លោកនាយករដ្ឋមន្រ្តីហ៊ុន សែន បានប្រកាសថារដ្ឋាភិបាលត្រៀមថវិការដើម្បីទិញវ៉ាក់សាំងកូវីដ១៩ចំនួន១លានដូសជាជំហានដំបូងសម្រាប់ចាក់ជូនពលរដ្ឋដែលមានហានិភ័យខ្ពស់ក្នុងការឆ្លង វីរុសនេះ។
ការប្រកាសរបស់លោកនាយករដ្ឋមន្រ្តីហ៊ុន សែន បានធ្វើឡើង ខណៈដែលក្រសួងសុខាភិបាលបានប្រកាសរកឃើញករណីឆ្លងកូវីដ១៩ក្នុងសហគមន៍កើនដល់៣២នាក់ត្រឹមរយៈពេល១០ថ្ងៃមកនេះ។
នាយករដ្ឋមន្រ្តីកម្ពុជាបានបង្ហោះនៅលើទំព័រហ្វេសប៊ុករបស់លោកនាល្ងាចថ្ងៃនេះថាលោកបានប្រាប់ទៅរដ្ឋមន្រ្តីក្រសួងសុខាភិបាល និងរដ្ឋមន្រ្តីក្រសួងសេដ្ឋកិច្ចឱ្យត្រៀមថវិការសម្រាប់ទិញវ៉ាក់សាំងនេះចាក់ឱ្យប្រជាពលរដ្ឋដោយមិនយកប្រាក់។ ប៉ុន្តែបើតាមលោកនាយករដ្ឋមន្រ្តីហ៊ុន សែន វ៉ាក់សាំង១លានដូសដែលទិញក្នុងជំហានដំបូងនោះនឹងត្រូវយកទៅចាក់ឱ្យតែមនុស្សចំនួន៥០ម៉ឺននាក់ដែលធ្វើការនៅកន្លែងដែលមានហានិភ័យខ្ពស់ និងអ្នកដែលមានហានិភ័យក្នុងការឆ្លងកូវីដ១៩តែប៉ុណ្ណោះ ដោយលោកថាម្នាក់ត្រូវចាក់២ដង។
ទោះយ៉ាងណាក្តីលោកនាយករដ្ឋមន្ត្រីថាលោកបានណែនាំដល់រដ្ឋមន្រ្តីទាំងពីរូបឱ្យពិភាក្សាជាមួយដៃគូរអភិវឌ្ឍន៍ដើម្បីទទួលបានជំនួយបន្ថែមដើម្បីទិញវ៉ាក់សាំងនេះ។
លោកបានសរសេរបន្តថា៖«យើងសង្ឃឹមថាដៃគូអភិវឌ្ឍន៍របស់យើងនឹងផ្តល់ជំនួយដល់ប្រជាជនយើងឬយ៉ាងហោចលក់ក្នុងតម្លៃថោកសមរម្យឱ្យយើង។ ខ្ញុំក៏បានណែនាំរដ្ឋមន្ត្រីក្រសួងសេដ្ឋកិច្ចហិរញ្ញវត្ថុត្រៀមថវិកាសម្រាប់ទិញ២ទៅ៣លានដូសថែមទៀតផងដែរសម្រាប់ដំណាក់កាលបន្ទាប់»។
លោកនាយករដ្ឋមន្រ្តីមិនទាន់បញ្ជាក់ថាវ៉ាក់សាំងនោះនឹងត្រូវទិញពីក្រុមហ៊ុនណានោះទេ ដោយលោកថារដ្ឋមន្រ្តីក្រសួងសុខាភិបាលនឹងជជែកជាមួយដៃគូអភិវឌ្ឍន៍ពិសេសអង្គការសុខភាពពិភពលោក ដើម្បីកំណត់ថាតើគួរទិញវ៉ាក់សាំងពីប្រទេសណា។
ក្នុងរយៈពេលប៉ុន្មានសប្តាហ៍ចុងក្រោយនេះក្រុមហ៊ុនមួយចំនួនដែលមានមូលដ្ឋាននៅអាមេរិក អង់គ្លេស និងរុស្ស៊ីជាដើមបានបញ្ជាក់ពីប្រសិទ្ធិភាពនៃវ៉ាក់សាំងកូវីដ១៩រៀងៗខ្លួន ហើយប្រទេសមួយចំនួនក៏បានបញ្ជាទិញរួចរាល់ហើយដែរ។ ក្រុមហ៊ុនPfizer របស់អាមេរិកថាវ៉ាក់សាំងរបស់ខ្លួនមានប្រសិទ្ធិភាពរហូតដល់៩៥% ខណៈAstraZeneca ដែលជាក្រុមហ៊ុនឱសថអង់គ្លេស-ស៊ុយអែតមានប្រសិទ្ធិភាព៧០%។ ចំណែកវ៉ាក់សាំងរបស់ក្រុមហ៊ុនអាមេរិកមួយទៀតឈ្មោះModerna ក៏បានប្រកាសថាប្រសិទ្ធិភាពវ៉ាក់សាំងខ្លួនមាន៩៤,៥% ចំណែកឯSputnik V របស់រុស្ស៊ីថាវ៉ាក់សាំងរបស់គេមានប្រសិទ្ធិរហូតដល់៩២%ដែរ៕
