ក្រសួងសុខាភិបាល រកឃើញស្ត្រី ២នាក់ បានឆ្លងជំងឺកូវីដ១៩ក្នុងព្រឹត្តិការណ៍សហគមន៍ ២៨វិច្ឆិកា ក្នុងនោះមានម្នាក់ជាភរិយាប្រធាននាយកដ្ឋានពន្ធនាគារនៃក្រសួងមហាផ្ទៃ និងម្នាក់ទៀតជាបុគ្គលិកធនាគារកាធេយូណាយធីត រាជធានីភ្នំពេញ។
សេចក្តីជូនព័ត៌មានរបស់ក្រសួងសុខាភិបាល នៅថ្ងៃទី០៣ ខែធ្នូ ឆ្នាំ២០២០ ឱ្យដឹងថា ស្ត្រី ២នាក់ ដែលរកឃើញវិជ្ជមានវីរុសកូវីដ១៩នោះ ជាបងប្អូនបង្កើតនឹងគ្នា រស់នៅសង្កាត់វាលស្បូវ ខណ្ឌច្បារអំពៅ រាជធានីភ្នំពេញ ហើយបច្ចុប្បន្ន អ្នកជំងឺ ត្រូវបានដាក់ឱ្យសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។
ក្រសួងបន្តថា ដោយសារអ្នកជំងឺម្នាក់ ជាបុគ្គលិកធនាគារកាធេ សាខាផ្លូវសម្តេចប៉ាន រាជធានីភ្នំពេញ ហើយធនាគារនេះ មានបុគ្គលិកច្រើនកំពុងធ្វើការនៅទីនោះ ទើបលោកនាយករដ្ឋមន្ត្រី ហ៊ុន សែន សម្រេចឱ្យធនាគារនេះផ្អាកដំណើរការជាបណ្តោះអាសន្នសិន ក្នុងរយៈពេល ១៤ថ្ងៃ ដោយគិតចាប់ពីថ្ងៃទី០៣ ខែធ្នូ ឆ្នាំ២០២០នេះទៅ ដើម្បីឱ្យក្រុមការងារក្រសួងសុខាភិបាល ចុះយកវត្ថុសំណាកបុគ្គលិកទាំងអស់ ទៅធ្វើតេស្ត និងតម្រូវឱ្យធ្វើចត្តាឡីស័ក។
ក្រសួងសុខាភិបាល បានបន្តទៀតថា គិតចាប់ពីថ្ងៃទី២៩ ខែវិច្ឆិកា មកដល់ថ្ងៃទី២ ខែធ្នូ ឆ្នាំ២០២០ ក្រសួងបានធ្វើតេស្តអ្នកប៉ះពាល់សរុបទាំងអស់ បានចំនួន ៨ ៧៦៦នាក់ ក្នុងនោះមានអ្នកវិជ្ជមានវីរុសកូវីដ១៩ ចំនួន ១៩នាក់ ដែលកំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។
ក្រសួងបានក្រើនរំលឹកជាថ្មី ដល់ប្រជាពលរដ្ឋទាំងអស់ ដែលជាប់ពាក់ព័ន្ធនឹងព្រឹត្តិការណ៍សហគមន៍២៨វិច្ឆិកា ត្រូវធ្វើចត្តាឡីស័កចំនួន១៤ថ្ងៃឱ្យបានត្រឹមត្រូវ និងអនុវត្តវិធានការការពារការចម្លងវីរុសនេះឱ្យបានម៉ត់ចត់បំផុត និងកុំដើរចេញក្រៅផ្ទះ ឬចេញពីមណ្ឌលចត្តាឡីស័ក។
ក្រសួងក៏ណែនាំដល់ប្រជាពលរដ្ឋទូទៅ បន្តការរស់នៅធម្មតាតាមបែបគន្លងថ្មី ដោយពាក់ម៉ាស់ ត្រូវលាងដៃជាមួយសាប៊ូឬអាល់កុលឱ្យបានញឹកញាប់ រក្សាគម្លាតសុវត្ថិភាព ជាពិសេសក្នុងកាលៈទេសៈនេះ បើមិនចាំបាច់ កុំដើរចេញក្រៅផ្ទះ។ បើតាមក្រសួងសុខាភិបាល គិតមកដល់ម៉ោង ៧ព្រឹក ថ្ងៃទី៣ ខែធ្នូ ឆ្នាំ២០២០ កម្ពុជា បានរកឃើញអ្នកឆ្លងជំងឺកូវីដ១៩ សរុបចំនួន ៣៣១នាក់ ក្នុងនោះព្យាបាលសះស្បើយចំនួន ៣០៤នាក់ និងកំពុងសម្រាកព្យាបាលនៅមន្ទីរពេទ្យចំនួន ២៧នាក់៕