លោកនាយករដ្ឋមន្រ្តី ហ៊ុន សែន បានបញ្ជាក់ថាវ៉ាក់សាំងកូវីដ១៩ចំនួន១លានដូសដែលទិញមកក្នុងដំណាក់កាលដំបូងនឹងត្រូវចាក់ជូនមុនគេដល់អ្នកប្រឈមនឹងការឆ្លងជំងឺកូវីដ១៩ខ្ពស់ដែលក្នុងនោះមានក្រុមគ្រូពេទ្យ គ្រូបង្រៀន កម្លាំងប្រដាប់អាវុធ និងមន្រ្តីយុត្តិធម៌។
កាលពីម្សិលមិញលោកនាយករដ្ឋមន្រ្តីបានប្រកាសឱ្យដឹងពីគម្រោងទិញវ៉ាក់សាំងកូវីដ១៩ ក្នុងដំណាក់កាលដំបូង ដែលនឹងផ្តល់ឱ្យមនុស្សចំនួន៥០ម៉ឺននាក់ដែលធ្វើការនៅកន្លែងមានហានិភ័យខ្ពស់ និងអ្នកដែលមានហានិភ័យក្នុងការឆ្លងកូវីដ១៩។
ក្នុងវីដេអូឃ្លីបជិត៩នាទីដែលបង្ហោះលើទំព័រហ្វេសប៊ុករបស់លោកនាម៉ោងប្រមាណជា១ព្រឹកថ្ងៃនេះ លោកនាយករដ្ឋមន្រ្តីហ៊ុន សែន បានលើកឡើងថាមូលហេតុនៃការផ្តល់វ៉ាក់សាំងកូវីដ១៩ដល់ក្រុមគ្រូពេទ្យ គ្រូបង្រៀន កម្លាំងប្រដាប់អាវុធ និងមន្រ្តីយុត្តិធម៌រួមមានមន្រ្តីការពារព្រៃឈើ ជលផល បរិស្ថាន មន្រ្តីតុលាការ(ចៅក្រម ព្រះរាជអាជ្ញា) និងមេធាវី ជាអាទិភាព ព្រោះក្រុមមន្រ្តីទាំងនោះមានហានិភ័យខ្ពស់ជាងអ្នកដទៃ។
លោកបានបន្ថែមថាអ្នកដែលធ្វើការក្នុងវិស័យអាទិភាពដែលត្រូវទទួលវ៉ាក់សាំងកូវីដ១៩មុនគេនេះមានប្រមាណជា៤០ម៉ឺននាក់ ដូច្នេះវ៉ាក់សាំងដែលសល់សម្រាប់មនុស្ស១០ម៉ឺនទៀតលោកទុកសិទ្ធិឱ្យក្រសួងសុខាភិបាលជាអ្នកសម្រេច។
លោកនាយករដ្ឋមន្រ្តីក៏បានបញ្ជាក់ផងដែរថាកន្លែងរក្សាទុកវ៉ាក់សាំងកូវីដ១៩មិនចោទជាបញ្ហានេះទេ ព្រោះថារដ្ឋាភិបាលកំពុងសាងសង់ឃ្លាំងសម្រាប់ស្តុកដែលមានកម្រិតសីតុណ្ហភាពរហូតដល់៨០អង្សារសេក្រោមសូន្យ។ តាមការចុះផ្សាយរបស់សារព័ត៌មានBBC វ៉ាក់សាំងកូវីដ១៩ មួយចំនួនត្រូវរក្សាទុកនៅសីតុណ្ហភាពរហូតដល់៧០អង្សារសេក្រោមសូន្យ៕
