ក្រសួងសុខាភិបាល បានប្រកាសរកឃើញករណីឆ្លងជំងឺកូវីដ១៩ថ្មី ចំនួន២នាក់ទៀត ដែលជាអ្នកទៅហាង Zendo និង Pedro ក្នុងព្រឹត្តិការណ៍សហគមន៍ ២៨វិច្ឆិកា ខណៈមានអ្នកជំងឺកូវីដ១៩ម្នាក់បានជាសះស្បើយ។
សេចក្តីជូនព័ត៌មានរបស់ក្រសួងសុខាភិបាល នៅថ្ងៃទី០៨ ខែធ្នូ ឆ្នាំ២០២០ បានឱ្យដឹងថា អ្នកឆ្លងជំងឺកូវីដចំនួន២នាក់នោះ មានឈ្មោះ ស្រៀន គឹមស្រ៊ុន អាយុ២២ឆ្នាំ រស់នៅសង្កាត់វត្តភ្នំខណ្ឌដូនពេញ រាជធានីភ្នំពេញ បានទៅហាងលក់សម្លៀកបំពាក់ Zendo នៅបឹងកេងកង កាលពីថ្ងៃទី២៧ ខែវិច្ឆិកា និង ស្ត្រីវ័យ៣៥ឆ្នាំ ឈ្មោះ អៀម ធីតា រស់នៅសង្កាត់បឹងទំពន់ ខណ្ឌមានជ័យ រាជធានីភ្នំពេញ បានទៅហាង Pedro កាលពីថ្ងៃទី២៧ ខែវិច្ឆិកា។
ក្រសួងបានអំពាវនាវដល់អ្នកពាក់ព័ន្ធក្នុង«ព្រឹត្តិការណ៍២៨វិច្ឆិកា»ទាំងអស់ ទៅធ្វើតេស្តជាលើកទី២ នៅថ្ងៃនេះ នៅទីតាំងបរិវេណពហុកីឡដ្ឋានជាតិអូឡាំពិក រាជធានីភ្នំពេញ និងនៅតាមមន្ទីរសុខាភិបាលរាជធានី-ខេត្ត។
ចំពោះអ្នកជាសះស្បើយពីជំងឺកូវីដ១៩វិញ ក្រសួងបញ្ជាក់ថា ជាស្ត្រីជនជាតិខ្មែរអាមេរិកាំង ឈ្មោះ ឈួយ សារូ អាយុ៤៥ឆ្នាំ ស្នាក់នៅក្រុងប៉ៃលិន ខេត្តប៉ៃលិន បានធ្វើដំណើរមកពីសហរដ្ឋអាមេរិក មកដល់កម្ពុជា កាលពីថ្ងៃទី២៧ ខែវិច្ឆិកា ឆ្នាំ២០២០។
បើតាមក្រសួងសុខាភិបាល គិតមកដល់ម៉ោង៧ព្រឹក ថ្ងៃទី០៨ ខែធ្នូ ឆ្នាំ២០២០ កម្ពុជាបានរកឃើញអ្នកឆ្លងជំងឺកូវីដ១៩ សរុបចំនួន៣៥០នាក់ ក្នុងនោះព្យាបាលជាសះស្បើយ ចំនួន៣០៧នាក់ និងកំពុងសម្រាកព្យាបាលនៅមន្ទីរពេទ្យ ចំនួន៤៣នាក់៕