នគរបាលប្រឆាំងគ្រឿងញៀន បានឱ្យដឹងថា សមត្ថកិច្ចកំពុងស្វែងរកមេខ្លោងនៃគ្រឿងញៀនខ្ទង់៣០គីឡូក្រាមដែលត្រូវបានរឹបអូសពីស្ត្រីថៃម្នាក់កាលពីសប្ដាហ៍មុន។
ស្នងការដ្ឋាននគរបាលខេត្តបាត់ដំបង បានផ្សព្វផ្សាយលើទំព័រហ្វេសប៊ុករបស់ខ្លួនកាលពីថ្ងៃសៅរ៍សប្ដាហ៍មុនថា នគរបាលប្រឆាំងគ្រឿងញៀនខេត្តនេះ បានឃាត់ស្ត្រីជនជាតិថៃម្នាក់អាយុ៣១ឆ្នាំ ជាមួយថ្នាំញៀនប្រភេទមេតំហ្វេតាមីន ចំនួន៣០ដុំ មានទម្ងន់ជិត៣០គីឡូក្រាម។
នាយការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តបាត់ដំបង លោក សុខ និមល បានប្រាប់វីអូឌីកាលពីថ្ងៃម្សិលមិញថា ស្ត្រីជនជាតិថៃរូបនេះ ត្រូវបានសមត្ថកិច្ចប្រឆាំងការជួញដូរគ្រឿងញៀនខេត្ត ចាប់ខ្លួនជាមួយគ្រឿងញៀនដ៏ច្រើននេះ កាលពីថ្ងៃទី៥ ខែធ្នូ នៅក្នុងស្រុកកំរៀង ៥ថ្ងៃក្រោយពីស្ត្រីថៃរូបនេះបានចូលមកទឹកដីកម្ពុជា។
មន្ត្រីនគរបាលប្រឆាំងគ្រឿងញៀនរូបនេះ បានឱ្យដឹងទៀតថា ស្ត្រីថៃរូបនេះត្រូវបានសមត្ថកិច្ចបញ្ជូនទៅឃុំខ្លួននៅឯពន្ធនាគារខេត្តបាត់ដំបងរួចហើយ។
លោក និមល បានបញ្ជាក់ថា មេខ្លោងនៃគ្រឿងញៀនដែលជាជនជាតិថៃដែរនោះ បានគេចខ្លួនចូលទៅក្នុងទឹកដីថៃវិញហើយ ហើយលោកថា សមត្ថកិច្ចកំពុងស្រាវជ្រាវជាមួយសមត្ថកិច្ចប្រទេសថៃ ដើម្បីស្វែងរកចាប់ខ្លួនមេខ្លោងនៃការនាំចូលគ្រឿងញៀននេះ។
លោក សុខ និមល ប្រាប់ថា៖ «មេខ្លោងវារត់គេចខ្លួនចូលទៅប្រទេសថៃ ព្រោះមេខ្លោងវាគឺជាជនជាតិថៃ។ ប៉ុន្តែឥលូវនេះ យើងកំពុងស្រាវជ្រាវជាមួយប្រទេសថៃ ដើម្បីស្វែងរកចាប់ខ្លួនពួកហ្នឹងទៀត»។
នៅពេលសួរថា តើស្ត្រីជនជាតិថៃនាំចូលគ្រឿងញៀនមកកម្ពុជាដោយរបៀបណានោះ នគរបាលរូបនេះប្រាប់ថា សមត្ថកិច្ចកម្ពុជានឹងស្រាវជ្រាវបន្ថែម ប៉ុន្តែលោកថា ស្ត្រីថៃបាននាំចូលគ្រឿងញៀនតាមច្រករបៀងនៃព្រំដែនកម្ពុជា-ថៃ មិនមែននាំចូលតាមច្រកទ្វារព្រំដែនអន្តរជាតិដូងនោះឡើយ។
ព្រះរាជអាជ្ញារងសាលាដំបូងខេត្តបាត់ដំបង លោក ផាន់ រតនា បានប្រាប់វីអូឌីនៅថ្ងៃនេះថា ស្ត្រីរូបនេះត្រូវបានតុលាការចោទប្រកាន់ពីបទជួញដូរគ្រឿងញៀនកាលពីថ្ងៃទី៦ ខែធ្នូ ហើយត្រូវបានបញ្ជូនទៅឃុំខ្លួនបណ្ដោះអាសន្ននៅពន្ធនាគារខេត្តនេះ។
លោក ផាន់ រតនា បានឱ្យដឹងបន្ថែមថា តុលាការក៏បានចោទប្រកាន់និងចេញដីកាស្វែងរកចាប់ខ្លួនមនុស្ស៤នាក់ផ្សេងទៀត ក្នុងនោះមានទាំងជនជាតិថៃនិងខ្មែរផងដែរ ដែលត្រូវបានសង្ស័យជាប់ពាក់ព័ន្ធនឹងបទល្មើសគ្រឿងញៀន ប៉ុន្តែលោកបដិសេធផ្ដល់ព័ត៌មានលម្អិតបន្ថែមទៀត ដោយថា កុំឱ្យប៉ះពាល់ដល់នីតិវិធីរបស់តុលាការ។
នាយករងមន្ទីរប្រឆាំងគ្រឿងញៀន លោក អ៊ិន សុង បានឱ្យដឹងបន្ថែមថា ស្ត្រីថៃនោះត្រូវបានសមត្ថកិច្ចចាប់ខ្លួននៅជិតច្រកព្រំដែនអន្តរជាតិដូង ប៉ុន្តែលោកថា ស្ត្រីថៃរូបនេះមិនបានចូលតាមច្រកទ្វារព្រំដែនកម្ពុជា-ថៃនោះទេ។
ប្រធានច្រកទ្វារព្រំដែនអន្តរជាតិដូង លោក ហម សំខាន់ អះអាងថា ស្ត្រីថៃរូបនេះមិនបានឆ្លងកាត់តាមច្រកទ្វារព្រំដែនមួយនេះទេ ក្រោយពីសមត្ថកិច្ចច្រកព្រំដែនរបស់លោកបានត្រួតពិនិត្យរួចនោះ។
លោក ហម សំខាន់ ប្រាប់ថា៖ «ខាងជំនាញកំពុងតែស៊ើបសួរជនត្រូវចោទ ជនល្មើសហ្នឹងថា តើគាត់យកចេញពីច្រកណាអ៊ីចឹង តែគាត់មិនទាន់បំភ្លឺ»។
អគ្គស្នងការរងទទួលផែនប្រឆាំងបទល្មើសគ្រឿងញៀន លោក ម៉ក់ ជីតូ អះអាងថា កម្ពុជាគឺជាទីកន្លែងឆ្លងកាត់នៃគ្រឿងញៀនទៅកាន់ប្រទេសទីបី ដូចជា កោះតៃវ៉ាន់ នូវែលហ្សេឡង់ និងហ្វីលីពីន ជាដើម។
បើតាមមន្ត្រីនគរបាលជាន់ខ្ពស់រូបនេះ ៧០ភាគរយនៃគ្រឿងញៀនដែលត្រូវបាននាំចូលកម្ពុជានោះ ត្រូវបាននាំចេញទៅកាន់ប្រទេសទីបី ខណៈចំណែក៣០ភាគរយទៀតនៅសេសសល់ ត្រូវបានចែកចាយនៅក្នុងប្រទេសកម្ពុជា។
លោក ម៉ក់ ជីតូ ប្រាប់ថា៖ «គោលដៅរបស់វា គឺយកមកដល់ស្រុកខ្មែរ ហើយវេចខ្ចប់ រួចហើយបានបញ្ជូនទៅខាងក្រៅ ប៉ុន្តែវាបញ្ជូនទៅខាងក្រៅប្រហែល៧០ភាគរយ ហើយនៅយើង៣០ភាគរយ វាចែកចាយជួញដូរ»។
របាយការណ៍ផ្ដល់ដោយមន្ទីរប្រឆាំងគ្រឿងញៀន បង្ហាញថា គិតចាប់ពីថ្ងៃ១ ខែមករា ដល់ថ្ងៃទី៧ ខែធ្នូ ឆ្នាំ២០២០នេះ បង្ហាញថា បទល្មើសគ្រឿងញៀនសរុប ៩ ៧៣៧ ករណី ប្រើប្រាស់ ៣ ៥៣៥ ករណី និងជួញដូរ ៦ ២០២ ករណី ឃាត់មនុស្សសរុប ១៩ ៨៨១ នាក់ (ស្រី ១ ២១៨) ក្នុងនោះជនបរទេស ៣១៨ នាក់ (ស្រី ៤៣ នាក់) និងមាន ១៤ សញ្ជាតិ និងសារធាតុញៀនគ្រប់ប្រភេទជិត ៣ ១៨៨ គីឡូក្រាម៕
