អាជ្ញាធរខេត្តមណ្ឌលគិរី ផ្អាកអាជីវកម្ម រីលេក្ស ហៀល រីសត(Relax Hill Resort) នៅភូមិអូរស្ពាន សង្កាត់ស្ពានមានជ័យ ក្រុងសែនមនោរម្យ ជាបណ្តោះអាសន្ន ក្រោយរកឃើញអ្នកជំងឺកូវីដ១៩ម្នាក់ បានទៅស្នាក់នៅទីនោះ។
សេចក្តីជូនដំណឹងរបស់អភិបាលក្រុងសែនមនោរម្យ លោក ហៀក សុផាន នៅរសៀលថ្ងៃពុធនេះ ឱ្យដឹងថា អ្នកជំងឺកូវីដ១៩ ឈ្មោះ អិត កុម៉ាល អាយុ៣៥ឆ្នាំ បានទៅស្នាក់នៅ រីលេក្ស ហៀល រីសត កាលពីថ្ងៃទី២ខែធ្នូ ក្រោយពីអ្នកជំងឺរូបនេះបាន ទៅហាង Zendo កាលពីថ្ងៃទី២៧ ខែវិច្ឆិកា។
រដ្ឋបាលក្រុង បន្តថា អាជ្ញាធរខេត្ត បានសម្រេចផ្អាកអាជីវកម្មរីហ្សតនេះ ចាប់ពីថ្ងៃនេះ រហូតដល់ថ្ងៃទី២៤ ខែធ្នូ និងបានតម្រូវឱ្យអ្នកពាក់ព័ន្ធដែលបានប៉ះពាល់ចំនួន ៧នាក់ ធ្វើតេស្តយកវត្ថុសំណាករកមេរោគកូវីដ១៩ និងត្រូវធ្វើចត្តាឡីស័ករយៈពេល១៤ថ្ងៃក្នុងរីហ្សតនេះ។
រដ្ឋបាលក្រុងសែនមនោរម្យ បន្តទៀតថា៖ «សូមបងប្អូនដែលបានស្នាក់នៅ រីលេក្ស ហៀល រីសត ចាប់ពីថ្ងៃទី២ ខែធ្នូ ឆ្នាំ២០២០ មកដលថ្ងៃទី០៩ ខែធ្នូ ឆ្នាំ២០២០ ធ្វើចត្តាឡីស័ករយៈពេល ១៤ថ្ងៃ និងត្រូវទៅធ្វើតេស្តយកវត្ថុសំណាករកមេរោគកូវីដ១៩»។
បើតាមរបាយការណ៍របស់ក្រសួងសុខាភិបាល គិតមកដល់ព្រឹកថ្ងៃពុធនេះ មានមនុស្សចំនួន ៣៨នាក់ហើយ ត្រូវបានរកឃើញថា បានឆ្លងជំងឺកូវីដ១៩ ក្នុងព្រឹត្តិការណ៍សហគមន៍២៨វិច្ឆិកា៕