ក្រសួងអប់រំបានឱ្យដឹងថា ការប្រឡងសញ្ញាបត្រមធ្យមសិក្សាបឋមភូមិ(ថ្នាក់ទី៩)ទូទាំង២៥រាជធានី-ខេត្ត នៅថ្ងៃស្អែកនេះ នឹងចាប់ផ្តើមតាមការគ្រោងទុក បើទោះជាមានករណីឆ្លងកូវីដនៅក្នុងសហគមន៍ក៏ដោយ។
អ្នកនាំពាក្យក្រសួងអប់រំ យុវជន និងកីឡា លោក រស់ សុវាចា ប្រាប់វីអូឌីនៅថ្ងៃនេះថា ការប្រឡងសញ្ញាបត្រមធ្យមសិក្សាបឋមភូមិ(ថ្នាក់ទី៩)ទូទាំង២៥រាជធានី-ខេត្ត នៅថ្ងៃទី៣០ ខែវិច្ឆិកា ឆ្នាំ២០២០នេះ នឹងដំណើរការតាមធម្មតាតាមការគ្រោងទុក ហើយត្រូវអនុវត្តតាមគោលការណ៍ណែនាំរបស់ក្រសួងសុខាភិបាលរួមគ្នាទប់ស្កាត់ការឆ្លងជំងឺកូវីដ១៩ផងដែរ។
លោកមានប្រសាសន៍ថា៖ «ការប្រឡងមធ្យមសិក្សាបឋមភូមិ នៅថ្ងៃទី៣០វិច្ឆិកាស្អែកនេះ នឹងប្រព្រឹត្តទៅតាមការគ្រោងទុក ដោយសង្កត់ធ្ងន់លើការពង្រឹងយន្តការគាំពារសុខភាព»។
ដោយឡែក សាលារៀនឯកជន អន្តរទ្វីបអាមេរិកាំង ដែលក្រសួងសុខាភិបាលផ្អាកដំណើរការបណ្តោះអាសន្នចំនួន២សប្តាហ៍នោះ មិនមានសិស្សត្រូវប្រឡងទេ ព្រោះសាលារៀនឯកជននោះបានប្រឡងរួចហើយ កាលពីកំឡុងពេលខែសីហា ឆ្នាំ២០២០នេះ។
អ្នកនាំពាក្យក្រសួងអប់រំរូបនោះបញ្ជាក់ថា បេក្ខជនដែលត្រូវប្រឡងទូទាំង២៥រាជធានី-ខេត្ត នាថ្ងៃទី៣០ ខែវិច្ឆិកា ឆ្នាំនេះ មានចំនួនសរុប ១៥៨ ៧១៧នាក់ (១៥ម៉ឺន៨ពាន់៧១៧នាក់) ក្នុងនោះមាននារី ៨៥០ ១៣១នាក់ (៨ម៉ឺន៥ពាន់១៣១នាក់) ដែលប្រព្រឹត្តទៅតាមមណ្ឌលប្រឡងចំនួន ១៧២៩ ហើយមានបន្ទប់ប្រឡងចំនួន៧១៤៦បន្ទប់៕
