អាជ្ញាធររាជធានីភ្នំពេញ អំពាវនាវដល់ម្ចាស់ទីតាំងជួលរៀបចំកម្មវិធីនិងផ្ដល់សេវាផ្សេងៗ កុំកាត់លុយឬយកលេសទាមទារសំណងនៃការខាតបង់ពីម្ចាស់កម្មវិធីដែលបានកក់ប្រាក់ ខណៈដែលម្ចាស់កម្មវិធីទាំងនោះពន្យារពេលឬរំសាយកម្មវិធីពួកគេ ដោយសារវិបត្តិជំងឺកូវីដ១៩។
សេចក្តីអំពាវនាវរបស់រដ្ឋបាលរាជធានីភ្នំពេញ ចុះថ្ងៃទី០១ ខែធ្នូ ឆ្នាំ២០២០នេះ បានលើកឡើងថា ក្រោយពីមានការណែនាំរបស់ប្រមុខរាជរដ្ឋាភិបាល ប្រជាពលរដ្ឋមួយចំនួនដែលគ្រោងរៀបចំកម្មវិធីអាពាហ៍ពិពាហ៍ ពិធីបុណ្យ និងកម្មវិធីជួបជុំផ្សេងៗ បានសម្រេចលើកពេលឬរំសាយកម្មវិធី ដើម្បីចូលរួមទប់ស្កាត់ការឆ្លងរាលដាលមេរោគកូវីដ១៩។
ករណីនេះ រដ្ឋបាលរាជធានីភ្នំពេញ អំពាវនាវដល់ម្ចាស់មជ្ឈមណ្ឌលអគារ ភោជនីយដ្ឋាន ទីតាំងសម្រាប់ជួលរៀបចំកម្មវិធីទាំងអស់ ម្ចាស់សម្អាងការ ម្ចាស់អាជីវកម្មចុងភៅ ម្ចាស់អាជីវកម្មលក់ភេសជ្ជៈ និងសេវាកម្មសម្រាប់កម្មវិធីផ្សេងៗទៀត មេត្តាយោគយល់ និងកុំកាត់លុយ ឬយកលេសទារសំណងនៃការខាតបង់ពីម្ចាស់កម្មវិធីដែលបានកក់ទុក។
រដ្ឋបាលរាជធានីភ្នំពេញ បន្តថា៖ «ព្រមទាំងត្រូវចៀសវាងការយកឱកាសនេះ ដើម្បីកេងចំណេញពីប្រជាពលរដ្ឋ ដែលបានស្ម័គ្រចិត្តចូលរួមក្នុងការបង្ការនិងទប់ស្កាត់ការរីករាលដាលនៃមេរោគកូវីដ១៩ ក្នុងព្រឹត្តិការណ៍សហគមន៍២៨វិច្ឆិកា នៅរាជធានីភ្នំពេញ»។
រដ្ឋបាលរាជធានីភ្នំពេញ សង្ឃឹមថា ម្ចាស់អាជីវកម្មដែលផ្តល់សេវារៀបចំកម្មវិធីទាំងនោះ នឹងចូលរួមអនុវត្តតាមការអំពាវនាវនេះ ដោយស្មារតីយោគយល់ អធ្យាស្រ័យ និងឈរលើស្មារតីសាមគ្គីជាតិជាធ្លុងមួយ ក្នុងការទប់ស្កាត់ការរីករាលដាលមេរោគកូវីដ-១៩ក្នុងសហគមន៍។
កាលពីថ្ងៃចន្ទម្សិលមិញ លោកនាយករដ្ឋមន្ត្រី ហ៊ុន សែន បានចេញបញ្ជាបន្ទាន់មួយឱ្យបិទជាបណ្តោះអាសន្ននូវកម្មវិធីជួបប្រជុំផ្សេងៗ រួមទាំងមង្គលការ និងពិធីបុណ្យផ្សេងៗតាមបែបសាសនា ដើម្បីទប់ស្កាត់ការរាលដាលជំងឺកូវីដ១៩ ខណៈក្រសួងសុខាភិបាលរកឃើញថា មនុស្ស១៧នាក់ហើយបានឆ្លងជំងឺកូវីដ១៩ក្នុងព្រឹត្តិការណ៍សហគមន៍២៨វិច្ឆិកា៕