លោកនាយករដ្ឋមន្រ្តី ហ៊ុន សែន បានប្រកាសថា កម្ពុជាអាចគ្រប់គ្រងការឆ្លងជំងឺកូវីដ១៩ ក្នុងព្រឹត្តិការណ៍សហគមន៍ «២៨វិច្ឆិកា» បានហើយ ប៉ុន្តែមិនទាន់អាចបិទបញ្ចប់នូវព្រឹត្តិការណ៍នេះទេ។
លោកនាយករដ្ឋមន្ត្រី ហ៊ុន សែន បានថ្លែងសារជូនជនរួមជាតិ អំពីស្ថានភាពកូវីដ១៩ និងការទិញវ៉ាក់សាំង នៅព្រឹកថ្ងៃអង្គារនេះថា ព្រឹត្តិការណ៍នៃការឆ្លងជំងឺកូវីដ១៩ ក្នុងសហគមន៍២៨វិច្ឆិកា អាចគ្រប់គ្រងបានហើយ ប៉ុន្តែមិនទាន់អាចបិទបញ្ចប់បាននៅឡើយទេ ដោយសារហេតុផលសំខាន់មួយចំនួន។
ហេតុផលទាំងនោះ លោកនាយករដ្ឋមន្ត្រី ហ៊ុន សែន បានបញ្ជាក់ថា ដោយសារតែការមិនទាន់ដឹងអស់នូវព័ត៌មានដែលអ្នកបានឆ្លងជំងឺកូវីដ១៩ ការមិនហ៊ានឬខ្លាចមកធ្វើតេស្តរកកូវីដ១៩ និងអ្នកដែលប៉ះពាល់មួយចំនួនមិនទាន់ធ្វើតេស្តគ្រប់ចំនួន ខណៈអ្នកខ្លះកំពុងធ្វើចត្តាឡីស័កជាដើម។
ជាមួយគ្នានេះដែរ លោកក៏បានស្នើឱ្យក្រសួងសុខាភិបាល និងអាជ្ញាធរដែនដី បន្តតាមដានរកអ្នកពាក់ព័ន្ធនឹងព្រឹត្តិការណ៍សហគមន៍នេះបន្តទៀត ដើម្បីឱ្យប្រាកដថា នឹងមិនមានការចម្លងក្នុងសហគមន៍បន្ថែមទៀត។
លោកនាយករដ្ឋមន្ត្រី ហ៊ុន សែន ថ្លែងថា៖ «សូមឱ្យប្រជាពលរដ្ឋបន្តការរក្សាស្ថានភាពដូចនេះបន្តទៀត ដើម្បីសុវត្ថិភាពទាំងអស់គ្នា។ ការប្រកាសបញ្ចប់ព្រឹត្តិការណ៍នេះ មិនអាចបញ្ចប់មុនថ្ងៃទី១១ ខែមករា បានទេ។ ការប្រកាសបញ្ចប់ព្រឹត្តិការណ៍អាចនឹងកើតឡើងក្រោយថ្ងៃ ២០ មករា ឯណោះ»។
បើតាមសេចក្តីប្រកាសព័ត៌មានរបស់ក្រសួងសុខាភិបាល អ្នកពាក់ព័ន្ធព្រឹត្តិការណ៍សហគមន៍ ២៨វិច្ឆិកា គិតចាប់ពីថ្ងៃទី២៨ ខែវិច្ឆិកា ដល់ថ្ងៃទី១៤ ខែធ្នូ ឆ្នាំ២០២០ មានចំនួន៤១នាក់ ក្នុងនោះមានអ្នកជំងឺ៣នាក់បានជាសះស្បើយ។
អ្នកជាសះស្បើយនោះ ត្រូវបានក្រសួងបញ្ជាក់អត្តសញ្ញាណថា ជាអគ្គនាយកនៃអគ្គនាយកដ្ឋានពន្ធនាគារនៃក្រសួងមហាផ្ទៃ [លោក ឆែម សាវុធ] មន្ត្រីក្រសួងមហាផ្ទៃដែលប៉ះពាល់អគ្គនាយកពន្ធនាគារ និងស្ត្រីម្នាក់ទៀតជាសមាជិកគ្រួសារអ្នកបើកបរឱ្យអគ្គនាយកពន្ធនាគាររូបនោះ៕