អ្នកពាក់ព័ន្ធនឹងព្រឹត្តិការណ៍សហគមន៍ ២៨វិច្ឆិកា បារម្ភពីហានិភ័យនៃការឆ្លងជំងឺកូវីដ១៩ ដោយថា ការធ្វើតេស្តយកសំណាកលើកទី២ នៅទីតាំងមួយចំនួន មានមនុស្សច្រើន និងមិនមានការរៀបចំគម្លាតសុវត្ថិភាពឱ្យបានត្រឹមត្រូវតាមការណែនាំរបស់ក្រសួងសុខាភិបាល។
កាលពីម្សិលមិញ និងថ្ងៃនេះ អ្នកធ្វើចត្តាឡីស័កជាច្រើនរយនាក់ បានធ្វើដំណើរទៅកាន់ក្រសួងមហាផ្ទៃ និងពហុកីឡដ្ឋានជាតិអូឡាំពិក ក្នុងរាជធានីភ្នំពេញ ដើម្បីធ្វើតេស្តតាមដានសុខភាពជាលើកទី២ តាមការណែនាំរបស់ក្រសួងសុខាភិបាល ក្រោយពីពួកគេបានដាក់ខ្លួនឱ្យនៅដាច់ដោយឡែកមួយរយៈ ក្រោយប៉ះពាល់ផ្ទាល់និងប្រយោលជាមួយអ្នកជំងឺកូវីដ១៩ ដែលក្រសួងសុខាភិបាលបានរកឃើញ។
ស្ត្រីម្នាក់នៅខណ្ឌច្បារអំពៅ ជាមន្ត្រីបម្រើការងារនៅក្រសួងមហាផ្ទៃ សុំមិនបញ្ចេញឈ្មោះ បាននិយាយថា គាត់បានធ្វើតេស្តលើកទី១ តាមការណែនាំរបស់ក្រសួងសុខាភិបាល។ ប៉ុន្តែការធ្វើតេស្តលើកទី២នេះ គាត់មិនបានទៅទេ ដោយសារតែគាត់បារម្ភខ្លាចឆ្លងពីអ្នកដទៃ ខណៈទីតាំងយកសំណាកនៅក្រសួងមហាផ្ទៃនោះ មានមនុស្សច្រើន ហើយមិនរក្សាគម្លាតសុវត្ថិភាព។
អ្នកស្រីថា៖ «ខ្ញុំធ្វើការនៅក្នុងក្រសួងហ្នឹង ដល់ឃើញមនុស្សណែនតាន់តាប់ ខ្ញុំមកផ្ទះវិញទៅ ព្រោះខ្ញុំខ្លាច ខ្ញុំនៅមានកូនតូច ខ្លាចយើងអត់អី តែគេអីអ៊ីចឹង»។
ស្តី្រអាយុ២៥ឆ្នាំរូបនេះ និយាយទៀតថា គាត់បានធ្វើចត្តាឡីស័ក៨ថ្ងៃមកហើយ ពាក់ព័ន្ធនឹងព្រឹត្តិការណ៍សហគមន៍២៨វិច្ឆិកានេះ គាត់សំណូមឱ្យក្រសួងពាក់ព័ន្ធធ្វើយ៉ាងណារៀបចំឱ្យមានការរក្សាគម្លាតសុវត្ថិភាពត្រឹមត្រូវ ដើម្បីទប់ស្កាត់ការឆ្លងណាមួយដែលអាចកើតឡើងជាយថាហេតុ។
បុរសម្នាក់ទៀត សុំមិនឱ្យបញ្ចេញឈ្មោះដែរ និយាយថា នៅព្រឹកថ្ងៃអង្គារនេះ គាត់បានទៅធ្វើតេស្តនៅពហុកីឡដ្ឋានអូឡាំពិក ដើម្បីធ្វើតេស្តតាមដានសុខភាពជាលើកទី២ ខណៈការធ្វើចត្តាឡីស័ករបស់គាត់បាន១៤ថ្ងៃរួចមកហើយ មិនមានរោគសញ្ញាអ្វីកើតឡើងឡើយ។
បុរសវ័យ៤០ឆ្នាំរូបនេះ និយាយទៀតថា ពេលខ្លះលោកអត់ដង្ហើមដោយខ្លាចឆ្លង នៅពេលមានមនុស្សប្រជ្រៀតគ្នាទៅធ្វើតេស្ត នៅពហុកីឡដ្ឋានជាតិនោះ។ លោកថា បញ្ហានេះជាហានិភ័យសម្រាប់គាត់ ប្រសិនមាននរណាម្នាក់ក្នុងចំណោមនោះមានផ្ទុកជំងឺកូវីដ១៩។
លោកថា៖ «ពេលចូលដំបូងរញ៉េរញ៉ៃណាស់ កៀកៗគ្នាហ្មង ហើយខ្ញុំចង់ភ័យ ព្រោះអីនៅខាងឆ្វេង ខាងស្តាំ ខាងមុខ ខាងក្រោយ ណែនហ្មង ទាល់តែចូលក្នុងបានរៀបចំស្រួលបួល ហើយពេលហ្នឹង បើមានអ្នកឆ្លងដឹងតែចប់ហើយមួយក្រុមហ្នឹង»។
លោកបានស្នើដល់មន្ត្រីសុខាភិបាល ក៏ដូចជា អាជ្ញាធរមានសមត្ថកិច្ច គួររៀបចំសណ្តាប់ធ្នាប់ រៀបចំគម្លាតសុវត្ថិភាពតាំងពីផ្លូវចូលនិងទីតាំងរង់ចាំ សម្រាប់អ្នកទៅធ្វើតេស្តលើកក្រោយៗទៀត និងគួរមានមេក្រូសម្រាប់ហៅ ដើម្បីទប់ស្កាត់ការឆ្លងវីរុសកូវីដ១៩ ក្នុងអំឡុងពេលទៅធ្វើតេស្ត។
បុរសម្នាក់ទៀត ជាមន្ត្រីរាជការ ធ្វើការនៅរដ្ឋសភា បាននិយាយដែរថា ក្រសួងនិងអាជ្ញាធរគួររៀបចំជាផែនដាច់ដោយឡែកពីគ្នា រវាងអ្នកប៉ះពាល់អ្នកជំងឺផ្ទាល់និងអ្នកប៉ះពាល់ដោយប្រយោល ដើម្បីចៀសវាងការចម្លងតគ្នាពេលពួកគេមកធ្វើតេស្តសំណាកនេះ។
លោកថា៖ «យើងអត់ដឹងថា អ្នកណាផ្ទាល់ អ្នកណាមិនផ្ទាល់ទេ យើងគួរតែបែងចែកទៅ អ្នកប៉ះពាល់ផ្ទាល់ជាមួយព្រឹត្តិការណ៍ថ្ងៃ២៨ហ្នឹង មិនច្រើនទេ ដល់អ៊ីចឹងយើងប្រឈមណាស់»។
រដ្ឋលេខាធិការក្រសួងសុខាភិបាល និងអ្នកនាំពាក្យក្រសួងសុខាភិបាល លោកស្រី យក់ សម្បត្តិ មិនអាចទាក់ទងបានទេ ប៉ុន្តែបើតាមសារសំឡេងរបស់លោកស្រីដែលប្រាប់អ្នកសារព័ត៌មាន កាលពីម្សិលមិញ គឺក្រសួងសុខាភិបាលបានអន្តរាគមន៍ទៅក្រសួងមហាផ្ទៃឱ្យមានការរៀបចំរក្សាគម្លាតហើយ ក្រោយពីបានឃើញអ្នកទៅធ្វើតេស្តមានចំនួនច្រើននិងមិនរក្សាគម្លាត។
លោកស្រីថា៖ «ឱ្យកម្លាំងជួយញែកគាត់ដែរ ឱ្យគាត់មានគម្លាតមានអី បើកាលណាគាត់ប្រជ្រៀតគ្នាអ៊ីចឹង វាឆ្លងតៗគ្នា ទោះបីគាត់ពាក់ម៉ាស់ក្តី យើងបារម្ភខ្លាចឆ្លង ហើយឆ្លងទាំងពេទ្យទាំងអីទៀត»។
អ្នកនាំពាក្យក្រសួងសុខាភិបាលមួយរូបទៀត លោកស្រី ឱ វណ្ណឌីន មានប្រសាសន៍យ៉ាងខ្លីតាមបណ្តាញសង្គមតេឡេក្រាមថា៖ «សំខាន់បុគ្គលម្នាក់ត្រូវយល់ដឹង កុំប្រជ្រៀតគ្នា ព្រោះទីធ្លាស្តាត [ពហុកីឡដ្ឋានជាតិអូឡាំពិក] ធំ»។
ចំណែកអ្នកនាំពាក្យក្រសួងមហាផ្ទៃ លោក ខៀវ សុភ័ក្រ មានប្រសាសន៍ថា បញ្ហានេះវាបានកើតឡើងមួយរយៈពេលខ្លី ប៉ុន្តែត្រូវបានរៀបរយវិញក្រោយមានកិច្ចអន្តរាគមន៍។
លោកថា៖ «រយៈពេលធ្វើ យើងប្រកាសថា ធ្វើមួយថ្ងៃឱ្យរួច ហើយធ្វើតែមួយកន្លែង ដូច្នេះហើយបងប្អូនយើងនៅសល់ច្រើន ដូច្នេះហើយវាពពាក់ពពូនទៅ ប៉ុន្តែមួយភ្លែតហ្នឹងវាអ៊ីចឹងមែន ប៉ុន្តែបន្ទាប់មក វាល្អទេ មិនមែនអ៊ីចឹងរហូតទេ»។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គឹមអេង មានប្រសាសន៍ថា ការមិនអាចរក្សាគម្លាតសុវត្ថិភាពបាននៅកន្លែងធ្វើតេស្តសម្រាប់អ្នកប៉ះពាល់ក្នុងព្រឹត្តិការណ៍សហគមន៍ ២៨វិច្ឆិកា អាចធ្វើឱ្យកន្លែងនោះក្លាយជាប្រភពចម្លងជំងឺ។
មួយវិញទៀត លោកថា នេះជាគំរូមិនល្អមួយដែលកន្លងមក ក្រសួងសុខាភិបាលធ្លាប់ប្រកាសឱ្យរក្សាគម្លាតសុវត្ថិភាព ដើម្បីទប់ស្កាត់ហានិភ័យនៃការចម្លង ប៉ុន្តែទីតាំងធ្វើតេស្តដែលរៀបចំដោយក្រសួងមួយនេះបែរជាមិនមានរក្សាគម្លាតទៅវិញ។
លោកថា៖ «កន្លែងធ្វើតេស្តជាកន្លែងរៀបចំដោយក្រសួងសុខាភិបាលទៅទៀត ចុះហេតុអីបានជាអត់អាចរក្សាគម្លាតឱ្យល្អប្រសើរបាន ព្រោះនេះជារឿងមួយសំខាន់ណាស់ វាគួរតែកន្លែងហ្នឹងរៀបចំឱ្យទៅជាគំរូ ដែលអាចឱ្យគេយកធ្វើជាស្តង់ដារបានសម្រាប់អនុវត្ត»។
ការធ្វើតេស្តដើម្បីតាមសុខភាពអ្នកពាក់ព័ន្ធព្រឹត្តិការណ៍ ២៨វិច្ឆិកា នៅភ្នំពេញ ក្រសួងសុខាភិបាល បានកំណត់យកទីតាំងមួយចំនួនសម្រាប់ធ្វើតេស្ត ដូចជា នៅក្រសួងមហាផ្ទៃ ពហុកីឡដ្ឋានជាតិអូឡាំពិក រដ្ឋសភា ទីតាំងអង្គភាពភីឡតបន្ទាយទួលក្រសាំង ផ្ទះលោកហេង សំរិន ប្រធានរដ្ឋសភា និងផ្ទះលោក ស ខេង រដ្ឋមន្ត្រីក្រសួងមហាផ្ទៃ។
តែយ៉ាងណា លទ្ធផលនៃការធ្វើតេស្តទាំងនោះ ក្រសួងសុខាភិបាលនៅមិនទាន់បង្ហាញនៅឡើយ។
បើតាមក្រសួងសុខាភិបាល គិតមកដល់ម៉ោង៧ព្រឹកថ្ងៃអង្គារនេះ ក្រសួងរកឃើញថា មានអ្នកឆ្លងក្នុងព្រឹត្តិការណ៍សហគមន៍២៨វិច្ឆិកា សរុបចំនួន៣៤នាក់ហើយ៕