លោកនាយករដ្ឋមន្ត្រី ហ៊ុន សែន បានចេញបញ្ជាបន្ទាន់មួយនៅថ្ងៃចន្ទនេះ ឱ្យបិទជាបណ្តោះអាសន្នកម្មវិធីជួបប្រជុំ មង្គលការ និងពិធីបុណ្យផ្សេងៗតាមបែបសាសនា ដើម្បីទប់ស្កាត់ការរាលដាលនៃជំងឺកូវីដ១៩ខណៈក្រសួងរកឃើញថា មនុស្ស ១៤នាក់ហើយ បានឆ្លងកូវីដ១៩ត្រឹមរយៈពេលពីរថ្ងៃមកនេះ។
គិតត្រឹមថ្ងៃចន្ទនេះ មនុស្ស ១៤នាក់ហើយ ត្រូវបានក្រសួងសុខាភិបាលរកឃើញថា បានផ្ទុកកូវីដ១៩ ក្រោយពីរកឃើញករណីឆ្លងក្នុងសហគមន៍លើកដំបូងលើភរិយាយលោក ឆែម សាវុធ អគ្គនាយកនៃអគ្គនាយកពន្ធនាគារក្រសួងមហាផ្ទៃ។
លោកនាយករដ្ឋមន្ត្រី តាមរយៈសារសំឡេង បានចេញបញ្ជាទៅមន្ត្រីពាក់ព័ន្ធឱ្យផ្អាកជាបណ្តោះអាសន្ននូវពិធីមង្គលការ ពិធីបុណ្យទាន កម្មវិធីសិក្សាឯកជននិងរដ្ឋ សម្រាប់ទីក្រុងភ្នំពេញ និងខេត្តសៀមរាប ដែលមាននុស្សជួបជុំចាប់ពី ២០នាក់ឡើងទៅ។
លោកថា ការបិទនេះមានរយៈពេល ១៥ថ្ងៃ គឺចាប់ពីថ្ងៃទី១ ដល់ថ្ងៃទី១៥ ឬ១៦ខែធ្នូ ជាអ្វីដែលលោកថា ដើម្បីទប់ស្កាត់ការឆ្លងរាលដាលនៃជំងឺកូវីដ១៩។
លោក ហ៊ុន សែន បញ្ជាថា៖ «សុំស្នើការយោគយល់ពីសំណាក់ប្រជាពលរដ្ឋក្នុងាការជួបជុំណាក៏ដោយ គឺសុំផ្អាកជាបណ្តោះអាសន្នរយៈពេល ១៥ថ្ងៃ ទាំងអាពាហ៍ពិពាហ៍ ទាំងការជួបជុំដែលអាចថាមនុស្សលើសពី២០នាក់ទៅ គឺមិនត្រូវមានការជួបជុំទេ»។
កាលពីថ្ងៃអាទិត្យកន្លងមកនេះ ក្រសួងរកឃើញអ្នកផ្ទុកកូវីដ១៩មុនគេ គឺភរិយាលោក ឆែម សាវុធ ដែលថា គាត់មានអការៈ១០ថ្ងៃគិតត្រឹមថ្ងៃរកឃើញ។ ក្រសួងថា អំឡុងពេលនោះ គាត់បានធ្វើដំណើរទៅផ្សារមួយចំនួនក្នុងរាជធានីភ្នំពេញ និងទៅសម្រាកនៅខេត្តសៀមរាបចំនួន៥ថ្ងៃ។
ក្នុងពិធីបើកការដ្ឋានធ្វើផ្លូវនៅខេត្តសៀមរាបព្រឹកមិញនេះដែរ លោកនាយករដ្ឋមន្រ្តី ហ៊ុន សែន បានអំពាវនាវឱ្យអ្នកពាក់ព័ន្ធចូលរួមធ្វើតេស្តយកសំណាកមកពិនិត្យ ដើម្បីតាមដានសុខភាព និងទប់ស្កាតក់ការឆ្លងរីករាលដាលទ្រង់ទ្រាយធំចូលក្នុងសហគមន៍។
មេដឹកនាំរូបនេះ ថ្លែងទៀតថា មហន្តរាយរបស់កម្ពុជា វានឹងកើតមាន បើត្រឹម ១៥ថ្ងៃទៀត វិធានការទប់ស្កាត់មិនមានប្រសិទ្ធភាពទេនោះ។
លោក ហ៊ុន សែន ថ្លែងថា៖ «ឥឡូវ យើងអត់ទាន់ដឹងថា ក្រុមគ្រួសាររបស់ឯកឧត្តម ឆែម សាវុធ ឆ្លងពីអ្នកណាទេ រកអត់ទាន់ឃើញក្បាលកន្ទុយទេ នៅកន្លែងហ្នឹង។ នោះហើយជាចំណុចដែលលំបាកដែលយើងចាត់ទុកថា វាជាមហន្តរាយមួយសម្រាប់ប្រទេសរបស់យើងទប់ស្កាត់មិនទាន់ពេលវេលា។ ឥឡូវនេះ យើងអាចនិយាយបានថា យើងគ្រប់គ្រងបាន ឬមិនបានស្ថិតក្នុងរយៈពេល ១៥ថ្ងៃខាងមុខ»។
នាយករដ្ឋមន្ត្រីក៏បានចេញបញ្ជាផងដែរ ឱ្យក្រសួងសុខាភិបាល ដែលជាអ្នកគ្រប់គ្រងថវិកាបានពីការចូលរួមវិភាគទានឱ្យទម្លាក់លុយទៅតាមបណ្តាខេត្តជាគោលដៅក្នុងមួយខេត្ត ៥០លានរៀល ដើម្បីឧបត្ថម្ភគ្រួសារក្រីករ ដែលមកធ្វើចត្តាឡីស័កនូវថិវកាមួយគ្រួសារ ២ម៉ឺនរៀល ក្នុងបំណងជួយសម្រួលដល់បន្ទុកគ្រួសាររបស់ពួកគេ។
លោក ហ៊ុន សែន ថ្លែងបន្តថា៖ «អ៊ីចឹង ខ្ញុំកំណត់ជាគោលការណ៍តែម្តង ក្នុង ១គ្រួសារទទួលបាន ២ម៉ឺនរៀលក្នុង១ថ្ងៃ ប៉ុន្តែ យើងរាប់លំដាប់តែអ្នកក្រីក្របានហើយ ដែលយើងមានប័ណ្ណក្រីក្រហើយស្រេច»។
នាយករដ្ឋមន្ត្រីថ្លែងដែរថា ថវិកាជាង ៤២ពាន់លានរៀលដែលបានពីវិភាគទានសម្រាប់ត្រៀមចំណាយ ក្នុងនោះជាង ៣៧ពាន់លានរៀល បានដាក់ក្នុងធនាគារហើយ និងត្រៀមថវិកាជាតិមួយចំនួនទៀតបើមិនគ្រប់។
អ្នកនាំពាក្យក្រសួងសុខាភិបាល អ្នកស្រី ឱ វណ្ណឌីន មិនអាចសុំការបញ្ជាក់បាន។ ប៉ុន្តែ តាមហ្វេសប៊ុករបស់នាយករដ្ឋមន្ត្រីនៅថ្ងៃនេះ រដ្ឋាភិបាលបានសម្រេចបញ្ចេញសាច់ប្រាក់ជាង ១០០០លានរៀលជូនទៅរាជធានីខេត្តនៅទូទាំងប្រទេស សម្រាប់ជួយដល់គ្រួសារក្រីក្រដែលត្រូវធ្វើចត្តាឡីស័ក។
ប្រធានសមាគមប្រជាធិបតេយ្យនៃសេដ្ឋកិច្ចក្រៅប្រព័ន្ធលោក វន់ ពៅ មានប្រសាសន៍ វិធានការទប់ស្កាត់របស់រដ្ឋាភិបាលជារឿងល្អមួយ ប៉ុន្តែលោកថា ការផ្ទុះកូវីដពីរលើកមកនេះ បង្ករឡើងពីមន្ត្រីរដ្ឋាភិបាល ដែលមិនបានគោរពតាមការណែនាំរបស់ក្រសួងសុខាភិបាល បង្ករផលប៉ះពាល់អ្នកក្រីក្រច្រើនម៉ឺននាក់ដែលមិនជាប់ពាក់ព័ន្ធសោះ។
លោក វន់ ពៅ ប្រាប់ថា៖ «ដើម្បីឱ្យប្រសើរជាងនេះ រដ្ឋាភិបាលគួរចាត់វិធានការយ៉ាងតឹងរឹងចំពោះមន្ត្រីរដ្ឋាភិបាលទំាងអស់ដែលតែងតែនាំមកនូវបញ្ហាកូវីដ១៩ ដែលធ្វើឱ្យមានកង្វល់ទៅដល់ប្រជាពលរដ្ឋខ្មែរ ហើយការផ្អាកពិធីផ្សេងៗ វាជារឿងមួយដែលខ្ញុំគិតថា អ្នកខ្លះពិបាកក្នុងការបត់បែន»។
លោក ហ៊ុន សែន ក៏បានថ្លែងផងដែរថា ការគ្រប់គ្រងសភាពការណ៍ទប់ស្កាត់កូវីដ១៩លើកនេះ លោកនឹងមិនធ្វើដំណើរទៅវិមានសន្តិភាពដូចពេលមុនទេ ដោយប្រើប្រាស់គេហដ្ឋានផ្ទាល់របស់លោកសម្រាប់ផ្សាយផ្ទាល់តាមរយៈទូរទស្សន៍ជាតិ៕