លោកនាយករដ្ឋមន្ត្រី ហ៊ុន សែន ឱ្យដឹងថា គិតមកដល់ម៉ោងជិត៦ល្ងាចនេះ ថវិកាដែលបានមកពីសប្បុរសជនចូលរួមសម្រាប់ទិញវ៉ាក់សាំងកូវីដ១៩ បានកើនដល់ជាង៣០លានដុល្លារ។
លោកនាយករដ្ឋមន្ត្រី ហ៊ុន សែន បានសរសេរនៅក្នុងទំព័រហ្វេសប៊ុករបស់លោកថា មកដល់ពេលនេះ (ម៉ោងជិត៦ល្ងាច ថ្ងៃទី០៨ ខែធ្នូ) ថវិកាដែលសប្បុរសជនចូលតាមសទ្ធាជ្រះថ្លា ដើម្បីត្រៀមទិញវ៉ាក់សាំងប្រឆាំងវីរុសកូវីដ១៩ មានប្រមាណជាង៣០លានដុល្លារ។
លោកថា៖ «ស្មារតីសាមគ្គីភាព វប្បធម៌នៃការចែករំលែកក្នុងការប្រយុទ្ធប្រឆាំងជាមួយកូវីដ១៩ ក្នុងចំណោមប្រជាជនកម្ពុជាយើង មានធំធេងមហាសាលដែលបានក្លាយជាខឿនការពារសុខភាពរបស់ប្រជាជនដ៏រឹងមាំ»។
លោកនាយករដ្ឋមន្ត្រី បន្តទៀតថា ដោយមានសំណូមពរពីប្រជាពលរដ្ឋ លោកបានសម្រេចបន្ថែមគណនីធនាគារចំនួន២បន្ថែមទៀត តាមរយៈធនាគារអេស៊ីលីដា និងភ្នាក់ងារវីង ដើម្បីទទួលថវិកាទាំងប្រាក់រៀលនិងប្រាក់ដុល្លារពីសប្បុរសជន។
លោកបានគូសបញ្ជាក់ថា៖ «សម្រាប់វីង ចំពោះប្រាក់រៀលគឺ 9992, ប្រាក់ដុល្លារគឺ 9991។ ចំពោះអេស៊ីលីដា ប្រាក់រៀលគឺ 00010556999989, ចំពោះប្រាក់ដុល្លារគឺ 00010556999999»។
លោកនាយករដ្ឋមន្ត្រី ហ៊ុន សែន បានបន្តទៀតថា ថវិកាដែលបានមកពីសប្បុរសជននេះ នឹងយកទៅទិញវ៉ាក់សាំងប្រឆាំងកូវីដ១៩ ដែលរដ្ឋាភិបាលមានបំណងចាក់ជូនប្រជាជនឱ្យបាន១០លាននាក់ ដែលត្រូវការវ៉ាក់សាំងរហូត២០លានដូស។
លោកបន្ថែមថា៖ «តម្រូវការចំពោះមុខ នាដំណាក់កាលទីមួយ ចំនួន១លានដូស សម្រាប់ចាក់ជូន៥០មុឺននាក់ ដែលកំពុងបំពេញការងារនៅកន្លែងដែលមានហានិភ័យ និងកំពុងមានហានិភ័យ ដែលអាទិភាពផ្តល់ជូនគ្រូពេទ្យ គ្រូបង្រៀន កម្លាំងប្រដាប់អាវុធគ្រប់ប្រភេទ នគរបាលយុត្តិធម៌គ្រប់ប្រភេទ រហូតដល់កម្មករបោសសំរាមសម្អាតទីក្រុងទីប្រជុំជន។ល។ ដែលត្រូវទទួលបាននៅដំណាក់កាលទីមួយនេះ»៕
