រដ្ឋមន្ត្រីក្រសួងមហាផ្ទៃ លោក ស ខេង ថ្លែងថា គ្រឿងញៀននៅតែជាបញ្ហាដ៏ក្កៅគគុក បង្កផលប៉ះពាល់ដល់សន្តិសុខសង្គមនិងជីវភាពប្រជាពលរដ្ឋ ខណៈរកឃើញថា ចំនួនអ្នកពាក់ព័ន្ធគ្រឿងញៀនដែលសមត្ថកិច្ចចាប់ឃុំខ្លួន បានកើនឡើងប្រមាណជា២០ភាគរយ បើធៀបនឹងឆ្នាំមុនក្នុងរយៈពេលដូចគ្នា។
លោក ស ខេង បានលើកឡើងបែបនេះក្នុងកិច្ចប្រជុំថ្នាក់រដ្ឋមន្ត្រីអាស៊ានស្តីពីការងារប្រឆាំងឧក្រិដ្ឋកម្មឆ្លងដែនលើកទី១៤ តាមប្រព័ន្ធវីដេអូកាលពីម្សិលមិញ។
មេដឹកនាំកម្ពុជារូបនេះថ្លែងថា៖ «បច្ចុប្បន្ន ការជួញដូរគ្រឿងញៀនខុសច្បាប់នៅតែជាបញ្ហាក្តៅគគុក កំពុងបង្កផលប៉ះពាល់ប្រទាក់ក្រឡាគ្នាស្មុគស្មាញដល់សន្តិសុខ សុខុមាលភាពសង្គម និងជីវភាពរបស់ប្រជាពលរដ្ឋទាំងនៅទីក្រុងនិងនៅជនបទ»។
លោកគូសបញ្ជាក់ថា ក្នុងរយៈពេល៩ខែដើមឆ្នាំ២០២០នេះ អ្នកពាក់ព័ន្ធគ្រឿងញៀនជាង១ម៉ឺន៣ពាន់នាក់ ត្រូវសមត្ថកិច្ចចាប់ឃាត់ខ្លួន ក្នុងនោះករណីមួយចំនួនធំនាំចូលតាមព្រំដែនគោក។
អគ្គលេខាធិការ នៃអាជ្ញាធរជាតិប្រយុទ្ធប្រឆាំងគ្រឿងញៀន លោក មាស វីរិទ្ធ ប្រាប់ថា មកដល់ពេលនេះ អ្នកជាប់ពាក់ព័ន្ធគ្រឿងញៀនដែលត្រូវចាប់ឃាត់ខ្លួន កើនឡើងដល់ជិត២ម៉ឺនាក់(១៩ ៣៩៤) កើនឡើងប្រហែល២០ភាគរយ បើធៀបនឹងឆ្នាំមុនក្នុងរយៈពេលដូចគ្នា។ លោកថា ការកើនឡើងនេះមកពីតម្រូវការប្រើប្រាស់របស់យុវជនមានការកើនឡើង។
លោកបញ្ជាក់ថា មកដល់ពេលនេះ ការប្រយុទ្ធប្រឆាំងគ្រឿងញៀន អាជ្ញាធរទប់ស្កាត់បានតាមក្លឹបកម្សាន្តនិងកន្លែងដែលមានការគ្រប់គ្រងមួយចំនួនទៀត។
ប៉ុន្តែលោកថា ការប្រើប្រាស់គ្រឿងញៀនបានលេចឡើងនៅកន្លែងដែលសមត្ថកិច្ចគ្រប់គ្រងមិនបាន ដូចជាការលួចប្រើប្រាស់និងជួញដូរនៅពេលយប់ អំឡុងពេលសមត្ថកិច្ចចប់ម៉ោងការងារ។
លោក មាស វីរិទ្ធ មានប្រសាសន៍ថា៖ «ការប្រយុទ្ធប្រឆាំងគ្រឿងញៀន វាទាមទារឱ្យមានការចូលរួមពីគ្រប់ភាគីនិងតួអង្គដែលមានការពាក់ព័ន្ធ ពិសេសត្រូវផ្តើមចេញពីអ្នកប្រើប្រាស់ និងមុខសញ្ញាដែលងាយរងគ្រោះហើយងាយធ្លាក់ខ្លួនទៅក្នុងការអូសទាញរបស់ក្រុមជួញដូរគ្រឿងញៀន»។
កសិករម្នាក់នៅភូមិកំពង់ស្វាយ ឃុំព្រែកថ្មី ស្រុកកោះធំ ខេត្តកណ្តាល លោក សុខ រិទ្ធិ និយាយថា បញ្ហាគ្រឿងញៀននៅតំបន់ដែលគាត់រស់នៅមិនមានការថយចុះទេ រយៈពេល២ឆ្នាំជាប់គ្នាមកនេះ។
លោកថា អ្នកប្រើប្រាស់គ្រឿងញៀនបានប្រើរូបភាពចាក់បាសរាំក្នុងចម្ការល្មុតនៅពេលយប់ ពេលខ្លះរហូតភ្លឺក៏មាន ដែលធ្វើឱ្យក្រុមគ្រួសារមួយចំនួនរងអំពើហិង្សាពីបុរសខ្លះដែលបែកថ្នាំ។
លោក សុខ រិទ្ធិ ប្រាប់ថា៖ «ភាគច្រើននៅតាមចម្ការល្មុត ពេលយប់ព្រលប់ៗ ទៅឃើញហើយ។ អាផ្លូវទៅចម្ការហ្នឹង ទៅឃើញហើយ ទាំងហ្វូងៗ»។
កសិកររស់នៅភូមិឡាំម៉េះ ឃុំប៊ូស្រា ខេត្តមណ្ឌលគិរី លោក ហាម សាន់ និយាយដែរថា យុវជនមួយចំនួននៅតំបន់នេះ កំពុងធ្លាក់ខ្លួនប្រើប្រាស់គ្រឿងញៀនតាមការអូសទាញពីមិត្តភក្តិរបស់ពួកគេ។
លោកថា ប្អូនបង្កើតរបស់គាត់ម្នាក់ ត្រូវបានសមត្ថកិច្ចចាប់ឃុំខ្លួនជិត១ឆ្នាំមកហើយ ចោទថា ជាប់ពាក់ព័ន្ធគ្រឿងញៀន ដែលលោកថា មកដល់ពេលនេះ លោកមិនបានទៅសួរសុខទុក្ខទេ ដោយសារបញ្ហាជីវភាព។
លោក ហាម សាន់ ប្រាប់ថា៖ «ធ្វើម៉េចទេបង ខ្ញុំមិនចង់ឱ្យវាជក់ទេ តែវាតាមគ្នា ឬវាចង់ក៏មិនដឹង ហើយពួកខ្ញុំឯណាមានលុយទៅមើលវា ប៉ូលិសគេប្រាប់ដែរ តែអត់មានលុយទៅមើលវាតាមដំណើរវាទៅ»។
លោក ស ខេង មានប្រសាសន៍ដែរថា តាមការស្រាវជ្រាវ បញ្ហាលំហូរចូលគ្រឿងញៀន ដោយសារតែឧក្រិដ្ឋជនគ្រឿងញៀននៅតែបន្តយកតំបន់ត្រីកោណមាស ធ្វើជាទីតាំងផលិតនិងចរាចរ ដែលចាំបាច់ត្រូវមានវិធានការបន្ទាន់ ដើម្បីកាត់បន្ថយហានិភ័យដ៏គ្រោះថ្នាក់នេះ។
លោកថា កម្ពុជាជាប្រទេសរងគ្រោះដោយសារគ្រឿងញៀន និងជាទីតាំងឆ្លងកាត់របស់ជនល្មើស មិនមែនជាប្រទេសផលិតគ្រឿងញៀននោះទេ។
លោក ស ខេង ថ្លែងថា ក្នុងស្មារតីនេះ កម្ពុជាស្នើដល់ប្រទេសក្នុងតំបន់ ជាពិសេសរដ្ឋសមាជិកនៅក្នុងអនុតំបន់ទន្លេមេគង្គ បន្តកិច្ចសហប្រតិបត្តិការគាំទ្រគ្នាទៅវិញទៅមក ក្នុងការងារប្រយុទ្ធប្រឆាំងគ្រឿងញៀនខុសច្បាប់ឱ្យកាន់តែសកម្មថែមទៀត ដើម្បីភាពសុខដុមរមនាសម្រាប់តំបន់ទាំងមូល។
ទោះជាយ៉ាងណា លោក ស ខេង ថ្លែងគូសបញ្ជាក់ទៀតថា ដោយមើលឃើញនូវគ្រោះថ្នាក់និងមហន្តរាយសង្គមធ្ងន់ធ្ងរដែលបង្កឡើងដោយបញ្ហាគ្រឿងញៀននេះហើយ ទើបរាជរដ្ឋាភិបាលកម្ពុជាបានដាក់ចេញនូវយន្តការដាក់ស្តែងទាំងថ្នាក់ជាតិនិងថ្នាក់ក្រោមជាតិ តាមរយៈយុទ្ធនាការប្រយុទ្ធប្រឆាំងគ្រឿងញៀនខុសច្បាប់ ចាប់តាំងពីឆ្នាំ២០១៧មក។
បុគ្គលិកគ្រប់គ្រងកម្មវិធីនៅមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក ហេង គីមហុង មានប្រសាសន៍ថា ការកើនឡើងបទល្មើសគ្រឿងញៀន មិនគួរបន្ទោសទៅលើតម្រូវការរបស់អ្នកប្រើប្រាស់ទេ តែគេត្រូវផ្តោតទៅលើប្រសិទ្ធភាពនៃវិធានការច្បាប់របស់ស្ថាប័នពាក់ព័ន្ធ មានកងកម្លាំងប្រដាប់អាវុធ កម្លាំងនគរបាលជាតិ និងតុលាការផងដែរ។
លោក ហេង គីមហុង ប្រាប់ថា៖ «យុទ្ធនាការ [បង្ក្រាបគ្រឿងញៀន] ប៉ុន្មានឆ្នាំមកនេះ ការឃាត់ខ្លួនអ្នកប្រើប្រាស់គ្រឿងញៀនមានចំនួនច្រើន ប៉ុន្តែសំណួរសួរថា នៅពីក្រោយនៃអ្នកប្រើប្រាស់គ្រឿងញៀន ហើយអ្នកជួញដូរត្រឹមមួយកញ្ចប់ពីរកញ្ចប់ហ្នឹង អ្នកណាជាអ្នកនាំចូល? ហើយអ្នកណាដែលជាអ្នកបើកផ្លូវឱ្យមានការនាំចូលដោយខុសច្បាប់នូវគ្រឿងញៀនជាច្រើនមកនេះ? នេះជាសំណួរ?»៕
