លោកនាយករដ្ឋមន្ត្រី ហ៊ុន សែន សម្រេចឱ្យសិស្សដែលត្រូវប្រឡងបាក់ឌុបក្នុងឆ្នាំ២០២០នេះ ជាប់ទាំងអស់គ្នា ដោយថា ដើម្បីឱ្យពួកគេបានសប្បាយចូលរួមទប់ស្កាត់កូវីដ១៩។
ក្នុងឱកាសថ្លែងសារពិសេសទៅកាន់ប្រជាពលរដ្ឋនៅថ្ងៃនេះ លោកនាយករដ្ឋមន្ត្រី ហ៊ុន សែន បានប្រកាសអនុញ្ញាតឱ្យសិស្សថ្នាក់ទី១២ សម្រាប់ឆ្នាំសិក្សា២០១៩-២០២០ ជាប់ស្វ័យប្រវត្តិដោយមិនចាំបាច់ឆ្លងកាត់ការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប ដែលត្រូវបានកំណត់ធ្វើនៅថ្ងៃទី១១ ខែមករាឆ្នាំក្រោយនោះឡើយ ដោយថា ដើម្បីការពារការចម្លងជំងឺកូវីដ១៩។
លោក ហ៊ុន សែន បញ្ជាក់ថា មូលហេតុដែលលោកជ្រើសរើសមធ្យោបាយនេះ ដោយសាររដ្ឋាភិបាលមិនទាន់អាចទប់ស្កាត់បានទាំងស្រុងនូវព្រឹត្តិការណ៍ឆ្លងក្នុងសហគមន៍២៨វិច្ឆិកា ខណៈកម្ពុជាមិនទាន់បានទិញវ៉ាក់សាំងការពារជំងឺកូវីដ១៩។
លោក ហ៊ុន សែន ថ្លែងថា៖ «ប្រឡងរួមធ្វើវាមិនកើត ព្រោះខ្ញុំមិនអនុញ្ញាតឱ្យធ្វើទេ ព្រោះលោកឯងយកតែវិស័យអប់រំមួយយកមកគិត អត់មានគិតដល់ប្រជាជនទូទៅ តើឱ្យខ្ញុំទទួលម៉េចបាន។ មេដឹកនាំប្រទេសទទួលខុសត្រូវមុខសភា ក៏ដូចជាការទទួលខុសត្រូវចំពោះព្រះភ័ក្ត្រព្រះមហាក្សត្រ។ ទុកឱ្យកូនគេងាប់ឆ្លងពេញទឹកពេញដីពេញហ្នឹង ដោយសារតែរឿងពួកអស់លោកធ្វើដូច្នេះ។ ខ្ញុំមានសិទ្ធិអារកាត់ ខ្ញុំអត់ឱ្យប្រឡងទេនៅថ្ងៃទី១១ ខែមករា ខ្ញុំអត់ឱ្យប្រឡងទេ»។
សាកលវិទ្យាធិការនៃសាកលវិទ្យាល័យអាស៊ី-អឺរ៉ុប លោក ជា សុភាព សង្កេតឃើញថា គុណភាពសិក្សារបស់សិស្សមិនថយចុះនោះទេ ដោយលោកយល់ថា ក្នុងអំឡុងកូវីដ១៩នេះ ក្រសួងអប់រំ និងលោកគ្រូអ្នកគ្រូបានខិតខំបង្រៀនដល់សិស្សខ្លាំង។
លោកបន្តថា ទោះបីជាសិស្សមិនបានរៀនគ្រប់គ្រាន់ឬចប់ចុងចប់ដើមក៏ដោយ ប៉ុន្តែនៅពេលឡើងដល់មហាវិទ្យាល័យនោះ លោកថា នឹងមានការបំប៉នជំនាញនីមួយៗបន្ថែមទៀតទៅដល់និស្សិត។
លោក ជា សុភាព មានប្រសាសន៍ថា៖ «អ៊ីចឹង គុណភាពសម័យកូវីដ យើងទទួលយកតាមជាក់ស្ដែង យើងធ្វើម៉េច វាអ៊ីចឹង។ គ្រាន់តែថា ខ្ញុំមើលទៅវាមិនថយគុណភាពខ្លាំងក្លាណាស់ណាទេ ពីព្រោះថ្នាក់ទី១២នេះ ឃើញក្រសួងប្រឹងប្រែង គាត់បង្រៀនតាមទូរទស្សន៍ផង។ អ៊ីចឹងឃើញស្វះស្វែងណាស់ អ៊ីចឹងគុណភាពមិនថយចុះប៉ុន្មានទេ»។
យុវសិស្ស ស៊ិន ឧត្តម អាយុ២០ឆ្នាំ ជាសិស្សរៀនថ្នាក់ទី១២ នៅវិទ្យាល័យ ហ៊ុនសែន សាមគ្គីដូនស ស្រុកស្វាយជ្រំ ខេត្តស្វាយរៀង បង្ហាញអារម្មណ៍សប្បាយចិត្ត ប៉ុន្តែយុវជនរូបនេះយល់ថា ការសម្រេចឱ្យជាប់ទាំងអស់ នឹងធ្វើឱ្យសិស្សដែលខំរៀនកន្លងមកបាក់ទឹកចិត្ត។
យុវជន ឧត្ដម និយាយថា ខ្លួនចង់ឱ្យប្រឡងឬក៏ឱ្យលោកគ្រូ-អ្នកគ្រូធ្វើការវាយតម្លៃទៅលើការសិក្សារបស់សិស្សនីមួយៗ មុននឹងសម្រេចឱ្យជាប់។
យុវសិស្ស ស៊ិន ឧត្ដម និយាយថា៖ «ខ្ញុំគិតថា គេមិនសូវលើកតម្លៃយើងទេ ព្រោះគេឱ្យជាប់ទាំងអស់អ៊ីចឹង។ ណាមួយមិនសូវមានការធ្វើ គេមិនសូវលើកតម្កើងយើង ព្រោះគេឱ្យជាប់ទាំងអស់។ បើថាប្រឡងតឹង [នៅក្នុងថ្នាក់រៀន] កុំឱ្យជាប់ទាំងអស់ គេឱ្យតម្លៃយើងថា យើងចេះសមត្ថភាពយើងពិតប្រាកដ»។
ប្រធានសមាគមគ្រូបង្រៀនឯករាជ្យកម្ពុជា អ្នកស្រី អ៊ុក ឆាយ៉ាវី សម្ដែងការមិនគាំទ្រចំពោះការសម្រេចនេះទេ ដោយអ្នកស្រីថា រដ្ឋាភិបាលឬក្រសួងអប់រំ គួររៀបចំការប្រឡងនៅតាមសាលាដែលសិស្សកំពុងរៀន ឬត្រូវឱ្យលោកគ្រូ-អ្នកគ្រូវាយតម្លៃជាមុនសិន ជាជាងការសម្រេចឱ្យជាប់បែបនេះ។
អ្នកស្រី អ៊ុក ឆាយ៉ាវី ប្រាប់ថា៖ «បើសិនជាយើងធ្វើអ៊ីចឹង អានេះវាជាសមត្ថភាពរបស់គាត់ ហើយអ្នកជាប់ក៏មានមោទកភាព ដោយសារខ្ញុំប្រឡងបាននិទ្ទេស A ដោយសារនៅសម័យកូវីដផង អាហ្នឹងពិតជាមោទកភាពចំពោះគាត់ខ្លួនឯង ក៏ដូចជាគ្រួសារ និងលោកគ្រូ-អ្នកគ្រូយើងដែលបង្រៀនគាត់ដែរ»។
អ្នកនាំពាក្យក្រសួងអប់រំ យុវជន និងកីឡា លោក រស់ សុវាចា ប្រាប់វីអូឌីតាមប្រព័ន្ធតេឡេក្រាមថា ក្រសួងនឹងអនុវត្តទៅតាមអនុសាសន៍របស់ប្រមុខរដ្ឋាភិបាល។
លោក រស់ សុវាចា ប្រាប់ថា៖ «ក្រសួងអប់រំ យុវជន និងកីឡា គោរពទទួលអនុសាសន៍របស់សម្តេចតេជោនាយករដ្ឋមន្ត្រី សម្រាប់ពិភាក្សាផ្ទៃក្នុងក្រសួង រួចនឹងជម្រាបជូនពីករណីនេះក្នុងពេលឆាប់ៗ»។
លោក រស់ សុវាចា បញ្ជាក់ថា ក្នុងឆ្នាំសិក្សា២០១៩-២០២០នេះ បេក្ខជនដែលបានដាក់ពាក្យប្រឡងបាក់ឌុប មានចំនួន១២១ ១០៨នាក់ ក្នុងនោះ ស្រី ៦៣ ៩០៨នាក់ និងត្រូវបានបែងចែកថ្នាក់វិទ្យាសាស្ត្រដែលមានបេក្ខជនប្រឡង ៤០ ៧៤៦នាក់ និងថ្នាក់វិទ្យាសាស្ដ្រសង្គមដែលមានបេក្ខជនចុះឈ្មោះប្រឡង ៨០ ៣៦២នាក់៕