អង្គការសម្ព័ន្ធអ៊ីនធឺណិតអាស៊ី បង្ហាញក្ដីបារម្ភចំពោះការបង្ក្រាបទៅលើសេរីភាពបញ្ចេញមតិនៅលើបណ្ដាញអ៊ីនធឺណិត ក្រោយពីកម្ពុជាមានផែនការបង្កើតច្រកអ៊ីនធឺណិតជាតិ។
ក្នុងសេចក្តីប្រកាសព័ត៌មានរបស់ខ្លួនកាលពីថ្ងៃម្សិលមិញនេះ សម្ព័ន្ធអ៊ីនធឺណិតអាស៊ី បាននិយាយថា កម្ពុជាបានចេញអនុក្រឹត្យស្តីពីការបង្កើតច្រកអ៊ីនធឺណិតថ្នាក់ជាតិ មិនសម្រេចគោលបំណងនៃការពង្រឹងប្រសិទ្ធភាពតភ្ជាប់អ៊ីនធឺណិតរបស់កម្ពុជានោះឡើយ។
អង្គការមួយនេះនិយាយបន្តថា ផ្ទុយទៅវិញ អនុក្រឹត្យនេះនឹងផ្តល់អំណាចដល់រដ្ឋាភិបាលក្នុងការរារាំងសិទ្ធិសេរីភាពបញ្ចេញមតិ ការត្រួតពិនិត្យចាប់ពិរុទ្ធលើប្រព័ន្ធផ្សព្វផ្សាយ និងឯកជនភាពរបស់អ្នកប្រើប្រាស់ជាដើម។
បន្ថែមពីនេះ សម្ព័ន្ធអ៊ីនធឺណិតអាស៊ី លើកឡើងថា ការរៀបចំផ្លូវចរាចរណ៍អ៊ីនធឺណិតអន្តរជាតិទាំងអស់ឱ្យចូលតាមចំណុចតែមួយ អាចធ្វើឱ្យល្បឿនអ៊ីនធឺណិតធ្លាក់ចុះ ធ្វើឱ្យទន់ខ្សោយខ្លាំងដល់កំណើនសេដ្ឋកិច្ចឌីជីថល និងបង្កើនហានិភ័យសន្តិសុខអ៊ីនធឺណិត ជាពិសេសប៉ះពាល់ដល់អ្នកប្រើប្រាស់អ៊ីនធឺណិតទាំងអស់ក្នុងប្រទេសកម្ពុជា រួមទាំងអ្នកវិនិយោគបរទេស និងអាជីវកម្មកម្ពុជាដែលមានវត្តមានអនឡាញទៀតផង។
អ្នកនាំពាក្យទីស្តីការគណៈរដ្ឋមន្រ្តី លោក ផៃ ស៊ីផាន បានច្រានចោលការលើកឡើងរបស់សម្ព័ន្ធអ៊ីនធឺណិតអាស៊ី ដោយលោកថា ប្រទេសមហាអំណាចមួយចំនួនក៏បង្កើតច្រកអ៊ីនធឺណិតនោះដែរ ដើម្បីងាយស្រួលគ្រប់គ្រងប្រាក់ចំណូលចូលរដ្ឋនិងអំពើភេរវកម្មអន្តរជាតិ ជាដើម។
លោក ផៃ ស៊ីផាន មានប្រសាសន៍ថា៖ «ការលើកឡើង គឺលម្អៀងរឿងនយោបាយទេ មិនមែនរឿងការជួយបង្ហាញការពិតដល់មហាជន។ អ្វីដែលជាការពិត គឺការរៀបចំឱ្យមានផ្លូវចេញចូលតែមួយ គឺស្រួលក្នុងការរកចំណូល ក្នុងកិច្ចការពារក្នុងរឿងសកម្មភាពព្រហ្មទណ្ឌពីភេរវកម្មអន្តរជាតិ។ រីឯការបញ្ចេញមតិឬការរិះគន់ យើងបើកចំហតើ! មានប្រទេសណាស្រួលជាងកម្ពុជា? ប្រទេសជិតខាងគឺអត់មានទេ!»។
មន្ត្រីស៊ើបអង្កេតជាន់ខ្ពស់នៅសមាគមអាដហុក លោក ស៊ឹង សែនករុណា លើកឡើងថា ការបង្កើតច្រកអ៊ីនធឺណិតថ្នាក់ជាតិ គេបង្កើតឡើងសម្រាប់ប្រទេសកម្មុយនីស្តតែប៉ុណ្ណោះ។ ករណីនេះ លោកថា កម្ពុជាជាប្រទេសប្រកាន់លទ្ធិប្រជាធិបតេយ្យ មិនគួរចេញអនុក្រឹត្យស្តីពីការបង្កើតច្រកអ៊ីនធឺណិតថ្នាក់ជាតិនោះទេ ដើម្បីកុំឱ្យប៉ះពាល់ដល់សេរីភាពបញ្ចេញមតិ។
លោក ស៊ឹង សែនករុណា មានប្រសាសន៍ថា៖ «រដ្ឋាភិបាលមានសិទ្ធិក្នុងការបង្កើត ប៉ុន្តែសម្រាប់ជាទស្សនៈរបស់យើង ខ្ញុំគិតថា មិនគួរបង្កើតទេនៅក្នុងបរិបទប្រទេសដែលប្រកាន់របបលទ្ធិប្រជាធិបតេយ្យដូចប្រទេសយើង ពីព្រោះវាប៉ះពាល់ទៅដល់សិទ្ធិសេរីភាពក្នុងការបញ្ចេញមតិរបស់ប្រជាពលរដ្ឋ»។
តួលេខរដ្ឋាភិបាល បង្ហាញថា ចំនួនស៊ីមកាតដែលត្រូវបានប្រើប្រាស់នៅកម្ពុជា មានរហូតដល់ជាង ២១លាន៦៧ស៊ីម ខណៈអ្នកចុះឈ្មោះប្រើប្រាស់អ៊ីនធឺណិតនៅកម្ពុជាមានដល់ទៅជាង១៦លាននាក់៕