លោកឧបនាយករដ្ឋមន្ត្រី ស ខេង រដ្ឋមន្រ្តីក្រសួងមហាផ្ទៃ បង្ហាញការព្រួយបារម្ភពីការបាត់បង់ធនធានធម្មជាតិ ខណៈលោកថា ព្រៃឈើនៅតំបន់ការពារមួយចំនួននៅតែបន្តទទួលរងការកាប់បំផ្លាញនិងការទន្ទ្រានដីយកធ្វើកម្មសិទ្ធិ។
ការព្រួយបារម្ភនេះ ធ្វើឡើងក្នុងកិច្ចប្រជុំស្ដីពីការពង្រឹងការអនុវត្តតួនាទីនិងភារកិច្ចរបស់រដ្ឋបាលខេត្តមណ្ឌលគិរី នាថ្ងៃនេះ។
លោកឧបនាយករដ្ឋមន្ត្រី ស ខេង បានសរសេរនៅលើទំព័រហ្វេសប៊ុករបស់លោក នៅថ្ងៃនេះ ថា ព្រៃឈើ ដីធ្លី ធនធានធម្មជាតិ និងតំបន់ការពារនានាមួយចំនួន នៅតែបន្តទទួលរងការកាប់បំផ្លាញនិងការទន្ទ្រានកាន់កាប់ពីមួយឆ្នាំទៅមួយឆ្នាំ គួរឱ្យព្រួយបារម្ភ។
លោកបន្តថា ជាក់ស្ដែងនៅខេត្តមណ្ឌលគិរី ដែលមានធនធានធម្មជាតិស្ដុកស្ដម្ភនិងទេសភាពដ៏ស្រស់ត្រកាល ក៏ត្រូវបានក្រសួងបរិស្ថានរកឃើញថា បានទទួលរងការបំផ្លិចបំផ្លាញក្រោមរូបភាពនានាផងដែរ។
លោក ស ខេង បានបញ្ជាក់តាមរយៈសំណេរលើហ្វេសប៊ុកថា៖ «ដើម្បីដោះស្រាយបញ្ហានេះ សម្ដេចតេជោនាយករដ្ឋមន្រ្តី ក៏បានសម្រេចប្រគល់ជូនក្រសួងមហាផ្ទៃ សម្របសម្រួលជាមួយក្រសួងពាក់ព័ន្ធ ដើម្បីពិនិត្យស្រាវជ្រាវករណីនេះ រហូតឈានទៅចាត់វិធានការលើមន្រ្តីមួយចំនួន ស្របតាមច្បាប់ ខណៈករណីពាក់ព័ន្ធមួយចំនួនទៀតក៏កំពុងស្ថិតក្នុងសមត្ថកិច្ចតុលាការ»។
អភិបាលខេត្តមណ្ឌលគិរី លោក ស្វាយ សំអ៊ាង សុំមិនធ្វើអត្ថាធិប្បាយ ដោយថា ជាប់រវល់ប្រជុំ។
ចំណែកប្រធានមន្ទីរបរិស្ថានខេត្តមណ្ឌលគិរី លោក កែវ សុភ័ក្រ មានប្រសាសន៍ថា អ្នកដែលទន្ទ្រាននិងកាប់បំផ្លាញព្រៃឈើនៅតំបន់ការពារក្នុងខេត្តនេះ ភាគច្រើនជាប្រជាពលរដ្ឋចំណាកស្រុកដែលមកពីតាមបណ្តាខេត្តផ្សេងៗ។ តែយ៉ាងណា លោកថា មន្ត្រីបរិស្ថានបាននិងកំពុងបន្តខិតខំចាត់វិធានការតឹងរ៉ឹង ក្នុងការទប់ស្កាត់និងការពារធនធានធម្មជាតិក្នុងខេត្តនេះ។
លោកថា៖ «យើងឮតែមានឈ្មោះ ទិញដីឧកញ៉ានេះ ឧកញ៉ានៅតាមហ្វេសប៊ុក បានឮខ្លះ ប៉ុន្តែសម្រាប់ការទន្ទ្រានដីរាប់រយហិកតា ដូចអត់ទាន់មាន ហើយសម្រាប់ខាងខ្ញុំ បើមាន ក៏ចាត់វិធានការដែរ»។
អ្នកប្រឹក្សាយោបល់បណ្ដាញសហគមន៍ជនជាតិដើមភាគតិចខេត្តមណ្ឌលគិរី លោក គ្រើង តុលា ហៅការព្រួយរបស់ថ្នាក់ដឹកនាំក្រសួងមហាផ្ទៃរូបនេះថា មិនមានអ្វីថ្មីនោះទេ។
លោកថា កន្លងមក ប្រមុខរដ្ឋាភិបាលក៏បានបង្ហាញក្ដីបារម្ភនិងបានប្តេជ្ញាការពារធនធានធម្មជាតិ ដោយដាក់វិធានការដើម្បីទប់ស្កាត់បទល្មើសធនធានធម្មជាតិ ប៉ុន្តែព្រៃឈើនៅតែបាត់បង់ដដែល។
លោកនិយាយថា៖ «ខ្ញុំគិតថា វិធានការទប់ស្កាត់បទល្មើសព្រៃឈើ លុះត្រាតែគោរពច្បាប់ បើមិនគោរពច្បាប់ទេ ទោះបីប្ដេជ្ញាចិត្តរាប់លានដង ព្រៃឈើនៅតែបាត់បង់។ យើងឃើញព្រៃឈើក្នុងមណ្ឌលគិរីបច្ចុប្បន្ន អ្នកដែលកាប់បំផ្លាញព្រៃឈើ គឺសុទ្ធតែអ្នកធំ ឧកញ៉ា ប្រជាពលរដ្ឋគឺគ្រាន់តែជាស្ពានរបស់ឧកញ៉ា»។
រដ្ឋលេខាធិការក្រសួងបរិស្ថាន លោក នេត្រ ភក្ត្រា ឱ្យដឹងកាលពីថ្ងៃទី២៦ ខែតុលា ឆ្នាំ២០២០ ថាក្នុងរយៈពេល៩ខែឆ្នាំនេះ មន្ត្រីឧទ្យានុរក្សបង្ក្រាបបទល្មើសបានចំនួន៦ ៥៩៧ករណី ក្នុងនោះ បានរឹបអូសរណារយន្ត ចំនួន៣ ៥១៨គ្រឿង, រថយន្ត ចំនួន១៥០គ្រឿង, ត្រាក់ទ័រ ចំនួន៨៦គ្រឿង, គោយន្តកន្ត្រៃ ចំនួន៨៦៨គ្រឿង, ដោះអន្ទាក់បានចំនួន២៩ ៤៨៣អន្ទាក់, ដកហូតកាំភ្លើងកែច្នៃ ចំនួន៦៣៧គ្រឿង និងដកហូតម៉ូតូបានចំនួន៥៣៣គ្រឿង។
ក្រៅពីនោះ លោកថា មន្ត្រីរឹបអូសឈើបានចំនួន២ ៦២០ម៉ែត្រគូប និងបានឱ្យធ្វើកិច្ចសន្យានិងអប់រំដល់ជនល្មើសកម្រិតស្រាល ចំនួន២ ០៦២ករណី ពិន័យអន្តរការណ៍ ចំនួន៧៣៤ករណី និងបញ្ជូនសំណុំរឿងទៅតុលាការ ចំនួន៤៥៤ករណី។ បើតាមលោក នេត្រ ភក្ត្រា បច្ចុប្បន្ន កម្ពុជាមានតំបន់ការពារធម្មជាតិ ចំនួន៦៨តំបន់ លើផ្ទៃដីប្រមាណ៧,៣លានហិកតា ឬស្មើនឹង៤១%នៃផ្ទៃដីប្រទេសកម្ពុជា៕
