ក្រសួងអប់រំ សម្រេចកំណត់សម័យប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) នៅថ្ងៃទី១១ ខែមករា ឆ្នាំ២០២០ ដោយយកលំនាំតាមការប្រឡងសញ្ញាបត្រមធ្យមសិក្សាបឋមភូមិ។
យោងតាមលិខិតរបស់ក្រសួងអប់រំ យុវជន និងកីឡា ជូនសមាគមគ្រឹះស្ថានឧត្តមសិក្សាកម្ពុជា នៅថ្ងៃទី១០ ខែធ្នូ ឆ្នាំ២០២០នេះ បានលើកឡើងថា ប្រមុខរាជរដ្ឋាភិបាលបានចេញគោលការណ៍អនុញ្ញាតឱ្យរៀបចំការប្រឡងសញ្ញាបត្រមធ្យមសិក្សាទុតិយភូមិ ឆ្នាំសិក្សា២០១៩-២០២០ នៅតាមគ្រឹះស្ថានសិក្សាមធ្យមសិក្សា តាមលំនាំនៃការប្រឡងសញ្ញាបត្រមធ្យមសិក្សាបឋមភូមិ។
លិខិតដដែល បន្តថា ក្រសួងបានកំណត់យកថ្ងៃទី១១ ខែមករា ឆ្នាំ២០២០ ជាថ្ងៃប្រឡងបាក់ឌុប និងបានប្រគល់សិទ្ធិនិងការទទួលខុសត្រូវទាំងស្រុងទៅមន្ទីរអប់រំរាជធានី-ខេត្ត និងគណៈគ្រប់គ្រងគ្រឹះស្ថានមធ្យមសិក្សា ទាំងក្នុងដំណាក់កាលរៀបចំ ដំណាក់កាលសំណេរ កំណែ បូកស្រង់ពិន្ទុ និងប្រកាសលទ្ធផល។
លិខិតបន្តថា៖ «ក្រសួងស្នើសុំឱ្យសមាគមគ្រឹះស្ថានឧត្តមសិក្សាកម្ពុជា មេត្តាជួយសម្របសម្រួលផ្ទៃក្នុង និងផ្តល់ព័ត៌មានត្រឡប់អំពីគ្រឹះស្ថានសិក្សាឯកជនដែលមិនមានលទ្ធភាពរៀបចំការប្រឡងដោយខ្លួនឯងមកក្រសួងវិញ ត្រឹមថ្ងៃទី១៥ ខែធ្នូ ឆ្នាំ២០២០ ដើម្បីធ្វើការពិនិត្យនិងសម្រេច»។
កន្លងមក ក្រសួងអប់រំ ធ្លាប់បានប្រកាសពីកាលបរិច្ឆេទប្រឡងបាក់ឌុបម្តងរួចមកហើយដែលគ្រោងធ្វើនៅថ្ងៃទី២១ និងទី២២ ខែធ្នូនេះ ប៉ុន្តែត្រូវបានពន្យារពេលទៅពាក់កណ្តាលខែមករាឆ្នាំក្រោយវិញ ក្រោយកម្ពុជារកឃើញករណីឆ្លងកូវីដ១៩ក្នុងសហគមន៍ កាលពីថ្ងៃទី២៨ ខែវិច្ឆិកា៕
