនិយាយបានថា ករណី ស៊ីណូ ផ្អាកនេះ មិនជាប៉ះពាល់អ្វីធ្ងន់ធ្ងរដល់សោភ័ណភាពរាជធានីភ្នំពេញឡើយ»។
បើតាមលោក ភក្ដី មានគម្រោងមួយចំនួនទៀតនៅភ្នំពេញដែលពន្យារពេលសាងសង់ឬផ្អាកដំណើរការបណ្ដោះអាសន្ន ដោយរង់ចាំស្ថានភាពសេដ្ឋកិច្ចល្អប្រសើរវិញសិន។
នៅចម្ងាយប្រមាណជាង១គីឡូម៉ែត្រពីអគារខុនដូ ស៊ីណូ ផ្លាហ្សា ក្នុងខណ្ឌចំការមនដដែល ក៏មានអគារខ្ពស់មួយទៀតផ្អាកដំណើរការសាងសង់ដូចគ្នា។ អគារនេះជាកម្មសិទ្ធិរបស់ក្រុមហ៊ុន ហ្សុងវូ រៀលអ៊ីតស្តេត ឌឹវេឡុបម៉ិន ស្ថិតនៅផ្លូវលេខ៥០៤ សង្កាត់ផ្សារដើមថ្កូវ។ តាមគម្រោងអគារក្រុមហ៊ុន ហ្សុងវូ ត្រូវសង់ចំនួន៣៧ជាន់ (ជាន់ក្រោមដី៣ជាន់ ជាន់លើដី៣៤ជាន់) ដែលមានកម្ពស់ជាង១២៥ម៉ែត្រ និងមានផ្ទៃក្រឡាសំណង់សរុបជាង ១ម៉ឺន៤ពាន់ (១៤ ៥៨១,៥២) ម៉ែត្រការ៉េ។ សំណង់អគារក្រុមហ៊ុន ហ្សុងវូ ត្រូវផ្អាកតាំងពីខែកក្កដា ដោយសារមានបញ្ហាហិរញ្ញវត្ថុ។
បន្ទាប់ពីផ្អាកដំណើរការសាងសង់រួចមក ម្ចាស់គម្រោង ហ្សុងវូ នេះ បានជំពាក់ប្រាក់ខែបុគ្គលិកនិងកម្មករនៅទីនោះផង។ ក្រុមកម្មករចិន-ខ្មែរប្រមាណជាង១០០នាក់ ក៏បានធ្វើបាតុកម្មទាមទារបើកកម្រៃពលកម្មរបស់ពួកគេ។ ក្រុមកម្មករទាំងនោះឈរលើកបដាតវ៉ា ទាមទារថ្លៃពលកម្មដែលជាកម្លាំងញើសឈាមរបស់ពួកគេ រហូតដល់យកញត្តិទៅស្វែងរកអន្តរាគមន៍ដល់ស្ថានទូតចិនផង។
អភិបាលរងខណ្ឌចំការមន លោក អាំង សិរីពិសិដ្ឋ ប្រាប់វីអូឌីថា ករណីទំនាស់នៅការដ្ឋានសង់អគារ ហ្សុងវូ នេះ មិនទាន់អាចដោះស្រាយបញ្ចប់នៅឡើយ ព្រោះតែភាគីម្ចាស់គម្រោងគេចវេះមិនចូលខ្លួនដោះស្រាយ។
លោក អាំង សិរីពិសិដ្ឋ ប្រាប់ថា៖ «ពីមុន ម្ចាស់គម្រោងគាត់ថា គាត់នឹងសង ក្រោយមកទៀត ខ្ញុំដាក់លិខិតអញ្ជើញ ពួកគាត់បែរជាឱ្យមេធាវីមក ដូច្នេះសម្រេចអីមិនកើត ។ កម្មករគាត់មិនអាចចាំបាន ទើបស្វែករកអន្តរាគមន៍ពីផ្អែកផ្សេងៗទៀត»។
បើតាមលោក ពិសិដ្ឋ ឱ្យដឹងបន្ថែមថា មានកម្មករជាង១០០នាក់ដែលផ្ដិតមេដៃទាមទារប្រាក់ឈ្នួលពីម្ចាស់គម្រោងអគារ ហ្សុងវូ។ ក្នុងនោះ ទឹកប្រាក់ជំពាក់កម្មករបុគ្គលិកចំនួនសរុបប្រមាណជាង៨០ម៉ឺនដុល្លារ។
តួលេខដែលផ្ដល់ដោយអាជ្ញាធរខណ្ឌចំការមន បង្ហាញថា គិតត្រឹមខែវិច្ឆិកានេះ អគារកម្ពស់៥ជាន់ឡើងដែលកំពុងសាងសង់ មាន៤៧អគារ ហើយអគារចំនួន៥បានផ្អាកបណ្ដោះអាសន្ន។
ប្រធានសហព័ន្ធសហជីពកម្មករសំណង់ និងព្រៃឈើកម្ពុជា លោក សុខ គីន មានប្រសាសន៍ថា វិស័យសំណង់បានរងផលប៉ះពាល់ច្រើនក្នុងពេលមានវិបត្តិកូវីដ១៩នេះ។
លោក សុខ គីន ប្រាប់ថា៖ «ប្រហែលជា៣០ភាគរយដែលប៉ះនៃសមាជិករបស់ខ្ញុំ ត្រូវបានព្យួរការងារ ដោយសារកូវីដ១៩។ កម្មករសរុបនៅប្រហែល ២៥ម៉ឺននាក់ វាក៏អាចប៉ះពាល់ច្រើនដែរ តែយើងមិនទាន់មានតួលេខច្បាស់លាស់»។
របាយការណ៍របស់ក្រសួងរៀបចំដែនដី នគរូបនីយកម្ម និងសំណង់ បង្ហាញថា សំណើសាងសង់ដល់ទៅ ២ ៥២២គម្រោង ឬស្មើនឹងជាង ៨លាន៦សែនម៉ែត្រការ៉េ ត្រូវបានស្នើឡើងនៅក្នុងត្រីមាសទី១ក្នុងឆ្នាំនេះ។
បើតាមរបាយការណ៍ដដែល ទំហំទុនវិនិយោគក្នុងវិស័យសំណង់កម្ពុជានៅក្នុងរយៈពេល៦ខែដំបូងក្នុងឆ្នាំនេះ នៅតែរក្សាបានកំណើនលើសពីរខ្ទង់ ដោយមានអត្រាកំណើន១៣,២៦ភាគរយ បើធៀបនឹងតួលេខក្នុងរយៈពេលដូចគ្នាកាលពីឆ្នាំមុន។
អ្នកនាំពាក្យក្រសួង រៀបចំដែនដី នគរូបនីយកម្ម និងសំណង់ លោក សេង ឡូត បដិសេធមិនផ្ដល់តួលេខសំណង់ផ្អាកនៅឆ្នាំនេះឡើយ។ ទោះជាយ៉ាងណា របាយការណ៍របស់ក្រសួងបង្ហាញថា ក្រសួងសាម៉ីកំពុងដោះស្រាយវិវាទសំណង់ចំនួន២៩ករណី។
អ្នកនាំពាក្យសាលារាជធានីភ្នំពេញ លោក ម៉េត មាសភក្ដី ឱ្យដឹងថា នៅភ្នំពេញមានការដ្ឋានសំណង់មួយចំនួនបានផ្អាកបណ្ដោះអាសន្ន ប៉ុន្តែលោកមិនអាចផ្ដល់តួលេខពិតប្រាកដនោះទេ។ លោកថា សាលារាជធានីភ្នំពេញ នឹងខិតខំបន្ថែមទៀត ដើម្បីដោះស្រាយបញ្ហានានាដែលបណ្ដាលមកពីការផ្អាកការដ្ឋានសំណង់ទាំងនេះ។
លោក ម៉េត មាសភក្ដី ប្រាប់ថា៖ លោក ម៉េត មាសភក្ដី ប្រាប់ថា៖ «ទីតាំងមួយចំនួន [ការដ្ឋាន] បានផ្អាក យើងលើកទឹកចិត្តឱ្យមានការធ្វើសកម្មភាពឡើងវិញ យើងត្រូវទទួលស្គាល់វិបត្តិដែលកើតពីកូវីដ១៩តែម្ដង។ វិបត្តិនេះ ផលប៉ះពាល់ច្រើនណាស់ដល់សេដ្ឋកិច្ច រួមទាំងការវិនិយោគលើសំណង់មួយចំនួននៅរាជធានីភ្នំពេញ»។
ព្រឹត្តិបត្រសង្ខេបរបស់ធនាគារពិភពលោក ស្ដីពីស្ថានភាពសេដ្ឋកិច្ចកម្ពុជា ចេញផ្សាយកាលពីចុងខែកញ្ញា បង្ហាញថា ការរាលដាលជំងឺកូវីដ១៩ បានប៉ះពាល់យ៉ាងដំណំទៅលើក្បាលម៉ាស៊ីនកំណើនធំៗរបស់កម្ពុជា ពិសេសវិស័យសំណង់ ទេសចរណ៍ និងផ្នែកនាំចេញទំនិញ។ ស្ថាប័ននេះបន្តថា ជំងឺកូវីដ១៩ បានធ្វើឱ្យវិស័យសំណង់និងអចលនទ្រព្យនៅទ្រឹង ព្រោះតែវិស័យនេះ មានការពឹងពាក់ខ្លាំងទៅលើការវិនិយោគពីបរទេស។
តួលេខធនាគារពិភពលោក បញ្ជាក់ថា ការនាំចូលដែកនិងស៊ីម៉ង់ត៍ក្នុងអំឡុង៦ខែដំបូងនៃឆ្នាំ២០២០ បានធ្លាក់ចុះ៤៥,១ភាគរយ ធៀបទៅនឹងឆ្នាំមុន ដោយសារគម្រោងសាងសង់ធំៗមួយចំនួនត្រូវផ្អាកសកម្មភាព។
អ្នករត់កង់បី លោក សាន ផុន ប្រាប់ថា៖ «បើខុនដូបន្តសាងសង់ឡើងវិញ ខ្ញុំសម្បូរភ្ញៀវជាកម្មករ។ បើសង់រួច ខ្ញុំអាចនឹងមានភ្ញៀវជាអ្នកស្នាក់នៅឬធ្វើការក្នុងអគារនេះ។ តែបើដូចសព្វថ្ងៃនេះ រកមួយថ្ងៃ ស៊ីមួយថ្ងៃប៉ុណ្ណោះ»៕