សហគមន៍អភិរក្សធនធានធម្មជាតិក្នុងឃុំតាជេស ស្រុកកំពង់ត្រឡាច ខេត្តកំពង់ឆ្នាំងព្រួយបារម្ភពីការបាត់បង់បឹងពោធិ៍ ជាបឹងធម្មជាតិមានទំហំជិត៥០ហិកតាដោយថា អាជ្ញាធរប្រគល់ឱ្យក្រុមហ៊ុនគ្រប់គ្រង។
អ្នកស្រីអ៊ុំ សុភី ប្រធានសហគមន៍អភិរក្សធនធានធម្មជាតិ បានឱ្យដឹងថាកាលពីឆ្នាំ២០១៦ បឹងធម្មជាតិនេះត្រូវបានអាជ្ញាធរប្រគល់ឱ្យក្រុមហ៊ុនឯកជនមួយដើម្បីស្តារបាតបឹង ប៉ុន្តែក្រុមហ៊ុនបានបូមខ្សាច់ បង្ករផលប៉ះពាល់ដល់ផ្ទៃបឹងទើបសហគមន៍ និងពលរដ្ឋបានតវ៉ាបណ្តេញក្រុមហ៊ុននោះចេញ។ អ្នកស្រីបន្តរថា បច្ចុប្បន្នអាជ្ញាធរមានគម្រោងឱ្យក្រុមហ៊ុនថ្មីមួយមកគ្រប់គ្រងបឹងនេះ ដោយមិនបានស្នើសុំយោបល់ពីខាងសហគនម៍ឡើយ។
អ្នកស្រីបន្ថែមថា អ្នកស្រីនឹងស្នើសុំការអន្តរាគមន៍ពីនាយករដ្ឋមន្រ្តី និងក្រសួងពាក់ព័ន្ធដើម្បីឱ្យប្រគល់បឹងនេះមកសហគមន៍គ្រប់គ្រងដើម្បីអភិរក្ស។
អ្នកស្រី អ៊ុំ សុភី៖«សហគមន៍ពួកខ្ញុំនឹងធ្វើលិខិតសុំអន្តរាគមន៍បន្តរទៅសម្តេចនាយករដ្ឋមន្រ្តីបន្តរទៀតដើម្បីឱ្យគាត់អន្តរាគមន៍កុំឱ្យលុបបឹង និងប្រគល់ឱ្យសហគមន៍ការពារកុំឱ្យទៅឯកជន។ យើងនឹងទៅក្រសួងណាដែលពាក់ព័ន្ធទាំងអស់ គ្រប់ស្ថាប័នពាក់ព័ន្ធទាំងអស់ដែលអាចជួយពួកយើងបាន»
ប្រធានសហគមន៍អភិរក្សធនធានធម្មជាតិរូបនេះបន្តរថាបឹងបានរូមតូចបន្ទាប់ពីមានការទន្រ្ទានយកពីបុគ្គលមួយចំនួនដែលរស់នៅក្បែរបឹង។
អ្នកស្រីបង្ហាញការព្រួយបារម្ភពីការបាត់បង់បឹងដែលអាចបង្ករជាទឹកជំនន់ បាត់បងជីវៈចម្រុះក្នុងទឹក និងរបរធ្វើកសិកម្មរបស់សហគមន៍ជាដើម។
អ្នកស្រី អ៊ុំ សុភី៖«បើបឹងហ្នឹងលុបបាត់ទៅ គ្មានផ្លូវទឹកហូរគ្មានអាងស្តុកទឺក ធ្វើឱ្យភូមិនៅជុំវិញ នឹងប្រឈមការលិចលង់។ ដំណាំដែលយើងដាំក៏ដាំអត់បាន ហើយយើងពីបាកក្នុងការចិញ្ជឹមជីវិតដូចជា បឹងយើងធ្លាប់រកត្រី រកអី អញ្ជឹងបើបាត់បឹងជីវភាពរបស់ពួកខ្ញុំកាន់តែធ្លាក់ចុះ ពូជត្រីធម្មជាតិត្រូវបាត់បង់ ជីវៈចម្រុះ ស្អីៗដែលនៅក្នុងបឹងគឺបាត់បង់ទាំងអស់ វាធ្វើឱ្យខាតប្រយោជន៍ច្រើន។»
លោករាជ សីមា ប្រជាសហគមន៍ រស់នៅក្នុងភូមិសូវង្ស និយាយថា លោកព្រួយបារម្ភពីការប្រគល់បឹងនេះទៅឱ្យក្រុមហ៊ុន និងស្នើឱ្យប្រគល់ឱ្យសហគមន៍អភិរក្សវិញ។
លោក រាជ សីមា ៖« ក្រុមសហគមន៍គាត់ធ្វើអភិរក្ស ដើម្បីឱ្យវាមានមេពូជ(ត្រី)គង់វង្ស ដល់ក្រុមហ៊ុនគេចេញមុខថា ស្តារហ្នឹងប៉ុន្តែមិនដឹង ស្តាររបៀបមិច វាមាននៅក្នុងការព្រួយបារម្ភរបស់ប្រជាពលរដ្ឋខ្លាចតែវាបាត់បង់បឹងដែលពួកខ្ញុំខំការពារ » ។
ឆ្លើយតបករណីនេះ អ្នកស្រីស្វាយ ស៊ីម ជំទប់ទី១ឃុំតាជេស មានប្រសាសន៍ថា អាជ្ញាធរបានលើកគម្រោងដាក់ដេញថ្លៃឱ្យក្រុមហ៊ុនស្តារបឹងប៉ុណ្ណោះ ដោយមិនបានលុបបឹងនោះទេ ហើយថាមិនទាន់មានក្រុមហ៊ុនណា ដេញថ្លៃយកនៅឡើយទេ។
អ្នកស្រី ស្វាយ ស៊ីម៖«ពួកខ្ញុំនៅក្នុងឃុំហ្នឹងលើកគម្រោងសុំស្តារបឹងឱ្យបានជ្រៅដើម្បីយកទឹកហ្នឹងឱ្យប្រជាពលរដ្ឋសម្រាប់ធ្វើស្រែសម្រាប់ឱ្យគោ នៅរដូវប្រាំងបានផឹក មិនមែនលុបទេ។ ព្រោះគ្មានក្រុមហ៊ុនណាគេដាក់ពាក្យមកសា្តរ យើងបានដាក់ដេញថ្លៃស្តារទៅ […] ព្រោះកន្លងមកមានក្រុមហ៊ុនមួយស្តារវាអត់ទាន់បានជោគជ័យទេ យើងចង់ស្តារឱ្យបានធំ។»
ជំទប់ទី១ឃុំតាជេស រូបនេះបន្ថែមថា អ្នកស្រីនឹងប្រគល់បឹងនេះឱ្យសហគនម៍គ្រប់គ្រងបើសិនជាមានលិខិតពីថ្នាក់លើមក។
អ្នកស្រី ស្វាយ ស៊ីមើ៖«ខ្ញុំអត់មានថាអីទេ ការគ្រប់គ្រងរបស់គាត់ប៉ុន្តែឱ្យគាត់មានឯកសារពីថ្នាក់លើមក ពួកខ្ញុំនៅឃុំអត់មានថា អីទេបើសិនជាអត់មានឯកសារពីថ្នាក់លើថាឱ្យពួកគាត់គ្រប់គ្រងទេ ខ្ញុំក៍អត់ហ៊ានសម្រេចទៅតាមហ្នឹងដែរ ទាល់មានឯកសារពីថ្នាក់ស្រុកថ្នាក់ខេត្ត បានឃុំហ៊ានទទួលដែរ»។
បើតាមប្រធានសហគមន៍អភិរក្សធនធានធម្មជាតិ ឱ្យដឹងថាបឹងពោធិ៍ជាបឹងធម្មជាតិ កើតមានតាំងពីច្រើនជំនាន់មកហើយ បឹងនេះមានទំហំ ៤៧,២២ហិកតា ដែលនៅជាប់ភូមិចំនួន៣ គឺ ភូមិសូវង្ស ភូមិឡពាង និងភូមិសំរោង ហើយមានពលរដ្ឋរាប់រយគ្រួសារបានអាស្រ័យផលពីបឹងនេះ៕
