ចៅក្រមស៊ើបសួរសាលាដំបូងរាជធានីភ្នំពេញ បានសម្រេចឃុំខ្លួនជនជាតិថៃម្នាក់ពីបទជួញដូរសារធាតុញៀនដោយខុសច្បាប់ ក្រោយសមត្ថកិច្ចបានចាប់ខ្លួនកាលពីពេលថ្មីៗនេះជាមួយនឹងគ្រឿងញៀនជាង៥០គីឡូក្រាម ខណៈសមត្ថកិច្ចកំពុងស៊ើបអង្កេតរកអ្នកពាក់ព័ន្ធផ្សេងទៀត។
អ្នកនាំពាក្យសាលាដំបូងរាជធានីភ្នំពេញ លោក សួស វិទ្យារ៉ាឌី មានប្រសាសន៍នៅថ្ងៃសុក្រនេះថា ចៅក្រមស៊ើបសួរ បានសម្រេចចោទប្រកាន់បុរសជនជាតិថៃរូបនេះ ពីបទ «ជួញដូរសារធាតុញៀនដោយខុសច្បាប់» ហើយបច្ចុប្បន្ន ជនជាប់ចោទរូបនេះ ត្រូវបានបញ្ជូនទៅឃុំខ្លួនបណ្តោះអាសន្ននៅពន្ធនាគារព្រៃស។
លោកបញ្ជាក់ថា៖ «ជួញដូរដោយខុសច្បាប់នៃសារធាតុញៀន បច្ចុប្បន្ននេះ គឺស្ថិតក្នុងដំណាក់កាលនៃការស៊ើបនៅឡើយ»។
កាលពីថ្ងៃម្សិលមិញ មន្ទីរប្រឆាំងបទល្មើសគ្រឿងញៀន បានឱ្យដឹងថា កម្លាំងជំនាញរបស់មន្ទីរប្រឆាំងបទល្មើសគ្រឿងញៀន បានស្រាវជ្រាវនិងបង្ក្រាបបានករណីជួញដូរគ្រឿងញៀនឆ្លងដែន មកពីប្រទេសថៃចូលកម្ពុជា នៅចំណុចក្បែរ វិមានឈ្នះឈ្នះ ស្ថិតក្នុងសង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ។
អង្គភាពដដែលបន្តថា ក្នុងប្រតិបត្តិការបង្ក្រាបនោះ កម្លាំងជំនាញបានចាប់ខ្លួនបុរសជនជាតិថៃម្នាក់ឈ្មោះ សុរៈឆៃ ខាំកែវ (SURACHAI KHAMKAEW) អាយុ៣៧ឆ្នាំ ជាមួយនឹងវត្ថុតាងសារធាតុញៀន ប្រភេទមេតំហ្វេតាមីន ICE ទម្ងន់ជាង៥០គីឡូក្រាម រួមជាមួយនឹងរថយន្តម៉ាក LEXUS470 មួយគ្រឿង ដែលជនសង្ស័យបានជួលពីគេដើម្បីដឹកជញ្ជូនគ្រឿងញៀន។
លោក អ៊ិន សុង នាយរងមន្ទីរប្រឆាំងបទល្មើសគ្រឿងញៀន នៃអគ្គស្នងការដ្ឋាននគរបាលជាតិ មានប្រសាសន៍នៅថ្ងៃសុក្រនេះថា តាមការស៊ើបអង្កេត ក្រៅពីជនសង្ស័យជាបុរសជនជាតិថៃនេះ កម្លាំងជំនាញក៏បានកំណត់មុខសញ្ញាជនល្មើសផ្សេងទៀតដែលជាជនជាតិថៃនិងជនជាតិខ្មែរ ដែលជាឈ្មួញនាំចូលគ្រឿងញៀនពីប្រទេសថៃ តាមច្រករបៀង ក្បែរក្រុងប៉ោយប៉ែត ខេត្តបន្ទាយមានជ័យ។
ប៉ុន្តែលោកបានបដិសេធអត្ថាធិប្បាយលម្អិត ដោយថា ករណីនេះកំពុងស្ថិតក្នុងការស៊ើបអង្កេតបន្ត ដែលត្រូវលាក់ការសម្ងាត់។
លោកនិយាយថា៖ «យើងបានកំណត់មុខសញ្ញាពាក់ព័ន្ឋរួចហើយ មាននៅថៃ និងខ្មែរ […] សុំទោស! ពូមិនអាចជម្រាបអូនបានទេ នេះជាការសម្ងាត់ ត្រូវបន្តស៊ើបអង្កេត»។
នៅមុនមួយថ្ងៃនៃការបង្ក្រាបករណីជួញដូរគ្រឿងញៀនលើបុរសជនជាតិថៃនេះ សមត្ថកិច្ចនគរបាលប្រឆាំងគ្រឿងញៀន ក៏បានចាប់ខ្លួនស្ត្រីជនជាតិថៃម្នាក់ ជាមួយនឹងគ្រឿងញៀនទម្ងន់៣០គីឡូក្រាមផងដែរ កាលពីថ្ងៃទី៥ ខែធ្នូ។
របាយការណ៍របស់អង្គការសហប្រជាជាតិស្ដីអំពីគ្រឿងញៀននិងឧក្រិដ្ឋកម្ម បានព្រមានថា ការផ្គត់ផ្គង់ដ៏ច្រើនលើសលប់ បានធ្វើឱ្យតម្លៃនៃគ្រឿងញៀនប្រភេទមេតំហ្វេតាមីន បានធ្លាក់ចុះដល់កម្រិតដែលទាបក្នុងមួយទសវត្សរ៍ចុងក្រោយនេះ ដែលនាំឱ្យទីផ្សារគ្រឿងញៀននៅតំបន់អាស៊ីខាងកើតនិងអាស៊ីអាគ្នេយ៍ បានបន្តរីករាលដាលនិងកាន់តែធំជាងមុន។
លោក Jeremy Douglas តំណាងអង្គការសហប្រជាជាតិ ស្តីពី គ្រឿងញៀននិងឧក្រិដ្ឋកម្ម (UNODC) ប្រចាំតំបន់អាស៊ីអាគ្នេយ៍និងប៉ាស៊ីហ្វិក បានកត់សម្គាល់ថា ស្របពេលដែលពិភពលោកកំពុងផ្ដោតការយកចិត្តទុកដាក់លើជំងឺរាតត្បាតកូវីដ១៩ ករណីជួញដូរនិងការផលិតគ្រឿងញៀនក៏មានការរីករាលដាលកាន់តែធំជាងមុនដែរ។
ក្នុងកិច្ចប្រជុំកំពូលតំបន់ត្រីកោណ កម្ពុជា ឡាវ និងវៀតណាម (CLV) លើកទី១១ រវាងកម្ពុជា ឡាវ និងវៀតណាម កាលពីថ្ងៃទី៩ ខែធ្នូ ឆ្នាំ២០២០នេះ លោកនាយករដ្ឋមន្ត្រី ហ៊ុន សែន ក៏បានលើកឡើងពីភាពចាំបាច់នៃការសហប្រតិបត្តិការរវាងប្រទេស CLV ក្នុងការប្រយុទ្ធប្រឆាំងការជួញដូរមនុស្សនិងគ្រឿងញៀន បទល្មើសឆ្លងដែន បទល្មើសព្រៃឈើ និងឧក្រិដ្ឋកម្មឆ្លងដែនផ្សេងទៀតផងដែរ៕