លោកនាយករដ្ឋមន្ត្រី ហ៊ុន សែន អំពាវនាវដល់ក្រសួង ស្ថាប័ន និងអាជ្ញាធរពាក់ព័ន្ធ បន្តជួយសម្រួលនិងបង្កភាពងាយស្រួលដល់ជនមានពិការភាព ក្នុងការធ្វើដំណើរចេញចូលទីកន្លែងសាធារណៈ ជាពិសេសទប់ស្កាត់ការរើសអើងនិងការប្រមាថជនមានពិការភាព។
សារលិខិតរបស់លោកនាយករដ្ឋមន្ត្រី ហ៊ុន សែន ក្នុងឱកាសនៃទិវាជនមានពិការភាពកម្ពុជាលើកទី២២ និងទិវាមានពិការភាពអន្តរជាតិលើកទី៣៨ នៅថ្ងៃទី៣ ខែធ្នូ ឆ្នាំ២០២០ លើកឡើងថា បច្ចុប្បន្ន រាជរដ្ឋាភិបាលនិងគ្រប់មជ្ឈដ្ឋានបានយកចិត្តទុកដាក់ចំពោះជនមានពិការភាព ទាំងការលើកកម្ពស់សិទ្ធិ ការលើកស្ទួយសុខុមាលភាព ការផ្តល់ឱកាសការងារ និងការផ្តល់ឧត្តមប្រយោជន៍ផ្សេងទៀតក្នុងវិស័យពិការភាព។
តែយ៉ាងណា លោកនាយករដ្ឋមន្ត្រី អំពាវនាវដល់ក្រសួង ស្ថាប័ន និងអ្នកពាក់ព័ន្ធ បន្តយកចិត្តទុកដាក់ជួយសម្រួលនិងដោះស្រាយបញ្ហាដល់ជនមានពិការភាព ក្នុងនោះ ត្រូវបន្តរៀបចំបង្កលក្ខណៈងាយស្រួលចេញចូលទីកន្លែងសាធារណៈ។
សារលោកនាយករដ្ឋមន្ត្រី បានបញ្ជាក់ថា៖ «ត្រូវបន្តលក្ខណៈងាយស្រួលចេញចូលទីកន្លែងសាធារណៈ សម្រាប់ជនមានពិការភាពគ្រប់ប្រភេទ ដូចជា ការរៀបចំចំណតយានយន្តពិសេសសម្រាប់ជនមានពិការភាព ការធ្វើជម្រាល ការបំពាក់ឧបករណ៍ ធ្នាក់ដៃ ទ្វារ បន្ទាប់ទឹកជនមានពិការភាព ការដាក់ស្លាកសញ្ញានានានៅតាមក្រសួង ស្ថាប័ន មន្ទីរ ផ្លូវថ្នល់ ទីកន្លែងលំហែកាយ មជ្ឈមណ្ឌលវប្បធម៌ កន្លែងលេងកីឡា កន្លែងកម្សាន្ត គ្រឹះស្ថានអប់រំ សណ្ឋាគារ មន្ទីរពេទ្យ មណ្ឌលសុខភាព និងមធ្យោបាយដឹកជញ្ជូន។ល។»។
លោកនាយករដ្ឋមន្ត្រី ហ៊ុន សែន ក៏បានស្នើដល់អាជ្ញាធរមូលដ្ឋានពង្រឹងយន្តការសម្របសម្រួល ទប់ស្កាត់ការរើសអើង ការប្រមាថ និងមាក់ងាយជនមានពិការភាព និងគិតគូរវិភាគប្រភេទអាជីវកម្មនិងមុខរបរដែលសមស្របសម្រាប់ពួកគេដើម្បីឆ្លើយតបនឹងតម្រូវការទីផ្សារ ការបង្កើតសាជីវកម្ម និងការចាប់ផ្តើមធុរកិច្ចដោយខ្លួនឯង។
កញ្ញា យិន សួត អាយុ២១ឆ្នាំ ដែលពិការភ្នែកទាំងសងខាង ធ្វើការនៅអង្គការជនពិការកម្ពុជានិយាយថា បច្ចុប្បន្ន រូបគាត់ជួបការលំបាកនៅពេលធ្វើដំណើរ ដោយមិនអាចទៅណាមកណាដោយខ្លួនឯងបាន។
កញ្ញាស្នើដល់រាជរដ្ឋាភិបាល ជួយដោះស្រាយរៀបចំចិញ្ចើមផ្លូវ រៀបការ៉ូឡា និងដាក់អក្សរប្រេល ដើម្បីឱ្យដឹងថានៅទីនោះជាកន្លែងណា និងកុំឱ្យមានរបាំងឬរនាំងរាំងស្ទះដល់ការធ្វើដំណើរ។
កញ្ញានិយាយថា៖ «សូមដាក់ឱ្យមានអក្សរប្រេល សម្រាប់ឱ្យពួកគាត់ស្ទាបដឹងថាកន្លែងហ្នឹងគេដាក់ថាម៉េច គេសរសេរម៉េច អ៊ីចឹងទៅ! ឬក៏មានសំឡេងអីមួយសម្រាប់ឱ្យជាសញ្ញាមួយឱ្យគាត់បានដឹងអ៊ីចឹង»។
លោក ទិត ឈុន អាយុ២៧ឆ្នាំ ដែលពិការជើងទាំងសងខាង ក៏ស្នើឱ្យមានជម្រាលនៅតាមទីសាធារណៈផ្សេងៗផងដែរ ដើម្បីឱ្យជនពិការជិះរទេះអាចធ្វើដំណើរបានងាយស្រួល។
លោកថា៖ «ជាពិសេសបន្ទប់ទឹកនៅតាមសាធារណៈ គាត់អត់មានជម្រាលជនពិការនៅឡើយ ស្នើសុំឱ្យរាជរដ្ឋាភិបាលនិងមន្ត្រីជាប់ពាក់ព័ន្ធ ជួយធ្វើជម្រាលបន្ទប់ទឹក ដើម្បីឱ្យជនពិការបានបត់ដៃបត់ជើង»។
រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា និងជាអគ្គលេខាធិការក្រុមប្រឹក្សាសកម្មភាពជនពិការ លោក ឯម ច័ន្ទមករា មានប្រសាសន៍ថា ក្រសួងសង្គមកិច្ច និងក្រសួងរៀបចំដែនដី បាននិងកំពុងដោះស្រាយបញ្ហាទាំងនេះហើយ ក្នុងនោះ ក្រសួងទាំងពីរកំពុងរៀបចំកែលម្អហេដ្ឋារចនាសម្ព័ន្ធនៅទីប្រជុំជនធំៗនិងអគារមួយចំនួនដែលមិនបានបង្កលក្ខណៈងាយស្រួលដល់ជនពិការក្នុងការធ្វើដំណើរ។
លោកបញ្ជាក់ថា៖ «ឥលូវនេះ ហេដ្ឋារចនាសម្ព័ន្ធនៅក្នុងតំបន់គោលដៅធំៗនៅរាជធានីភ្នំពេញ ក្រុងព្រះសីហនុ ខេត្តសៀមរាប ដែលជាតំបន់គោលដៅធំៗ ក៏រាជរដ្ឋាភិបាលចាប់ផ្ដើមកែសម្រួលឱ្យមានអក្សរប្រេល ជាពិសេស តាមបណ្ដោយផ្លូវធំៗ ហើយឥលូវនេះ រាល់ផ្សារទំនើប សណ្ឋាគារ នៅពេលដែលគេកសាង [គឺត្រូវតែមានលក្ខណៈងាយស្រួលដល់ជនពិការ]»។
កម្មវិធីអភិវឌ្ឍន៍អង្គការសហប្រជាជាតិ ហៅកាត់ថា UNDP បានលើកឡើងក្នុងទំព័រហ្វេសប៊ុករបស់ខ្លួនក្នុង«ទិវាជនមានពិការភាពអន្តរជាតិ»ដែរថា នៅកម្ពុជា ប្រជាជនប្រមាណ១,៦លាននាក់ រស់នៅក្នុងពិការភាព ក្នុងនោះ កង្វះមធ្យោបាយធ្វើដំណើរសម្រាប់ជនមានពិការភាព គឺជាឧបសគ្គចម្បងដែលរារាំងពួកគេពីការចូលរួមក្នុងសង្គមនិងសេដ្ឋកិច្ច៕