សមត្ថកិច្ចចម្រុះនិងមន្ត្រីជំនាញខេត្តព្រះសីហនុ រកឃើញផលិតផលឱសថបំប៉នសុខភាពដែលហួសកាលបរិច្ឆេទប្រើប្រាស់ចំនួន៤ទូកុងទីន័រ ស្មើនឹង៣៣០កេស ដែលមានប្រភពមកពីក្រៅប្រទេស។
អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) នៃក្រសួងពាណិជ្ជកម្ម បានឱ្យដឹងលើទំព័រហ្វេសប៊ុករបស់ខ្លួន នៅថ្ងៃនេះថា បន្ទាប់ពីទទួលបានការស្នើសុំកិច្ចសហការពីសាខាគយនិងរដ្ឋាករកម្ពុជា មន្ត្រីសាខា ក.ប.ប. ខេត្តព្រះសីហនុ សហការគ្នាត្រួតពិនិត្យនិងវាយតម្លៃគុណភាពផលិតផលឱសថបំប៉នសុខភាពមានប្រភពមកពីប្រទេសក្រៅ ចំនួន៤ទូកុងទីន័រ របស់ក្រុមហ៊ុន JIN HAE INVESTMENT CO.,LTD។
អគ្គនាយកដ្ឋាន ក.ប.ប បន្តថា ជាលទ្ធលផល ផលិតផលជាឱសថបំប៉នសុខភាពដែលហួសកាលបរិច្ឆេទប្រើប្រាស់សរុបចំនួន៣៣០កេស ក្នុងនោះមានផលិតផល OCTA-Z ចំនួន១២៦កេស, CHANGE ចំនួន៤៨កេស, YA HWANG SAM ចំនួន៩៦កេស និង GAN BO HO ចំនួន៦០កេស ត្រូវបានមន្ត្រីសាខា ក.ប.ប. ខេត្តព្រះសីហនុ រកឃើញនិងដកហូត។
អគ្គនាយកដ្ឋាន ក.ប.ប បញ្ជាក់ថា ក្រោយធ្វើការពិនិត្យនិងដកហូតរួច សមត្ថកិច្ចចម្រុះបានកិបសៀលើទូកុងទីន័រ រក្សាទុកនៅទីលានកំពង់ផែ និងរង់ចាំម្ចាស់ទំនិញចូលមកដោះស្រាយតាមនីតិវិធីច្បាប់។
វីអូឌី មិនអាចសុំការអត្ថាធិប្បាយបន្ថែមពីមន្ត្រី ក.ប.ប ប្រចាំខេត្តព្រះសីហនុ និងតំណាងក្រុមហ៊ុន JIN HAE INVESTMENT CO.,LTD បានទេ នៅរសៀលថ្ងៃសុក្រនេះ៕