ក្រសួងសុខាភិបាលអំពាវនាវទៅប្រជាពលរដ្ឋ និងមន្ត្រីរាជការ ដែលពាក់ព័ន្ធដោយផ្ទាល់ និងប្រយោលជាមួយក្រុមគ្រួសារលោក ឆែម សាវុធ អគ្គនាយកពន្ធនាគារ ត្រូវទៅធ្វើតេស្តរកកូវីដ១៩ នៅផ្សារទំនើបអ៊ីអន១ និងនៅទីស្តីការក្រសួងមហាផ្ទៃ។
អ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានផ្ញើសារប្រាប់អ្នកសារព័ត៌មាននៅក្នុងតេឡេក្រាម នាថ្ងៃនេះថា ក្រសួងសម្រេចយកទីតាំងចំនួន២កន្លែង សម្រាប់ធ្វើតេស្តរកកូវីដ១៩ ដែលទីតាំងទាំងនោះរួមមាន នៅផ្សារទំនើបអ៊ីអន ១ សម្រាប់ប្រជាពលរដ្ឋធម្មតា និងនៅទីស្តីការក្រសួងមហាផ្ទៃ សម្រាប់មន្ត្រីរាជការ។
ក្រសួងសុខាភិបាលបានឱ្យដឹងថា គិតត្រឹមថ្ងៃទី២៩ ខែវិច្ឆិកា ឆ្នាំ២០២០នេះ ក្រុមគ្រូពេទ្យបានបង្ហាញលទ្ធផលធ្វើតេស្ត រកឃើញ៧ករណីវិជ្ជមានកូវីដ ដែលជាប់ពាក់ព័ន្ធនឹងក្រុមគ្រួសារលោក ឆែម សាវុធ អគ្គនាយកពន្ធនាគារ ដែលរស់នៅជាមួយគ្នានៅក្នុងបុរីប៉េងហួត ផ្លូវ៦០ម៉ែត្រ។
ក្រោយពីធ្វើតេស្តរកឃើញអ្នកឆ្លងកូវីដ១៩នោះ រដ្ឋាភិបាលសម្រេចបិទផ្សារអ៊ីអន១មួយរយៈ បិទសាលារៀនអន្តរទ្វីបអាមេរិកាំងសាខាចាក់អង្រែចំនួន២សប្តាហ៍ និងបិទសណ្ឋាគារភ្នំពេញចំនួន២ថ្ងៃ ដោយសារក្រុមគ្រួសារលោក ឆែម សាវុធ អគ្គនាយកពន្ធនាគារបានទៅទីកន្លែងទាំងនោះ៕