មន្ត្រីជាន់ខ្ពស់ក្រសួងសុខាភិបាល អំពាវនាវដល់ពលរដ្ឋបន្តការប្រុងប្រយ័ត្ននិងការពារការឆ្លងជំងឺកូវីដ១៩ បើទោះបច្ចុប្បន្ន មន្ត្រីរូបនេះថា ករណីឆ្លងក្នុងសហគមន៍ហាក់ថមថយខ្លះៗហើយក៏ដោយ ប៉ុន្តែហានិភ័យនៅតែមានខ្ពស់នៅឡើយ។
អ្នកនាំពាក្យក្រសួងសុខាភិបាល លោកស្រី ឱ វណ្ណឌីន មានប្រសាសន៍ប្រាប់ក្រុមអ្នកសារព័ត៌មានតាមប្រព័ន្ធតេឡេក្រាម នៅព្រឹកថ្ងៃព្រហស្បតិ៍នេះ ដោយបញ្ជាក់ថា ការដាក់រូបថតអ្នកជំងឺកូវីដ១៩ ភ្ជាប់ជាមួយអត្តសញ្ញាណអ្នកជំងឺ ធ្វើឡើងក្នុងអំឡុងពេលសកម្មភាពក្នុងការរុករក ប៉ុន្តែពេលនេះមិនមានតម្រូវការដាក់រូបទៀតទេ ព្រោះដើម្បីរក្សាសិទ្ធិបុគ្គល។
លោកស្រីបានបន្តថា ចំពោះស្ថានការណ៍នៃព្រឹត្តិការណ៍សហគមន៍ ២៨វិច្ឆិកា ក្រសួងនៅមិនទាន់អាចសន្និដ្ឋានបែបណាបាននៅឡើយទេ ដោយគ្រាន់តែបច្ចុប្បន្ន ករណីឆ្លងហាក់ដូចជាថមថយខ្លះៗហើយ។
តែយ៉ាងណា លោកស្រីថា៖ «អ្វីដែលសំខាន់នោះ គឺយើងត្រូវតែបន្តការប្រុងប្រយ័ត្នថែមទៀត ក្រែងលោ វីរុសកូវីដ-១៩ នេះ វានៅចរាចរកន្លែងផ្សេងទៀតដែលយើងមិនទាន់បានដឹង ព្រោះពេលនេះគឺជាការចម្លងក្នុងសហគមន៍ ជាចង្កោម និងដោយកន្លែង ហើយហានិភ័យនៅខ្ពស់នៅឡើយទេ»។
បើតាមការជូនដំណឹងរបស់ក្រសួងសុខាភិបាល នៅថ្ងៃទី០៩ ខែធ្នូ ឆ្នាំ២០២០ ក្រសួងបានរកឃើញអ្នកឆ្លងជំងឺកូវីដ១៩ ក្នុងព្រឹត្តិការណ៍សហគមន៍ ២៨វិច្ឆិកា ចំនួនម្នាក់ទៀតដែលជាអ្នកបានទៅទិញទំនិញនៅហាង Zando ។ ក្រសួងបន្តថា គិតចាប់ពីថ្ងៃទី២៨ ខែវិច្ឆិកា ដល់ព្រឹកថ្ងៃទី១០ ខែធ្នូ ឆ្នាំ២០២០នេះ ក្រសួងបានរកឃើញអ្នកឆ្លងជំងឺកូវីដ១៩ ក្នុងសហគមន៍ចំនួន៣៩នាក់៕