ក្រសួងសុខាភិបាល រកឃើញមនុស្ស៤នាក់ទៀតបានឆ្លងជំងឺកូវីដ១៩ក្នុងព្រឹត្តិការណ៍សហគមន៍ ២៨វិច្ឆិកា ក្នុងនោះមាន២នាក់ជាបុគ្គលិកហាង ឌីមកុំព្យូទ័រ និងហាង Pedro នៅផ្លូវព្រះសីហនុ រាជធានីភ្នំពេញ។
សេចក្តីជូនព័ត៌មានរបស់ក្រសួងសុខាភិបាល នៅថ្ងៃទី០៤ ខែធ្នូ ឆ្នាំ២០២០ ឱ្យដឹងថា អ្នកដែលបានឆ្លងជំងឺកូវីដ១៩ ទាំង៤រូបនោះ រួមមាន បុរសអាយុ៣៩ឆ្នាំ ជាបុគ្គលិកហាង ឌីមកុំព្យូទ័រ ស្ត្រីអាយុ៣២ឆ្នាំ និងកុមារាអាយុ៣ឆ្នាំ ដែលត្រូវជាប្តី-ប្រពន្ធ និងកូន រស់នៅបុរី លឹមឈាងហាក់ សង្កាត់វាលស្បូវ ខណ្ឌច្បារអំពៅ និងបុរសអាយុ២២ឆ្នាំ ជាបុគ្គលិកហាង Pedro ផ្លូវព្រះសីហនុ រាជធានីភ្នំពេញ។
ក្រសួងបញ្ជាក់ដែរថា បុរសអាយុ៣៩ឆ្នាំ និងភរិយាអាយុ៣២ឆ្នាំ រួមទាំងកុមារាអាយុ៣ឆ្នាំ ដែលឆ្លងជំងឺកូវីដ១៩នោះ ត្រូវជាបងប្អូនជីដូនមួយនិងក្មួយរបស់អ្នកជំងឺកូវីដ១៩ ដែលបានរកឃើញកាលពីថ្ងៃទី០២ ខែធ្នូ។
ពាក់ព័ន្ធនឹងព្រឹត្តិការណ៍សហគមន៍២៨វិច្ឆិកានេះ ក្រសួងបញ្ជាក់ថា គិតចាប់ពីថ្ងៃទី២៩ ខែវិច្ឆិកា មកដល់ថ្ងៃទី០៣ ខែធ្នូ ឆ្នាំ២០២០ ក្រសួងបានធ្វើតេស្តអ្នកប៉ះពាល់សរុបទាំងអស់ ចំនួន៩ ៧៩៣នាក់ ក្នុងនោះ មានអ្នកវិជ្ជមានវីរុសកូវីដ១៩ សរុបចំនួន២៣នាក់ កំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។
ដោយសារមានការកើនឡើងនូវចំនួនអ្នកជំងឺកូវីដ១៩ ដែលមានការចម្លងបន្តគ្នាពីកន្លែងមួយទៅកន្លែងមួយនោះ ក្រសួងសុខាភិបាលបានក្រើនរំឭកជាថ្មីដល់ប្រជាពលរដ្ឋទាំងអស់ដែលជាប់ពាក់ព័ន្ធនឹងព្រឹត្តិការណ៍សហគមន៍២៨វិច្ឆិកា ជាពិសេសអ្នកដែលប៉ះពាល់អ្នកជំងឺដែលធ្វើការនៅធនាគារ កាថេ (ផ្លូវសម្តេចប៉ាន) និងធនាគារចិន (អគារកាណាឌីយ៉ា ផ្លូវព្រះមុនីវង្ស) ត្រូវធ្វើចត្តាឡីស័កឱ្យបានគ្រប់ចំនួន១៤ថ្ងៃ និងអនុវត្តវិធានការការពារខ្លួនកុំឱ្យចម្លងទៅអ្នកដទៃ។
ក្រសួងក៏ណែនាំដល់ប្រជាពលរដ្ឋទូទៅ បន្តការរស់នៅធម្មតាតាមបែបគន្លងថ្មី ដោយពាក់ម៉ាស់ ត្រូវលាងដៃជាមួយសាប៊ូឬអាល់កុលឱ្យបានញឹកញាប់ រក្សាគម្លាតសុវត្ថិភាព ជាពិសេសក្នុងកាលៈទេសៈនេះ បើមិនចាំបាច់ កុំដើរចេញក្រៅផ្ទះ។
បើតាមក្រសួងសុខាភិបាល គិតមកដល់ម៉ោង៧ព្រឹក ថ្ងៃទី០៤ ខែធ្នូ ឆ្នាំ២០២០ កម្ពុជាបានរកឃើញអ្នកឆ្លងជំងឺកូវីដ១៩ សរុបចំនួន៣៣៥នាក់ ក្នុងនោះព្យាបាលសះស្បើយ ចំនួន៣០៤នាក់ និងកំពុងសម្រាកព្យាបាលនៅមន្ទីរពេទ្យ ចំនួន៣១នាក់៕
