ក្រសួងសុខាភិបាល រកឃើញអ្នកឆ្លងជំងឺកូវីដ១៩ ចំនួន២នាក់ទៀត ក្នុងនោះ ម្នាក់ជាអ្នកមកពីក្រៅប្រទេស និងម្នាក់ទៀតឆ្លងក្នុងព្រឹត្តិការណ៍សហគមន៍២៨វិច្ឆិកា។
សេចក្តីជូនព័ត៌មានរបស់ក្រសួងសុខាភិបាល នៅថ្ងៃទី១០ ខែធ្នូ ឆ្នាំ២០២០ បានឱ្យដឹងថា អ្នកឆ្លងជំងឺកូវីដ១៩ថ្មី ចំនួន២នាក់ ដែលបានរកឃើញនោះ រួមមាន បុរសជនជាតិខ្មែរ ឈ្មោះ យ៉េ វាសនា អាយុ២៩ឆ្នាំ ជាអ្នកធ្វើដំណើរមកពីប្រទេសជប៉ុន ឆ្លងកាត់កូរ៉េខាងត្បូង មកដល់កម្ពុជា កាលពីថ្ងៃទី១៨ ខែវិច្ឆិកា ឆ្នាំ២០២០ និងម្នាក់ទៀតឈ្មោះ ខន ប្រសើរ អាយុ៣៧ឆ្នាំ បានទៅហាង Zando សាខាបឹងកេងកង។
ក្រសួងបន្តថា ចំពោះអ្នកដំណើរតាមយន្តហោះជាមួយបុរសឈ្មោះ យ៉េ វាសនា ចំនួន៤៧នាក់ មានលទ្ធផលតេស្តអវិជ្ជមានវីរុសកូវីដ១៩ ត្រូវបានដាក់ឱ្យធ្វើចត្តាឡីស័កចំនួន១៤ថ្ងៃ នៅមណ្ឌលទ័ពអាកាស និងសណ្ឋាគារមួយនៅរាជធានីភ្នំពេញ។
ចំណែកព្រឹត្តិការណ៍សហគមន៍ ២៨វិច្ឆិកា ក្រសួងថា គិតមកដល់ថ្ងៃទី១០ធ្នូនេះ មានអ្នកឆ្លងជំងឺកូវីដ១៩ សរុបចំនួន៣៩នាក់ ខណៈសំណាកចំនួន៣ ៧៩២សំណាក បានធ្វើវិភាគរួចហើយ ដោយលទ្ធផល«អវិជ្ជមាន» និងនៅសល់សំណាកចំនួន៣ ៧២៥សំណាកផ្សេងទៀត នឹងត្រូវបន្តវិភាគនៅថ្ងៃនេះ។
បើតាមក្រសួងសុខាភិបាល គិតមកដល់ម៉ោង៧ព្រឹក ថ្ងៃទី១០ ខែធ្នូ ឆ្នាំ២០២០ កម្ពុជាបានរកឃើញអ្នកឆ្លងជំងឺកូវីដ១៩ សរុបចំនួន៣៥៦នាក់ ក្នុងនោះព្យាបាលជាសះស្បើយ ចំនួន៣០៧នាក់ និងកំពុងសម្រាកព្យាបាលនៅមន្ទីរពេទ្យ ចំនួន៤៩នាក់៕