ដំរីឈ្មោលមួយក្បាល ឈ្មោះខាវ៉ាន់ ដែលជាដំរីដ៏ឯកោបំផុតនៅលើពិភពលោក បានមកដល់ទឹកដីខេត្តសៀមរាប ប្រទេសកម្ពុជា នៅរសៀលថ្ងៃទី៣០ ខែវិច្ឆិកា ឆ្នាំ២០២០នេះ បន្ទាប់ពីបានធ្វើដំណើរអស់រយៈពេលជាច្រើនម៉ោងតាមយន្តហោះ ពីប្រទេសប៉ាគីស្ថាន។
រដ្ឋលេខាធិការក្រសួងបរិស្ថាន លោកនេត្រ ភក្ត្រា បានថ្លែងក្នុងពិធីទទួលសត្វដំរីខាវ៉ាន់ នៅអាកាសយានដ្ឋានអន្តរជាតិ ខេត្តសៀមរាប មានប្រសាសន៍ថា ដំរីខាវ៉ាន់ មានអាយុ ៣៥ឆ្នាំ ត្រូវបានក្រុមអភិរក្សសត្វព្រៃ ជួយសង្គ្រោះពីសួនសត្វមួយនៃប្រទេសប៉ាគីស្ថានតាមរយៈការតស៊ូផ្នែកច្បាប់ ហើយចុងក្រោយតុលាការកំពូលប៉ាគីស្ថាន បានសម្រេចឱ្យដំរីមួយនេះ មានសេរីភាព និងបញ្ជូនមករស់នៅក្នុងព្រៃធម្មជាតិនៃដែនជម្រកសត្វព្រៃរបស់ប្រទេសកម្ពុជា។
លោកបន្តថា៖ «កម្ពុជា បានផ្តល់ជម្រកថ្មី ផ្តល់ជីវិតថ្មី និងផ្តល់ក្តីសង្ឃឹមថ្មីដល់ដំរីដ៏ឯកោមួយនេះ»។
លោក នេត្រ ភក្ត្រា ឱ្យដឹងទៀតថា ដំរីខាវ៉ាន់ នឹងត្រូវរស់នៅក្នុងព្រៃធម្មជាតិទំហំជាង ៤ហិកតា ក្នុងដែនជម្រកសត្វព្រៃគូលែនព្រហ្មទេព ក្នុងភូមិសាស្ត្រស្រុកអន្លង់វែង ខេត្តឧត្តរមានជ័យ ជាមួយនឹងសត្វដំរីញីចំនួន ៣ក្បាល ដែលយកមកពីខេត្តមណ្ឌលគិរី ក្រោមការមើលថែ និងការពារ ដោយអង្គការអភិរក្សដែនជម្រកសត្វព្រៃកម្ពុជា ដែលទទួលបានការអនុញ្ញាតពីក្រសួងបរិស្ថាន។
លោកថា៖ «សត្វដំរីអាស៊ី ឈ្មោះខាវ៉ាន់នេះ នឹងត្រូវយកទៅចិញ្ចឹមក្នុងដែនជម្រកសត្វព្រៃគូលែនព្រហ្មទេព ដើម្បីធ្វើការបង្កាត់ពូជជាមួយដំរីក្នុងស្រុក ក្នុងគោលបំណងបង្កើតប្រសិទ្ធភាពក្នុងការបន្តពូជសត្វដំរីអាស៊ី ឱ្យកាន់តែប្រសើរឡើងថែមទៀត ជៀសវាងការបង្កាត់ជាន់ពូជ បង្កើននានាពន្ធុ (សេនេទិច) ការធន់នឹងអាកាសធាតុ និងជំងឺ និងសម្រាប់ជំរុញក្នុងវិស័យទេសចរណ៍ធម្មជាតិនៅកម្ពុជា»។
រដ្ឋលេខាធិការក្រសួងបរិស្ថានរូបនេះ បានបន្តទៀតថា ដំរីខាវ៉ាន់ គឺជាប្រភេទដំរីអាស៊ីដែលជាប្រភេទរងការគំរាមកំហែង ខណៈកម្ពុជាមានប្រភេទដំរីអាស៊ីនេះ ចន្លោះពី ៤០០ ទៅ ៦០០ក្បាល ដែលកំពុងតែរស់នៅក្នុងព្រៃនៃតំបន់ការពារធម្មជាតិរបស់កម្ពុជា ក្នុងខេត្តរតនគិរី និងមណ្ឌលគិរី និងនៅក្នុងតំបន់ជួរភ្នំក្រវ៉ាញ។
ចំណែក ដំរីស្រុកវិញ លោកថា នៅកម្ពុជា មានប្រមាណជាង ៧០ក្បាល។
លោកនេត្រ ភក្ត្រា បន្តទៀតថា ជាមួយវិធានការអនុវត្តច្បាប់ដ៏តឹងរឹងរបស់សមត្ថកិច្ច និងការខិតខំប្រឹងប្រែងការពារនិងអភិរក្សរបស់រាជរដ្ឋាភិបាល នៅក្នុងរយៈពេលជាង ១០ឆ្នាំចុងក្រោយនេះ កម្រិតនៃបទល្មើសបរបាញ់សម្លាប់សត្វដំរីព្រៃ ដើម្បីយកភ្លុកនិងកន្ទុយ ដើម្បីប្រើប្រាស់តាមជំនឿពីបុរាណមកនៅកម្ពុជា មានការធ្លាក់ចុះយ៉ាងខ្លាំង ស្ទើរតែគ្មាន។
លោកបានបន្ថែមថា យោងតាមការប៉ាន់ស្មានផែនការសកម្មភាពរយៈពេល ១០ឆ្នាំ ដើម្បីអភិរក្សសត្វដំរីព្រៃអាស៊ីនេះ ត្រូវការថវិកាចំនួន ៤០,៥លានដុល្លារសហរដ្ឋអាមេរិក ដែលជាគម្រោងថវិការំពឹងថានឹងបានមកពីប្រភពរួមបញ្ចូលគ្នា ទាំងកញ្ចប់ថវិការាជរដ្ឋាភិបាល អង្គការមិនមែនរដ្ឋាភិបាល និងដៃគូអភិវឌ្ឍន៍នានា៕