អគ្គស្នងការនគរបាលជាតិ បានដាក់បទបញ្ជាឱ្យផ្អាកការផាកពិន័យទៅលើអ្នកល្មើសច្បាប់ចរាចរណ៍ជាបណ្ដោះអាសន្ន រយៈពេល១៥ថ្ងៃ ឬរង់ចាំព្រឹត្ដិការណ៍ «សហគមន៍ ២៨វិច្ឆិកា» ត្រូវបានបិទបញ្ចប់។
យោងតាមសារជាសំឡេងរបស់អគ្គស្នងការរងនៃអគ្គស្នងការដ្ឋាននគរបាលជាតិ និងជាស្នងការនគរបាលរាជធានីភ្នំពេញ លោកឧត្តមសេនីយ៍ឯក ស ថេត ដែលបានផ្សព្វផ្សាយជាសាធារណៈតៗគ្នា នៅថ្ងៃទី០១ ខែធ្នូ ឆ្នាំ២០២០ ឱ្យដឹងថា ថ្នាក់ដឹកនាំអគ្គស្នងការនគរបាលជាតិ បានណែនាំឱ្យផ្អាកការផាកពិន័យទៅលើអ្នកល្មើសច្បាប់ចរាចរណ៍ផ្លូវគោក ក្នុងរយៈពេល១៥ថ្ងៃ ចាប់ពីថ្ងៃនេះ ដល់ថ្ងៃទី១៥ ខែធ្នូ ដោយរង់ចាំនូវការណែនាំជាថ្មី។
លោកបន្តថា៖ «រង់ចាំក្រោយថ្ងៃទី១៥ និងទី១៦ យើងនឹងពិចារណាឡើងវិញ ប៉ុន្តែក្នុងរយៈពេលនេះ យើងគ្រាន់តែសម្រួលចរាចរណ៍ជូនប្រជាពលរដ្ឋដែលធ្វើដំណើរនៅក្នុងរាជធានីភ្នំពេញតែប៉ុណ្ណោះ»។
ទោះយ៉ាងណា លោកថា បើទោះជាមានការផ្អាកការផាកពិន័យបណ្ដោះអាសន្នមែន ប៉ុន្ដែមន្ដ្រីនគរបាលចរាចរណ៍ដែលប្រចាំការនៅតាមគោលដៅទាំងអស់ ត្រូវបន្តជួយសម្រួលចរាចរណ៍ជូនប្រជាពលរដ្ឋដែលធ្វើដំណើរនៅក្នុងរាជធានីភ្នំពេញដដែល៕
