លោកនាយករដ្ឋមន្ត្រី ហ៊ុន សែន បញ្ជាក់ឡើងវិញថា រដ្ឋាភិបាលនឹងមិនដាក់ប្រទេសក្នុងគ្រាអាសន្នទេ ដោយលោកថា វិធានការនេះប៉ះពាល់ធំពេកដល់វិស័យសេដ្ឋកិច្ចនិងជីវភាពរស់នៅរបស់ប្រជាជន។
លោកនាយករដ្ឋមន្ត្រីបានបញ្ជាក់បែបនេះនៅក្នុងសាររបស់លោក ដែលត្រូវបានបង្ហោះនៅលើទំព័រហ្វេសប៊ុកផ្លូវការរបស់លោកកាលពីរសៀលម្សិលមិញ។
លោក ហ៊ុន សែន ថ្លែងថា៖ «ព្រឹកមិញ ខ្ញុំបាននិយាយដល់ការត្រៀមបម្រុងទុកនូវលិខិតនានា ដើម្បីនឹងសុំព្រះរាជក្រឹត្យដាក់ប្រទេសក្នុងគ្រាមានអាសន្ន។ ក្នុងពេលជាមួយគ្នា ខ្ញុំក៏បានបញ្ជាក់ថា ខ្ញុំមិនចង់ទៅដល់ចំណុចនេះទេ ព្រោះវាប៉ះពាល់ធំពេកដល់សេដ្ឋកិច្ចនិងជីវភាពប្រជាជន ដែលខ្ញុំស្នើសុំឱ្យមានការចូលរួមពីប្រជាជន ដើម្បីប្រយុទ្ធប្រឆាំងជាមួយកូវីដ១៩ជំនួសវិញ»។
មេដឹកនាំរូបនេះរំឭកថា ពេញមួយថ្ងៃម្សិលមិញ ការបំផ្លើសនានាបានកើតឡើងថា រដ្ឋាភិបាលនឹងបិទប្រទេសឬបិទរាជធានីភ្នំពេញក្នុងពេលប៉ុន្មានថ្ងៃខាងមុខនេះ និងខ្លះទៀតបំផុសឱ្យមនុស្សទិញទំនិញត្រៀមទុក។
លោកគូសបញ្ជាក់ថា រាជរដ្ឋាភិបាលនឹងមិនមានការស្នើសុំដាក់ប្រទេសក្នុងគ្រាមានអាសន្នទាំងមូលឬមួយផ្នែកណានោះឡើយ ហើយក៏នឹងមិនមានការចេញបទបញ្ជាឱ្យបិទរាជធានីភ្នំពេញ ដូចការឃោសនាភូតកុហករបស់ជនអាក្រក់នោះដែរ។
ក្រៅពីនេះ លោក ហ៊ុន សែន ក៏បានអំពាវនាវផងដែរទៅដល់ប្រជាពលរដ្ឋឱ្យស្ងប់ស្ងាត់ កុំភ័យស្លន់ស្លោ និងចូលរួមជាមួយរាជរដ្ឋាភិបាលក្នុងការប្រយុទ្ធប្រឆាំងជាមួយកូវីដ១៩ តាមការណែនាំរបស់ក្រសួងសុខាភិបាល។
ប្រធានគណៈកម្មាធិការនាយកគណបក្សប្រជាធិបតេយ្យមូលដ្ឋាន លោកបណ្ឌិត យ៉ង សំាងកុមារ មានប្រសាសន៍ថា ការបញ្ជាក់ជំហររបស់រដ្ឋាភិបាល វាដូចគ្នាទៅនឹងអ្វីដែលលោកធ្លាប់បានបញ្ចេញយោបល់លើបណ្តាញសង្គមថា ពេលនេះមិនទាន់ចាំបាច់មានការដាក់ប្រទេសក្នុងគ្រាអាសន្នទេ ខណៈក្រសួងសុខាភិបាលនៅមានលទ្ធភាពសង្គ្រោះ រីឯពលរដ្ឋបានចូលរួមអនុវត្តវិធានបង្ការរបស់រដ្ឋាភិបាល ដូចជាពាក់ម៉ាស់ជាដើមនោះ។
លោក យ៉ង សាំងកុមារ រៀបរាប់ថា៖ «អ៊ីចឹងហើយ ខ្ញុំចង់បញ្ជាក់ថា មុននឹងរដ្ឋាភិបាលសម្រេចដាក់ប្រទេសក្នុងគ្រាអាសន្ន គឺគេមានមូលដ្ឋានគ្រឹះក្នុងការសម្រេចចិត្តកុំឱ្យយើងផ្អើលចលាចលអីផ្សេងៗ និងមួយទៀត ក៏ខ្ញុំចង់បញ្ជាក់ពីជំហររបស់ខ្ញុំដែរក្នុងស្ថានភាពបច្ចុប្បន្ន បើសិនជាអ៊ីចឹងមែន ដូចរបាយការណ៍របស់ក្រសួងសុខាភិបាល វាមិនទាន់ចាំបាច់ដាក់ប្រទេសក្នុងគ្រាអាសន្នទេ»។
លោក យ៉ង សាំងកុមារ បានសរសេរសារនៅលើគេហទំព័រហ្វេសប៊ុកផ្ទាល់ខ្លួនរបស់លោកថា តាមរបាយការណ៍និងវិធានការរបស់ក្រសួងសុខាភិបាលកន្លងមក កម្ពុជាអាចគ្រប់គ្រងការឆ្លងមេរោគកូវីដ១៩បាន សំខាន់ពេលនេះ គឺក្រសួងត្រូវបន្តបង្កើនការធ្វើតេស្តអ្នកសង្ស័យ ហើយគ្រប់គ្រងការនាំចូលឱ្យបានល្អ។
ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ និយាយថា បើដូចការបញ្ជាក់របស់រដ្ឋាភិបាលមែន វាបានបញ្ចៀសហានិភ័យអ្នកមានមុខរបរតូចតាច។
លោកថា ការដាក់ប្រទេសក្នុងគ្រាអាសន្នចំពេលដែលរដ្ឋាភិបាលមិនទាន់មានលទ្ធភាពផ្គត់ផ្គង់ជីវភាពពលរដ្ឋនៅឡើយនោះ លោកគូសបញ្ជាក់ថា អ្នកដែលដាច់បាយស្លាប់មុនគេ គឺអ្នកក្រីក្រដែលរកចំណូលបានតិចតួច ជាង៨០ភាគរយនៃចំនួនពលរដ្ឋសរុបដែលប្រកបមុខរបរសេដ្ឋកិច្ចក្រៅប្រព័ន្ធ។
លោក វន់ ពៅ ប្រាប់ថា៖ «ដូចពួកយើងក្រៅប្រព័ន្ធនេះ [រដ្ឋាភិបាល] មិនទាន់ដាក់ប្រទេសក្នុងភាពអាសន្នផង យើងដាច់បាយបណ្តើរៗហើយ។ ចុះទម្រាំដាក់ក្នុងភាពអាសន្នទៀត យើងរឹតតែធ្ងន់។ អាហ្នឹងធ្វើឱ្យពួកយើងដែលរដ្ឋមិនទាន់ផ្តល់ប្រយោជន៍នៃកិច្ចគាំពារសង្គមក្នុងស្ថានភាពហានិភ័យហ្នឹង មិនបានហើយ បើដាក់ទៀត វារឹតតែធ្ងន់ទៀត វាធ្វើឱ្យយើងដាច់បាយស្លាប់តែម្តង»។
មួយវិញទៀត លោកថា ព្រឹត្តិការណ៍២៨វិច្ឆិកា ហាក់ធ្វើឱ្យពលរដ្ឋនៅភ្នំពេញខ្វល់ខ្វាយជាងមុន ដែលថា មានអ្នកពាក់ម៉ាស់ស្ទើរតែ៩០ភាគរយនៅតាមដងផ្លូវ ហើយថា អ្នករត់កង់បីខ្លះ ទោះរកចំណូលបានតិចជាងមុន ក៏ទិញម៉ាស់និងអាល់កុលសម្រាប់ការពារដែរ។
អ្នករត់កង់៣ម្នាក់នៅខេត្តសៀមរាប លោក វឿន ភីរ៉េត និយាយដែរថា ទាំងភ្ញៀវជាតិនិងអន្តរជាតិ រួមទាំងអាជីវករនៅខេត្តទេសចរណ៍មួយនេះ ហាក់មានការប្រុងប្រយ័ត្នព្រមគ្នា ក្រោយពីផ្ទុះឡើងនូវជំងឺកូវីដ១៩ជាថ្មីទៀតនេះ។
លោក វឿន ភីរ៉េត ប្រាប់ថា៖ «នៅខាងសៀមរាប យើងចូលរួមច្រើន។ នៅព្រឹកមិញអី យើងពាក់ម៉ាស់ច្រើន។ ណាមួយអ្នកលក់ដូរក៏មានការប្រុងប្រយ័ត្នច្រើនដែរតាមក្រសួងសុខាភិបាល។ នៅផ្សារក៏អ៊ីចឹងដែរ ខ្លាចដូចគ្នា នៅពេលយើងឱ្យលុយទៅ គេបាញ់អាល់កុល បាញ់លើលុយហ្នឹង»។
គិតត្រឹមម៉ោង៨ព្រឹកថ្ងៃនេះ មានមនុស្ស២នាក់ថ្មីទៀតត្រូវបានក្រសួងសុខាភិបាលរកឃើញថា ឆ្លងកូវីដ១៩ ដែលធ្វើឱ្យអ្នកឆ្លងឡើងដល់៣២នាក់ ពាក់ព័ន្ធនឹងព្រឹត្តិការណ៍សហគមន៍ ២៨វិច្ឆិកា។
ព្រឹត្តិការណ៍ ២៨វិច្ឆិកា ក្រសួងបានរកឃើញអ្នកផ្ទុកកូវីដ១៩មុនគេ គឺភរិយាលោក ឆែម សាវុធ អគ្គនាយកនៃអគ្គនាយកដ្ឋានពន្ធនាគារក្រសួងមហាផ្ទៃ ដែលមកដល់ថ្ងៃនេះ ក្រសួងបានធ្វើតេស្តអ្នកប៉ះពាល់ជាង១ម៉ឺនសំណាក (១១ ៣០៥)៕
