លោកនាយករដ្ឋមន្ត្រី ហ៊ុន សែន ណែនាំដល់រដ្ឋមន្ត្រី និងអភិបាលរាជធានី-ខេត្ត អាចមានសិទ្ធិបិទផ្នែកខ្លះនៃក្រសួង សាលារៀន រួមទាំងអាហារដ្ឋាន ភោជនីយដ្ឋាន ឬទីតាំងមួយចំនួនបើសិនជាប់ពាក់ព័ន្ធនឹង«ភរិយាអគ្គនាយកពន្ធនាគារ»ដែលឆ្លងកូវីដ១៩។
លោកនាយករដ្ឋមន្ត្រី ហ៊ុន សែន បានថ្លែងតាមរយៈសារជាសំឡេងកាលពីមិ្សលមិញថា ការឆ្លងកូវីដ១៩របស់ភរិយាអគ្គនាយកពន្ធនាគារ ជាបញ្ហាធ្ងន់ធ្ងរសម្រាប់កម្ពុជា ក្នុងរយៈពេល១១ខែ ដែលបានឆ្លងកាត់តាំងពីដើមឆ្នាំមកនោះ។
លោកបន្តថា ករណីនេះ លោកបានសម្រេចឱ្យរដ្ឋមន្ត្រីក្រសួងមហាផ្ទៃ លោកស ខេង ពិនិត្យ និងសម្រេចក្នុងការបិទផ្នែកណាខ្លះ ឬក្រសួងតែម្តង ដើម្បីទប់ស្កាត់ការឆ្លងរាលដាលនៃជំងឺកូវីដ១៩ ហើយជំនួសឱ្យមន្ត្រីធ្វើការពីផ្ទះមកវិញ។
ក្រៅពីនោះ លោកនាយករដ្ឋមន្ត្រី ហ៊ុន សែន ក៏បានណែនាំដល់រដ្ឋមន្ត្រី ថ្នាក់ដឹកនាំក្រសួងនានា ក៏ដូចជាអភិបាលរាជធានី-ខេត្តមួយចំនួនទៀត ដែលមានជាប់ពាក់ព័ន្ធព្រឹត្តិការណ៍នេះ មានសិទ្ធិចាត់ចែងក្នុងការបិទក្រសួង ឬផ្នែកខ្លះ ក៏ដូចជា បិទសាលា អាហារដ្ឋាន ភោជនីយដ្ឋាន និងទីតាំងដទៃទៀតផងដែរ។
ភ្លាមៗក្រោយពីមានផ្ដល់សិទ្ធិបែបនេះ រដ្ឋមន្ត្រីក្រសួងអប់រំ យុវជន និងកីឡា សម្រេចផ្អាកដំណើរការគ្រឹះស្ថានសិក្សាឯកជនជាបណ្តោះអាសន្ន រយៈពេល២សប្តាហ៍ ចាប់ពីថ្ងៃជូនដំណឹងនេះតទៅ។
ក្នុងសេចក្តីជូនដំណឹងរបស់ក្រសួងអប់រំ ចុះថ្ងៃទី២៩ ខែវិច្ឆិកា បានបញ្ជាក់ថា ការផ្អាកដំណើរការសិក្សានេះ ដើម្បីចៀសវាងការឆ្លងជំងឺកូវីដ១៩ ចូលសាលារៀន និងការរីករាលដាលក្នុងសហគមន៍។
ក្រសួងបញ្ជាក់ថា ទោះបីការសិក្សាផ្អាក ប៉ុន្តែគ្រឹះស្ថានទាំងអស់ អាចបន្តការសិក្សាតាមប្រព័ន្ធអេឡិចត្រូនិក លើកលែងតែថ្នាក់ទី១២ ដែលត្រូវបន្តការសិក្សាត្រៀម ប្រឡងសញ្ញាបត្រមធ្យមសិក្សាទុតិយភូមិ សម័យប្រឡងថ្ងៃទី២១ ធ្នូ ឆ្នាំ២០២០។
បើទោះជាគ្រឹះស្ថានសិក្សាឯកជនត្រូវផ្អាកក្ដី ក្រសួងអប់រំ បញ្ជាក់ថា ការប្រឡងសញ្ញាបត្រមធ្យមសិក្សាបឋមភូមិ(ថ្នាក់ទី៩)ទូទាំង២៥រាជធានី-ខេត្ត នៅតែដំណើរការដដែលនៅថ្ងៃនេះ៕
