រដ្ឋាភិបាលកម្ពុជាកំពុងកៀរគរមូលនិធិពីសប្បុរសជននានា ក្រោយពីមានឧកញ៉ាធំៗបាននាំគ្នាសម្រុកបរិច្ចាគថវិកាជាបន្តបន្ទាប់ ក្រោយពេលរដ្ឋាភិបាលប្រកាសទិញវ៉ាក់សំាងកូវីដ១៩។
លោកនាយករដ្ឋមន្ត្រី ហ៊ុន សែន បានអះអាងនៅលើទំព័រហ្វេសប៊ុករបស់លោកនៅព្រឹកថ្ងៃនេះថា បន្ទាប់ពីលោកបានប្រកាសពីការទិញវ៉ាក់សាំងការពារកូវីដ១៩មក គឺមានចលនាគាំទ្រយ៉ាងធំធេងទាំងតាមផ្លូវចិត្តនិងទាំងតាមការផ្តល់ថវិកា ដែលលោកចាត់ទុកថា នេះជាខឿនការពារសុខភាពរបស់ប្រជាជន។
លោកបញ្ជាក់ថា សរុបថវិកាដែលសប្បុរសជនចូលរួមរហូតពេលនេះ មានចំនួនជាង១៨លានដុល្លារអាមេរិក។ ក្រៅពីប្រកាសថវិកាសប្បុរសជន លោក ហ៊ុន សែន ក៏បានប្រកាសពីលេខទូរសព្ទលោក សេង ទៀង ដែលប្រចាំការទទួលនៅទីស្តីការគណៈរដ្ឋមន្ត្រី ចាំទទួលថវិកានិងលេខគណនីធនាគារផងដែរ។
ទំព័រហ្វេសប៊ុករបស់លោក ហ៊ុន សែន រៀបរាប់ថា៖ «ខ្ញុំព្រះករុណាខ្ញុំសូមទូលប្រគេននិងជម្រាបជូនថា ក្នុងករណីមានការផ្ទេរតាមធនាគារនេះ សូមកុំភ្លេចដាក់ឈ្មោះនិងទីកន្លែងរស់នៅឱ្យបានត្រឹមត្រូវ ដើម្បីឱ្យខ្ញុំព្រះករុណាខ្ញុំបានធ្វើលិខិតថ្លែងអំណរគុណចំឈ្មោះពិតប្រាកដ»។
កាលពីម្សិលមិញ លោកនាយករដ្ឋមន្ត្រី ហ៊ុន សែន ប្រកាសពីគម្រោងទិញវ៉ាក់សាំងកូវីដ១៩ ក្នុងដំណាក់កាលដំបូងចំនួន១លានដូស ប៉ុន្តែចំពោះអ្នកដែលមានលទ្ធភាពទទួលបានវ៉ាក់សាំងនេះមុនគេគឺមានក្រុមគ្រូពេទ្យ គ្រូបង្រៀន កម្លាំងប្រដាប់អាវុធ និងមន្រ្តីយុត្តិធម៌។
ក្រៅពីមន្ត្រីខាងលើ ក៏មានមន្រ្តីការពារព្រៃឈើ ជលផល បរិស្ថាន មន្ត្រីតុលាការ និងមេធាវី ជាអាទិភាព ដែលលោកចាត់ទុកក្រុមមន្រ្តីទាំងនេះថា មានហានិភ័យខ្ពស់ជាងអ្នកដទៃ។
រដ្ឋលេខាធិការទីស្តីការគណៈរដ្ឋមន្ត្រី លោក សេង ទៀង ដែលប្រចាំការទទួលថវិកាតាមលេខគណនីធនាគារ បានឱ្យដឹងថា លោកមិនទាន់បានសរុបតួលេខថវិកានៅឡើយទេនៅរសៀលថ្ងៃនេះ ដោយថា កំពុងមមាញឹកជាមួយនឹងការកត់ត្រាថវិកាដែលចូលរួមពីសំណាក់ប្រជាពលរដ្ឋជាច្រើនមកពីទូទាំងប្រទេស។
ចំណែកអ្នកនាំពាក្យក្រសួងសុខាភិបាល លោកស្រី ឱ វណ្ណឌីន មានប្រសាសន៍ថា ជាប់រវល់ប្រជុំ។
អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ លោក មាស សុខសេនសាន សុំមិនធ្វើអត្ថាធិប្បាយទេ ដោយប្រាប់ឱ្យរង់ចាំសេចក្ដីសម្រេចដែលប្រកាសដោយលោកនាយករដ្ឋមន្ត្រី ហ៊ុន សែន។
អ្នកនាំពាក្យរដ្ឋាភិបាល លោក ផៃ ស៊ីផាន ប្រាប់ថា រដ្ឋាភិបាលមិនទាន់បានសម្រេចនៅឡើយទេអំពីចំនួនថវិកាជាក់លាក់ដែលត្រូវបញ្ចេញសម្រាប់បញ្ជាទិញវ៉ាក់សាំង។ ជាងនេះទៀត លោកប្រាប់ថា រដ្ឋាភិបាលស្ថិតក្នុងដំណាក់កាលជជែកពិភាក្សាថា តើនឹងសម្រេចទិញវ៉ាក់សាំងផលិតឡើងដោយប្រទេសណាមួយ ហើយក៏មិនទាន់ដឹងពីតម្លៃផងដែរ។
ក្រសួងសុខាភិបាលឱ្យដឹងថា គិតពីថ្ងៃទី២៩ ខែវិច្ឆិកា ដល់ថ្ងៃទី០៦ ខែធ្នូ ឆ្នាំ២០២០ ក្រសួងបានយកសំណាកអ្នកប៉ះពាល់ព្រឹត្តិការណ៍សហគមន៍ ២៨វិច្ឆិកា ទៅធ្វើតេស្តចំនួន១១ ៣០៥សំណាក ក្នុងនោះបានរកឃើញអ្នកឆ្លងជំងឺកូវីដ១៩ ចំនួន៣៤នាក់ ដែលបច្ចុប្បន្នកំពុងសម្រាកព្យាបាលនៅមន្ទីរពេទ្យខ្មែរសូវៀត និងមណ្ឌលសុខភាពចាក់អង្រែ៕