ប្រជាពលរដ្ឋប្រហែល៣០នាក់នៅសហគមន៍ផ្លូវ៦០ម៉ែត្រ ស្ថិតក្នុងភូមិព្រែកតាគង់១ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ បានតវ៉ាមុខសាលាខណ្ឌ នៅថ្ងៃចន្ទនេះ ដើម្បីស្វែងរកដំណោះស្រាយ ករណីដែលពួកគេអះអាងថា អាជ្ញាធរមូលដ្ឋានហាមឃាត់មិនឱ្យចាក់ដីធ្វើផ្លូវក្នុងសហគមន៍។
អ្នកស្រី ឡាយ ស្រីម៉េត ដែលអះអាងថាជាតំណាងប្រជាពលរដ្ឋ ប្រាប់វីអូឌីមុខសាលាខណ្ឌមានជ័យថា ប្រជាពលរដ្ឋនៅសហគមន៍ផ្លូវ៦០ម៉ែត្រ បានរស់នៅលើទឹកស្អុយច្រើនឆ្នាំហើយ ដោយសារពុំមានប្រព័ន្ធលូបង្ហូរទឹកត្រឹមត្រូវ។ អ្នកស្រីថា ឆ្នាំ២០២០នេះ អាជ្ញាធរមូលដ្ឋានបានចុះរៀបចំធ្វើប្រព័ន្ធលូថ្មីតាមដងផ្លូវក្នុងសហគមន៍ ប៉ុន្តែមិនបានចាក់ដីលុបដើម្បីឱ្យប្រជាពលរដ្ឋងាយស្រួលក្នុងការធ្វើដំណើរឡើយ។
អ្នកស្រីបន្តថា ដោយសារផ្លូវពិបាកក្នុងការធ្វើដំណើរពេក អ្នកភូមិបាននាំគ្នាចាក់ដីលុបលើលូ ដើម្បីធ្វើផ្លូវ ប៉ុន្តែត្រូវអាជ្ញាធរសង្កាត់ចាក់អង្រែលើ ហាមឃាត់ពួកគាត់មិនឱ្យចាក់ និងស្នើឱ្យកាយដីដែលបានចាក់នោះចេញវិញ ដែលធ្វើឱ្យប្រជាពលរដ្ឋមិនសប្បាយចិត្ត ហើយនាំគ្នាទៅរកអន្តរាគមន៍ពីអាជ្ញាធរខណ្ឌជួយដោះស្រាយ។
អ្នកស្រីបន្ថែមថា៖ «និយាយរួម សហគមន៍នេះទឹកលិចជារៀងរាល់ឆ្នាំ។ អ៊ីចឹងពួកខ្ញុំរៃលុយគ្នាចាក់ដី ដល់ពេលបានចាក់ដីហើយ បែរជាលោកចៅសង្កាត់មិនឱ្យចាក់ដីវិញ។ គាត់ចោទពួកខ្ញុំថា ចាក់ដីនៅក្នុងលូ តែខ្ញុំសុំបញ្ជាក់ថា ពួកយើងមិនបានចាក់ដីក្នុងលូទេ គឺចាក់ដីបំពេញផ្លូវ។ ហើយគាត់ថា ចាំចប់កូវីដ រកមេធាវីទៅដោះស្រាយតាមផ្លូវច្បាប់នៅតុលាការទៅ»។
ពលរដ្ឋម្នាក់ទៀត អ្នកស្រី អន ស៊ីថា និយាយថា នៅរដូវវស្សា ផ្លូវក្នុងសហគមន៍ផ្លូវ៦០ម៉ែត្រនេះ បានរងនូវការជន់ទឹកស្អុយជម្រៅត្រឹមចង្កេះ ដែលធ្វើឱ្យពលរដ្ឋពិបាករស់នៅ និងក្មេងតូចៗពិបាកធ្វើដំណើរជាដើម។
អ្នកស្រីបន្ថែមថា៖ «ក្មេងៗប្រឈមនឹងកើតជំងឺច្រើន ភាគច្រើនកើតរមាស់ និងទឹកស្អុយស៊ីជើង និយាយទៅ ក្មេងប្រឈមកើតជំងឺច្រើន ព្រោះទឹកហ្នឹងស្អុយណាស់ សំរាមកកស្ទះចេញពីលូមកទាំងអស់ អ៊ីចឹងបានជាពួកខ្ញុំស្នើសុំចាក់ដីបំពេញផ្លូវហ្នឹង មិនមែនចាក់ដីលុបលូរបស់រដ្ឋទេ»។
បើតាមក្រុមប្រជាពលរដ្ឋ កាលពីថ្ងៃទី២ ខែធ្នូ ឆ្នាំ២០២០ ចៅសង្កាត់ចាក់អង្រែលើ លោក កែវ សារឿន ក៏បានចេញលិខិតកោះហៅតំណាងពលរដ្ឋ អ្នកស្រី ឡាយ ស្រីម៉េត ទៅដោះស្រាយនៅសាលាសង្កាត់ ដោយចោទថា តំណាងពលរដ្ឋរូបនេះដឹកនាំចលនាប្រជាពលរដ្ឋចាក់ដីលើប្រព័ន្ធលូដែលធ្វើឱ្យប៉ះពាល់ដល់ផលប្រយោជន៍សាធារណៈ។
ចៅសង្កាត់ចាក់អង្រែលើ លោក កែវ សារឿន មានប្រសាសន៍ថា ពលរដ្ឋបាននាំគ្នាចាក់ដីលុបលើលូ ដែលអាចបង្កឱ្យមានការកកស្ទះលូ។
លោកបន្ថែមថា៖ «យើងបានធ្វើលូឱ្យហើយ តែពួកគាត់រស់នៅសំណង់មិនរៀបរយហ្នឹង គាត់បានធ្វើឱ្យស្ទះលូ។ ផ្លូវមានស្រួលហើយ គាត់ទៅចាក់ដីបន្ថែមពីលើទៀត។ និយាយឱ្យចំ ពួកគាត់ធ្វើឱ្យពិបាកតែម្តង។ ហើយបើកាលណាស្ទះលូកន្លែងហ្នឹង ពលរដ្ឋជាង១ពាន់គ្រួសារ នៅចាក់អង្រែលើ អត់មានទឹកចេញនៅផ្លូវ៦០ម៉ែត្រ ព្រោះកន្លែងហ្នឹងជាមេប្រព័ន្ធលូហើយ»។
អភិបាលរងខណ្ឌមានជ័យ លោក ឌី រ័ត្នខេមរុណ មានប្រសាសន៍ថា លោកបានឱ្យមន្ត្រីចុះពិនិត្យករណីនេះហើយ ដើម្បីធ្វើការដោះស្រាយ។
លោកបន្ថែមថា៖ «យើងបានឱ្យសង្កាត់ជូនដំណឹងទៅម្ចាស់ទីតាំងដែលសុំចាក់ដី ស្នើសុំផ្អាកចាក់ដីសិន ទី២ ស្នើឱ្យមានការសិក្សាប្រព័ន្ធលូ និងទី៣ បើរកឃើញថា ប៉ះពាល់ខ្លាំង យើងនឹងកាយដីនោះចេញវិញហើយ»។
ប្រធានកម្មវិធីនៅសមាគមធាងត្នោត លោក ឯម ខេមរា ស្នើឱ្យអាជ្ញាធរដោះស្រាយករណីនេះតាមសន្តិវិធី។ លោកថា ពលរដ្ឋនៅសហគមន៍ផ្លូវ៦០ម៉ែត្រ ភាគច្រើនជាពលរដ្ឋក្រីក្រកំពុងរស់នៅកន្លែងកខ្វក់ និងប្រឈមពីការបណ្តេញចេញ។
លោកបន្ថែមថា៖ «អាជ្ញាធរធ្វើយ៉ាងម៉េចត្រូវធានាថា កុំឱ្យមានការបណ្តេញចេញប្រជាពលរដ្ឋទាំងបង្ខំពីលំនៅឋាន។ ហើយរាល់ការអភិវឌ្ឍនានា គួរតែបង្ហាញពីតម្លាភាព បង្ហាញព័ត៌មានដល់សហគមន៍ ហើយធ្វើម៉េចឱ្យសហគមន៍គាត់ចូលរួមក្នុងដំណើរការនៃការអភិវឌ្ឍនិងចូលរួមសម្រេចចិត្តផង ដើម្បីឱ្យមានការដោះស្រាយនិងមានយុត្តិធម៌»។
បើតាមតំណាងប្រជាពលរដ្ឋ សហគមន៍ផ្លូវ៦០ម៉ែត្រ មានប្រជាពលរដ្ឋរស់នៅសរុប៦៣គ្រួសារ ត្រូវបានអាជ្ញាធរចោទថា រស់នៅក្នុងសំណង់មិនរៀបរយ ហើយពលរដ្ឋទាំងនោះកំពុងរស់នៅក្នុងភាពភ័យខ្លាច ដោយសារតែពួកគេមិនទាន់ទទួលបានបណ្ណកម្មសិទ្ធិ៕