លោកនាយករដ្ឋមន្រ្តី ហ៊ុន សែន បានលើកឡើងនៅព្រឹកនេះថាករណីឆ្លងរីករាលជំងឺកូវីដ ១៩ ក្នុងសហគមន៍អាចកើនឡើងដល់១៥ករណី បើ១ករណីនៅខេត្តសៀមរាបត្រូវបានវិទ្យាស្ថានប៉ាស្ទ័របញ្ជាក់ថាវិជ្ជមានកូវីដ១៩។
ក្នុងពិធីបើកការដ្ឋានសាងសង់ និងកែលំអរផ្លូវទាំង ៣៨ខ្សែ ក្នុងក្រុងសៀមរាប ខេត្តសៀមរាប លោកនាយករដ្ឋមន្រ្តីហ៊ុន សែន បានដាក់ឈ្មោះការឆ្លងក្នុងសហគមន៍ជាលើកដំបូងក្នុងប្រទេសកម្ពុជាដែលទាក់ទងជាមួយនឹងគ្រួសារលោក ឆែម សាវុធ អគ្គនាយកពន្ធនាគារថាជា«ព្រឹត្តិការណ៍សហគមន៍២៨វិច្ឆិកា»។
លោកនាយករដ្ឋមន្រ្តី បានលើកឡើងថា ប្រសិនបើកូនស្រីលោកឆែម សាវុធ ដែលរស់នៅខេត្តសៀមរាបត្រូវបានបញ្ជាក់ដោយវិទ្យាស្ថានប៉ាស្ទ័រថាមានវិជ្ជមានកូវីដ១៩ នោះការឆ្លងក្នុងសហគមន៍នឹងកើនឡើងដល់១៥ករណីក្នុងរយៈពេល២ថ្ងៃនេះ។
លោកនាយករដ្ឋមន្រ្តីបានថ្លែងបន្តថា៖«ក្នុងករណីដែលទៅពីសៀមរាប ត្រូវបានបញ្ជាក់ថាវិជ្ជមាន ការឆ្លងក្នុងសហគមន៍បានកើនឡើងរហូតដល់១៥ករណីក្នុងរយៈពេលតែ២ថ្ងៃប៉ុណ្ណោះ។ ប៉ុន្តែអ្វីដែលគួរឱ្យចាប់អារម្មណ៍គឺស្ថិតនៅក្នុងចង្កោមនៃអ្នកដែលធ្វើការនៅក្នុងក្រសួងមហាផ្ទៃ និងក្រុមគ្រួសាររបស់ឯកឧត្តម ឆែម សាវុធ តែប៉ុណ្ណោះ។ ដូច្នេះហើយបានជាការស្រាវជ្រាវនេះ ត្រូវធ្វើមិនមែនគ្រាន់តែត្រឹមតែក្រុមគ្រួសារឯកឧត្តម ឆែម សាវុធប៉ុណ្ណោះទេ ប៉ុន្តែនៅក្នុងក្របខណ្ឌក្រសួងមហាផ្ទៃ និងបន្ថែមដល់ការពាក់ព័ន្ធនានាទៅតាមខេត្តនានាផងដែរ»។
តាមការបញ្ជាក់របស់លោកនាយករដ្ឋមន្រ្តី គិតត្រឹមព្រឹកនេះក្រុមគ្រូពេទ្យបានយកសំណាកចំនួន៣៣៣២ មកពីខេត្តចំនួន៧ដោយក្នុងនោះវិទ្យាស្ថានប៉ាស្ទ័ និងវិទ្យាស្ថានជាតិសុខភាពសាធារណៈបានធ្វើតេស្តបាន២២៤៧សំណាក ដោយរកឃើញថាវិជ្ជមាន១៤ករណី ប៉ុន្តែ១ករណីនៅសៀមរាបដែលសង្ស័យថាវិជ្ជមានមិនទាន់ត្រូវបានបញ្ជាក់ដោយវិទ្យាស្ថានប៉ាស្ទ័ថាពិតជាមានកូវីដ១៩នៅឡើយទេ៕
