មន្ត្រីជាន់ខ្ពស់ក្រសួងសុខាភិបាល អំពាវនាវដល់ប្រជាពលរដ្ឋបន្តអនុវត្តវិធានសុខាភិបាលឱ្យបានត្រឹមត្រូវ ដើម្បីការពារការឆ្លងជំងឺកូវីដ១៩ និងត្រូវចៀសវាងការប្រើប្រាស់វិធីព្យាបាលជំងឺកូវីដ១៩ដោយខ្លួនឯង តាមពាក្យចរាមអារ៉ាមមួយចំនួនដែលបានចែករំលែកក្នុងបណ្តាញសង្គម។
អ្នកពាក្យនាំក្រសួងសុខាភិបាល លោកស្រី ឱ វណ្ណឌីន មានប្រសាសន៍នៅថ្ងៃទី០៧ ខែធ្នូ ឆ្នាំ២០២០នេះថា ក្រសួងបាននិងកំពុងស្វែងរកអ្នកពាក់ព័ន្ធនឹងអ្នកជំងឺកូវីដ១៩ ដើម្បីទប់ស្កាត់កុំឱ្យមានការឆ្លងរាលដាលបន្តទៀត។
លោកស្រីក៏បានអំពាវនាវឱ្យប្រជាពលរដ្ឋអនុវត្តវិធានការការពារខ្លួនតាមការណែនាំរបស់ក្រសួងសុខាភិបាលឱ្យបានហ្មត់ចត់ ហើយត្រូវទៅមន្ទីរពេទ្យដើម្បីធ្វើតេស្តក្នុងករណីសង្ស័យ ជាពិសេស មិនត្រូវជឿតាមពាក្យចចាមអារ៉ាមមួយចំនួននៅលើបណ្តាញសង្គមឡើយ។
លោកស្រីថា៖ «វិធីព្យាបាលកូវីដនៅផ្ទះ ផ្សំម្រេច ទឹកឃ្មុំ តែផ្ដេសតែផ្ដាស។ មួយទៀត រឿងពាក់ម៉ាស់ មីងប្រាប់ហើយ កុំឱ្យចែកចាយបន្ត វិធានការមិនមែនពាក់ម៉ាស់ហើយគ្មានមេរោគទេ។ សួរថា អ្នកពាក់ម៉ាស់រាល់គ្នាសួរថា ពាក់ត្រូវបច្ចេកទេសអត់ គឺអត់ត្រូវតាមបច្ចេសទេសទេ។ បើយកតែរឿងម៉ាស់មកផ្សាយ អ្នកនោះពាក់ម៉ាស់អត់មានមេរោគ អត់ត្រូវទេ! មិនឆ្លង ទាល់តែអនុវត្ត៣វិធានការរួមគ្នា»។
លោកស្រីបានគូសបញ្ជាក់ពីវិធានការរួមគ្នាទាំង៣នោះថា ត្រូវរក្សាគម្លាតសុវត្ថិភាពបុគ្គលឱ្យបានជាង១ម៉ែត្រកន្លះ ឧស្សាហ៍លាងដៃនឹងសាប៊ូឬជែលឱ្យបានញឹកញាប់បំផុត និងត្រូវពាក់ម៉ាស់ឱ្យបានត្រឹមត្រូវ នោះទើបអាចកាត់បន្ថយជាអតិបរមានៃការឆ្លងវីរុសកូវីដ១៩។
អ្នកគ្រប់គ្រងកម្មវិធីនៅមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក ហេង គីមហុង បានជំរុញឱ្យប្រជាពលរដ្ឋទាំងអស់ អនុវត្តទៅតាមវិធានការការពារខ្លួនពីការឆ្លងជំងឺកូវីដ១៩ ដែលផ្សព្វផ្សាយដោយក្រសួងសុខាភិបាល ជាជាងជឿតាមពាក្យចចាមអារ៉ាមក្នុងបណ្តាញសង្គម។
លោកថា៖ «ខ្ញុំយល់ថា ព័ត៌មានដែលចេញដោយក្រសួងសុខាភិបាល យើងអាចចាត់ទុកថាជាព័ត៌មានផ្លូវការឬច្បាស់ការណ៍បំផុត ដោយសារព័ត៌មានចេញដោយស្ថាប័នសាធារណៈ ដែលទទួលលើមុខងារសុខាភិបាលខ្ពស់បំផុតនៅកម្ពុជា»។
ដោយឡែក ចំពោះទីតាំងដែលអ្នកជំងឺកូវីដ១៩ទៅ អ្នកនាំពាក្យក្រសួងសុខាភិបាល នៅពុំទាន់អាចបញ្ជាក់ពីតួលេខបាននៅឡើយទេ ដោយគ្រាន់តែបញ្ជាក់ថា ទីតាំងដែលអ្នកជំងឺកូវីដ១៩ទៅ នឹងត្រូវបិទមួយរយៈ ដើម្បីស្វែងរកអ្នកពាក់ព័ន្ធ និងបាញ់ថ្នាំសម្លាប់មេរោគ។
ក្រោយពីបានរកឃើញមានការឆ្លងជំងឺកូវីដ១៩ ចូលសហគមន៍ កាលពីថ្ងៃទី២៨ ខែវិច្ឆិកា រាជរដ្ឋាភិបាល បានណែនាំឱ្យបិទទីតាំងមួយចំនួនជាបណ្តោះអាសន្ន ដូចជា ផ្សារទំនើបអ៊ីអនម៉ល, សណ្ឋាគារភ្នំពេញ, អគារកាណាឌីយ៉ា, ធនាគារ កាថេ យូណៃធីត, ហាងលក់សម្លៀកបំពាក់ Pedro, ហាងលក់សម្លៀកបំពាក់ Zendo, ហាង Carl’s Jr Burger និងទីតាំងមួយចំនួនទៀត។
តែយ៉ាងណា ទីតាំងផ្សារទំនើបអ៊ីអនម៉ល សណ្ឋាគារភ្នំពេញ និងទីតាំងមួយចំនួនទៀត ត្រូវបានរដ្ឋាភិបាលអនុញ្ញាតឱ្យបើកឡើងវិញ ខណៈទីតាំងផ្សេងទៀតនៅមិនទាន់អនុញ្ញាតឱ្យបើកឡើងវិញនៅឡើយ។
នៅថ្ងៃនេះដែរ ក្រសួងសុខាភិបាលបានជូនដំណឹងទៅម្ចាស់អគារកាណាឌីយ៉ា ថាអគារមួយនេះ នឹងត្រូវបិទរហូតដល់ថ្ងៃទី១៧ ខែធ្នូ ដោយសារបុគ្គលិកធនាគារចិនម្នាក់ដែលវិជ្ជមានវីរុសកូវីដ១៩ បានប្រើប្រាស់ជណ្តើរយន្តរួមគ្នានៅក្នុងអគារនេះ។
ចំណែករដ្ឋមន្ត្រីក្រសួងមហាផ្ទៃ លោក ស ខេង នៅថ្ងៃនេះ ក៏បានសម្រេចឱ្យផ្អាកការចេញ-ចូលបំពេញការងារជាបណ្តោះអាសន្នរបស់មន្ត្រីរាជការស៊ីវិល មន្ត្រីនគរបាលជាតិ និងមន្ត្រីពន្ធនាគារ នៅតាមអគ្គនាយកដ្ឋាននិងអង្គភាពនានាដែលមានទីតាំងស្ថិតក្នុងបរិវេណទីស្តីការក្រសួងមហាផ្ទៃ ចាប់ពីថ្ងៃទី០៧ ខែធ្នូ ឆ្នាំ២០២០នេះ រហូតដល់មានការជូនដំណឹងជាថ្មី។
ការបញ្ជាឱ្យផ្អាកនេះ ធ្វើឡើងក្រោយពីលោក ឆែម សាវុធ អគ្គនាយកនៃអគ្គនាយកដ្ឋានពន្ធនាគារនៃក្រសួងមហាផ្ទៃ ដែលមានជំងឺកូវីដ១៩ បានចូលរួមប្រជុំជាមួយរដ្ឋមន្ត្រី និងមន្ត្រីក្រសួងផ្សេងទៀត កាលពីថ្ងៃទី២៤ ខែវិច្ឆិកា ខណៈបច្ចុប្បន្នក៏មានមន្ត្រីធ្វើការនៅក្នុងក្រសួងមហាផ្ទៃមួយចំនួនបានឆ្លងជំងឺកូវីដ១៩នេះដែរ។
អភិបាលរាជធានីភ្នំពេញ លោក ឃួង ស្រេង មានប្រសាសន៍ថា គិតចាប់តាំងពីថ្ងៃទី២៨ ខែវិច្ឆិកា មកដល់ថ្ងៃទី៧ ខែធ្នូ ឆ្នាំ២០២០ អ្នកប៉ះពាល់ក្នុងព្រឹត្តិការណ៍សហគមន៍ ២៨វិច្ឆិកា ដែលទៅធ្វើចត្តាឡីស័កនៅសណ្ឋាគារសុខា មានចំនួន ៤៤ នាក់។
លោក ឃួង ស្រេង បានអំពាវនាវឱ្យអ្នកពាក់ព័ន្ធនឹងព្រឹត្តិការណ៍នេះទាំងអស់ បើខ្វះលទ្ធភាពក្នុងការធ្វើចត្តាឡីស័ក អាចទៅធ្វើចត្តាឡីស័កនៅសណ្ឋាគារសុខា ខណៈបច្ចុប្បន្នអាជ្ញាធរនិងក្រសួងសុខាភិបាល បាននិងកំពុងរៀបចំទីតាំងផ្សេងទៀតដើម្បីត្រៀមទុកផងដែរ។
លោកថា៖ «ដូចថា គាត់គ្មានលទ្ធភាពក្នុងការធ្វើចត្តាឡីស័ក ហើយគាត់ជាជំហរអ្នករកស៊ីសម្រាប់គ្រួសារប្រចាំថ្ងៃ អ៊ីចឹងបានឧបត្ថម្ភដល់គ្រួសារទៀតក្នុងរយៈពេលធ្វើចត្តាឡីស័ក [១៤ថ្ងៃ] ៣០ម៉ឺនរៀល ហើយអាជ្ញាធរយើងពិនិត្យថែមពីលើទៀតថា ៣០ម៉ឺនរៀល គ្រាន់ឬមិនគ្រាន់ យើងចែកជាអង្ករឬម្ហូបអាហារបន្ថែមទៀត ដើម្បីជួយដល់គាត់និងគ្រួសារគាត់ បើគាត់ជាអ្នកទ្រទ្រង់គ្រួសារ»។
ក្រសួងសុខាភិបាល នៅថ្ងៃនេះ ក៏បានយកសំណាករបស់មន្រ្តីក្រសួងមហាផ្ទៃ ចំនួន១ ៥៤៤នាក់ ទៅពិនិត្យរកវីរុសកូវីដ១៩ ជាលើកទី២ផងដែរ ប៉ុន្តែលទ្ធផលយ៉ាងណានោះនៅមិនទាន់បញ្ជាក់នៅឡើយ។
សម្រាប់នៅថ្ងៃស្អែកវិញ ក្រសួងក៏បានបញ្ជាក់ពីទីតាំងមួយចំនួនដែលត្រូវយកសំណាកលើកទី២ ចំពោះអ្នកពាក់ព័ន្ធផ្ទាល់និងប្រយោល ដូចជា នៅផ្ទះលោក ហេង សំរិន ប្រធានរដ្ឋសភា, ផ្ទះលោក ស ខេង រដ្ឋមន្ត្រីក្រសួងមហាផ្ទៃ, រដ្ឋសភា, ទីតាំងអង្គភាពភីឡតបន្ទាយទួលក្រសាំងសម្រាប់ក្រុមភីឡត និងក្រុមអង្គរក្សលោកនាយករដ្ឋមន្ត្រី ហ៊ុន សែន និងពហុកីឡដ្ឋានជាតិអូឡាំពិក (សម្រាប់ពលរដ្ឋដែលបានប៉ះពាល់ផ្ទាល់និងប្រយោល)។
បើតាមក្រសួងសុខាភិបាល គិតពីថ្ងៃទី២៩ ខែវិច្ឆិកា ដល់ថ្ងៃទី០៦ ខែធ្នូ ឆ្នាំ២០២០ ក្រសួងបានយកសំណាកអ្នកប៉ះពាល់ព្រឹត្តិការណ៍សហគមន៍ ២៨វិច្ឆិកា ទៅធ្វើតេស្ត ចំនួន ១១ ៣០៥ សំណាក ក្នុងនោះបានរកឃើញអ្នកឆ្លងជំងឺកូវីដ១៩ ចំនួន៣២នាក់ ដែលបច្ចុប្បន្នកំពុងសម្រាកព្យាបាលនៅមន្ទីរពេទ្យខ្មែរសូវៀត និងមណ្ឌលសុខភាពចាក់អង្រែ៕
