រដ្ឋាភិបាល សម្រេចបិទបវេសនកាលឆ្នាំសិក្សា២០១៩-២០២០ ក្នុងថ្ងៃនេះ ខណៈដំណើរការប្រឡងសញ្ញាបត្រមធ្យមសិក្សាបឋមភូមិ នៅថ្ងៃនេះ ប្រព្រឹត្តទៅដោយរលូន ហើយការប្រឡងបាក់ឌុបនៅខែធ្នូខាងមុខ ក៏នៅតែប្រព្រឹត្តទៅតាមការគ្រោងទុក។
លោកនាយករដ្ឋមន្ត្រី ហ៊ុន សែន ថ្លែងក្នុងពិធីបើកការដ្ឋានសាងសង់ និងកែលំអរផ្លូវ ៣៨ខ្សែ នៅក្រុងសៀមរាប នៅថ្ងៃចន្ទនេះថា ការសម្រេចបិទឆ្នាំសិក្សា២០១៩-២០២០ ធ្វើឡើងនៅថ្ងៃទី៣០ ខែវិច្ឆិកានេះតែម្តង ដោយធ្វើឡើងទៅតាមការស្នើរបស់ក្រសួងអប់រំ។
លោកថា៖ «ប្រឡងមធ្យមសិក្សាបឋមភូមិ នៅថ្ងៃនេះតែម្តង ហើយប្រឡងនៅតាមសាលារៀងៗខ្លួន ប៉ុន្តែអ្នកដែលត្រូវរៀនបន្ត គឺនៅមានសិក្សាថ្នាក់ទី១២ មិនជាច្រើនប៉ុន្មានទេ ហើយសិស្សថ្នាក់ទី១២ សុទ្ធតែជាអ្នកចេះការពារខ្លួន[ពីជំងឺកូវីដ១៩] មិនដូចក្មេងៗទេ ព្រោះពួកគេត្រូវប្រឡងនៅពេលខាងមុខ។ ដូច្នេះ នៅសល់សិស្សថ្នាក់ទី១២ គេអាចរៀនបំប៉ន ដើម្បីឈានទៅរកការប្រឡងមធ្យមសិក្សាទុតិយភូមិ[បាក់ឌុប]»។
លោកនាយករដ្ឋមន្ត្រី បញ្ជាក់ថា ចំពោះការបើកបវេសនកាលឆ្នាំសិក្សាថ្មី ឆ្នាំ២០២០-២០២១ គ្រោងនឹងធ្វើនៅថ្ងៃទី១១ ខែមករា ឆ្នាំ២០២១ ខាងមុខនេះ ដោយមើលទៅតាមទិដ្ឋភាពជាក់ស្ដែង។
លោកថ្លែងថា៖ «យើងនឹងពិនិត្យជាក់ស្ដែងតាមសភាពការណ៍វាអនុគ្រោះឱ្យយើងធ្វើឬទេ»។
ការប្រឡងសញ្ញាបត្រមធ្យមសិក្សាបឋមភូមិ(ថ្នាក់ទី៩)ទូទាំង២៥រាជធានី-ខេត្ត នៅថ្ងៃនេះ បានធ្វើតាមការគ្រោងទុក បើទោះជាមានករណីឆ្លងកូវីដ១៩ នៅក្នុងសហគមន៍ក៏ដោយ ខណៈគ្រឹះស្ថានសិក្សាឯកជនវិញ ក្រសួងអប់រំ បានសម្រេចឱ្យផ្អាកដំណើរការជាបណ្តោះអាសន្ន រយៈពេល២សប្តាហ៍ ចាប់ពីថ្ងៃទី២៩ ខែវិច្ឆិកាតទៅ។
សេចក្តីជូនដំណឹងរបស់ក្រសួងអប់រំ ចុះថ្ងៃទី២៩ ខែវិច្ឆិកានេះ បានលើកហេតុផលថា ការផ្អាកដំណើរការសិក្សានេះ ដើម្បីចៀសវាងការឆ្លងជំងឺកូវីដ១៩ ប៉ុន្តែគ្រឹះស្ថានទាំងអស់ អាចបន្តការសិក្សាតាមប្រព័ន្ធអេឡិចត្រូនិក លើកលែងតែថ្នាក់ទី១២ ដែលត្រូវបន្តការសិក្សាត្រៀមប្រឡងសញ្ញាបត្រមធ្យមសិក្សាទុតិយភូមិ សម័យប្រឡងថ្ងៃទី២១ ធ្នូ ឆ្នាំ២០២០។
អ្នកនាំពាក្យក្រសួងអប់រំ យុវជន និងគីឡា លោក រស់ សុវាចា ប្រាប់វីអូឌីនៅថ្ងៃនេះថា ការប្រឡងបាក់ឌុប នឹងធ្វើទៅតាមកាលបរិច្ឆេទ និងដំណើរការតាមការគ្រោងទុក ទោះបីបច្ចុប្បន្នមានករណីឆ្លងកូវីដនៅក្នុងសហគមន៍ក៏ដោយ។
លោកបានថ្លែងថា៖«សិស្សថ្នាក់ទី១២ នៅតែបន្តរៀនសូត្រ ដើម្បីត្រៀមប្រឡងសញ្ញាបត្រមធ្យមសិក្សាទុតិយភូមិ សម័យប្រឡងថ្ងៃទី២១ ខែធ្នូ ឆ្នាំ២០២០ ខាងមុខនេះ»។
ចំពោះដំណើរការប្រឡងមធ្យមសិក្សាបឋមភូមិ ឬការប្រឡងឌីប្លូម នៅថ្ងៃនេះ លោក រស់ សុវាចា បានឱ្យដឹងថា បានប្រព្រឹត្តទៅដោយរលូនតាមការគ្រោងទុក ខណៈគណៈគ្រប់គ្រងគ្រឹះស្ថានសិក្សា បេក្ខជនប្រឡង និងគ្រប់ភាគីពាក់ព័ន្ធ បានអនុវត្តវិធានការសុខាភិបាលបានខ្ជាប់ខ្ជួន។
កញ្ញា ថោង ស័កខាំម៉ានីតា ជាសិស្សថ្នាក់ទី៩ នៅវិទ្យាល័យជាស៊ីម បឹងកេងកង និយាយថា បញ្ហាកូវីដ១៩ បានបង្កប៉ះពាល់ដល់ការសិក្សារបស់ពួកគាត់ដែរ ដោយសារការរៀនតាមអនឡាញមិនសូវយល់ ដូចការរៀនផ្ទាល់ក្នុងសាលានោះទេ។
កញ្ញាថា៖ «វាប៉ះពាល់តិចតួចដែរ ព្រោះយើងមិនបានរៀនដិតដល់អ៊ីចឹង យើងរៀន[នៅសាលា]បានបន្តិចឈប់ៗអ៊ីចឹងទៅ ដល់ពេលចេញប្រឡង សំណួរខ្លះយើងចេះធ្វើសំណួរខ្លះអត់ចេះ»។
ដើរពីសាលាជាមួយមិត្តភក្តិ បន្ទាប់ពីបញ្ចប់ការប្រឡងនៅវិទ្យាល័យបឹងត្របែក កញ្ញា គង់ លីហ្សា និយាយថា ដំបូងឡើយពួកគាត់មានការបារម្ភចំពោះការប្រឡង ដោយសារអំឡុងកូវីដ១៩ នេះ ពួកគាត់មិនបានមករៀននៅសាលាដិតដល់នោះទេ។
តែយ៉ាងណា កញ្ញាថា៖ «វិញ្ញាសារសមរម្យ ព្រោះអីគ្រូគាត់បន្ធូរ ការប្រឡងមិនសូវអីទេ ព្រោះសិស្សខ្លះ គាត់ក៏បានមើលមេរៀនពីផ្ទះខ្លៈដែរ»។
ចំណែក យុវជន ម៉ៅ សារិទ្ធ សិស្សថ្នាក់ទី៩ថ ដែលប្រឡងនៅវិទ្យាល័យ ហ៊ុនសែន ប៊ុនរ៉ានី ផ្សារដើមថ្កូវ និយាយថា វិញ្ញាសារប្រឡងនៅថ្ងៃនេះ មិនសូវលំបាកនោះទេ ព្រោះពួកគាត់អាចធ្វើបាន។ យុវជនរូបនេះថា ការប្រឡងឌីប្លូមថ្ងៃនេះ សាលាបានអនុវត្តទៅតាមសេចក្ដីណែនាំរបស់ក្រសួងសុខាភិបាល ដោយឱ្យសិស្សអង្គុយមានគម្លាតឆ្ងាយពីគ្នា ហើយបាញ់អាកុល ពាក់ម៉ាស់ការពារជាដើម។
អ្នកគ្រូ ម៉ី បូរ៉ា ដែលជាមេប្រយោគនៅវិទ្យាល័យ ហ៊ុនសែន ប៊ុនរ៉ានី ផ្សារដើមថ្កូវ មានប្រសាសន៍ថា បើទោះបីជាការប្រឡងធ្វើឡើង ស្របពេលដែលកម្ពុជាកំពុងឆ្លងរាលដានជំងឺកូវីដ១៩ ក្ដី តែមណ្ឌលប្រឡង បានអនុវត្តត្រឹមត្រូវតាមការណែនាំរបស់ក្រសួងសុខាភិបាល។
អ្នកគ្រូនិយាយថា៖ «ឃើញថា គាត់គោរពតាមបទបញ្ជារបស់រាជរដ្ឋាភិបាលបានល្អ ហើយការប្រឡងរបស់សិស្សគាត់ពាក់ម៉ាស់ គាត់អង្គុយឃ្លាតពីគ្នា ហើយគាត់យកចិត្តទុកដាក់តាមការណែនាំរបស់គ្រូបានល្អ»។
បើតាមរបាយការណ៍ពីក្រសួងអប់រំ បេក្ខជនដែលត្រូវប្រឡងទូទាំង ២៥រាជធានី-ខេត្ត នៅថ្ងៃនេះ មានចំនួនសរុប ១៥៨ ៧១៧នាក់ (១៥ម៉ឺន៨ពាន់៧១៧នាក់) ដែលប្រព្រឹត្តទៅតាមមណ្ឌលប្រឡងចំនួន ១ ៧២៩ ហើយមានបន្ទប់ប្រឡងចំនួន ៧ ១៤៦បន្ទប់។
កាលពីមិ្សលមិញ លោកនាយករដ្ឋមន្ត្រី ហ៊ុន សែន បានផ្តល់សិទ្ធិឱ្យរដ្ឋមន្ត្រី និងអភិបាលរាជធានី-ខេត្ត អាចបិទផ្នែកខ្លះនៃក្រសួង សាលារៀន រួមទាំងអាហារដ្ឋាន ភោជនីយដ្ឋាន ឬទីតាំងមួយចំនួន បើសិនជាប់ពាក់ព័ន្ធនឹង«ភរិយាអគ្គនាយកពន្ធនាគារ»ដែលឆ្លងជំងឺកូវីដ១៩៕