រដ្ឋមន្ត្រីក្រសួងមហាផ្ទៃ និងប្រធានរដ្ឋសភា រួមទាំងក្រុមគ្រួសារ និងមន្ត្រីសំខាន់ៗទាំងអស់ដែលបានធ្វើតេស្តរកវីរុសកូវីដ១៩ លើកទី២ ទទួលបានលទ្ធផលអវិជ្ជមានទាំងអស់ ប៉ុន្តែពួកគាត់នៅបន្តធ្វើចត្តាឡីស័កតាមការណែនាំរបស់ក្រសួងសុខាភិបាល។
ខុទ្ទកាល័យលោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ឱ្យដឹងតាមរយៈទំព័រហ្វេសប៊ុករបស់លោក នៅថ្ងៃទី១០ ខែធ្នូនេះថា តាមការបញ្ជាក់របស់ក្រសួងសុខាភិបាល ថ្នាក់ដឹកនាំក្រសួងមហាផ្ទៃរូបនេះ ជាមួយក្រុមគ្រួសារ កងការពារ ព្រមទាំងមន្ត្រីសំខាន់ៗទាំងអស់ដែលបានធ្វើតេស្តជំងឺកូវីដ-១៩ លើកទី២ គឺទទួលបានលទ្ធផលអវិជ្ជមានទាំងអស់។
ខុទ្ទកាល័យរដ្ឋមន្ត្រីរូបនេះបន្តថា ពេលនេះ លោក ស ខេង នៅតែបន្តធ្វើចត្តាឡីស័កនិងអនុវត្តតាមការណែនាំរបស់ក្រសួងសុខាភិបាលជាបន្តទៀត ហើយលោកក៏បានអំពាវនាវដល់ពលរដ្ឋ ថ្នាក់ដឹកនាំមន្ត្រីរាជការស៊ីវិល នគរបាលជាតិនៃក្រសួងមហាផ្ទៃ បន្តអនុវត្តតាមការណែនាំរបស់ក្រសួងសុខាភិបាលឱ្យបានខ្ជាប់ខ្ជួន។
ចំណែកប្រធានរដ្ឋសភា លោក ហេង សំរិន បានឱ្យដឹងតាមបណ្តាញសង្គមហ្វេសប៊ុករបស់លោក កាលពីថ្ងៃទី៨ ខែធ្នូ ឆ្នាំ២០២០ដែរថា ក្រោយធ្វើតេស្តរកវីរុសកូវីដលើកទី២រួច សុខភាពរបស់លោកនិងសមាជិកគ្រួសារ មានភាពល្អប្រសើរជាធម្មតា ហើយលោកនិងគ្រួសារនឹងបន្តធ្វើចត្តាឡីស័កក្នុងផ្ទះរហូតគ្រប់១៤ថ្ងៃ។
បើតាមសេចក្តីជូនដំណឹងរបស់រដ្ឋសភា នៅថ្ងៃទី១០ ខែធ្នូនេះ សមាជិករដ្ឋសភានិងមន្ត្រីរាជការរដ្ឋសភាដែលពាក់ព័ន្ធទាំងអស់ នឹងត្រូវយកសំណាកធ្វើតេស្តរកវីរុសកូវីដ១៩ ជាលើកទី៣ នៅថ្ងៃទី១២ ខែធ្នូ ចុងសប្តាហ៍នេះ នៅវិមានរដ្ឋសភា។
គួរបញ្ជាក់ថា មន្ត្រីជាន់ខ្ពស់រដ្ឋាភិបាល រដ្ឋសភា និងមន្ត្រីរាជការនៅក្រសួងមហាផ្ទៃជាច្រើននាក់ បានធ្វើតេស្តនិងដាក់ខ្លួនឱ្យនៅដាច់ដោយឡែករយៈពេល១៤ថ្ងៃ ក្រោយពីបានជួបប្រាស្រ័យទាក់ទងផ្ទាល់និងប្រយោលជាមួយលោក ឆែម សាវុធ អគ្គនាយកនៃអគ្គនាយកដ្ឋានពន្ធនាគារនៃក្រសួងមហាផ្ទៃ និងភរិយា ដែលរកឃើញថាបានឆ្លងជំងឺកូវីដ១៩ ក្នុងព្រឹត្តិការណ៍សហគមន៍២៨វិច្ឆិកា៕